1 Job, gula dál mii mus lea dadjat,
guldal dárkilit mu sániid!
2 Dál mun rabastan njálmmi,
divttán iežan jiena gullot.
3 Mun sártnun dieđu sániid
duohta váimmus,
mu baksamat addet čielga dieđu.
4 Ipmila vuoigŋa lea sivdnidan mu,
Buotveagalačča vuoiŋŋahat
addá munnje eallima.
5 Vástit munnje, jos máhtát,
ráhkkan nágget muinna!
6 Ipmila ovddas mun lean du dássásaš,
moai letne dahkkojuvvon ovttat láirris.
7 Don it dárbbaš ballat mus,
mun in ane dutnje garra miela.
8 Don celket mu gullut,
mun gullen ieš go don dadjet:
9 “Mun lean vigiheapme,
in leat dahkan vearrivuođa,
mun lean buhtis, in leat suddudan.
10 Muhto son ohcá mu vuostá ášši,
son atná mu vašálažžanis.
11 Son bidjá mu julggiid láhkkiide,
son goziha buot mu geainnuid.”
12 Dies don it leat vuoigadis!
Mun dajan dutnje:
Ipmil lea stuorit go olmmoš.
13 Manne don sivahalat su das
ahte son ii vástit olbmui?
14 Ipmil sárdnu ovtta láhkái,
velá guovtti láhkái,
muhto olbmot eai fuobmá dan.
15 Niegus, idjaoainnáhusas
go losses nahkárat leat rohtten olbmo
ja son oađđá sajistis,
16 dalle Ipmil rahpá su bealji
ja cuiggoda su,
17 vai son heaitá bahás daguid
ja gáidada čeavlli,
18 danin go Ipmil dáhttu
gádjut su hávddis
ja mannamis jábmiidáibmui.
19 Dahje go bákčasat bagadit olbmo
su oađđinsajis,
oktilaš gibut su rupmašis,
20 borramuš gákkaha su váimmu
eaige sutnje njálggit oppa herskkotge.
21 Su rumaš sotná jur oaidnemeahttumin,
ja buot su dávttit leat oaidnimis liikki čađa.
22 Son lea mannamin hávddi guvlui,
jápmima fámut leat vuordimin su.
23 Jos dalle su luhtte lea eŋgel,
okta áirras duháhis,
gii gulaha su vanhurskkisin,
24 de Ipmil lea árpmihan su ja cealkán:
“Gájo su mannamis hávdái,
lonis lea máksojuvvon.”
25 Su rumaš šaddá lášmadin
dego dalle go son lei nuorra,
son oažžu fas iežas nuorravuođa vuimmiid.
26 Go son rohkadallá, de Ipmil gullá su,
ávuin son beassá geahččat Ipmila muođuid.
Nu Ipmil čuoččáldahttá fas olbmo.
27 Ávuin olmmoš sárdnu buohkaide:
“Mun suddudin ja botnjen vuoigatvuođa,
muhto dattetge son ii ráŋggáštan mu.
28 Son gájui mu mannamis hávdái,
ja mun beasan eallit ja oaidnit čuovgga.”
29 Buot dán Ipmil dahká olbmui
guovtte geardde,
velá golmma gearddege,
30 son buktá su fas hávddis
ja diktá eallima čuovgga báitit su birra.
31 Gula, Job, guldal mu,
oro jaska, dál sártnun mun.
32 Jos dus lea dadjamuš, de daja,
mun sávašin ahte don leat vuoigadis!
33 Muhto jos dus ii leat dadjamuš,
de guldal mu,
oro jávohaga, de mun
oahpahan dutnje viisodaga.