1 Elihu sártnui ain:
2 Guldalehket mu sániid, viissis olbmát,
dii geain lea diehtu,
gullet maid mun dajan!
3 Beallji geahččaladdá sániid,
guopmi máistá borramuša.
4 Válljejehkot dan mii lea riekta,
gávnnahehkot ovttas mii lea buorre.
5 Jobhan dadjá: “Mun lean sivaheapme,
muhto Ipmil lea váldán mus
mu vuoigatvuođa.
6 Mun sártnun duođa,
muhto son dahká mu gielisin,
vaikko mun lean sivaheapme,
de jámiheaddji njuolla lea deaivan munnje.”
7 Makkár olmmái lea Job!
Son čáskada goikku bilkádusaiguin,
8 son guoibmádallá
daiguin geat dahket baháid,
vádjola suttolaččaid searvvis.
9 Son dadjá:
“Ii olbmui leat mihkkege ávkkiid
leat Ipmila ustit.”
10 Dan dihte gullet mu, viissis olbmát:
Ipmil ii eisege daga bahá,
Buotveagalaš ii goassege daga vearrivuođa!
11 Son mávssaha olbmui su daguid.
Mo olmmoš vádjola, nu son bálkkašuvvo.
12 Duođaid, Ipmil ii goassege daga bahá,
Buotveagalaš ii bonja vuoigatvuođa.
13 Gii lea bidjan su eatnama ráđđejeaddjin,
gii lea addán su háldui oppa máilmmi?
14 Jos son čohkkešii iežas vuoiŋŋa
ja máhcahivččii lusas eallinvuoiŋŋahaga,
15 dalle buot sivdnádusat jámášedje,
ja olmmoš šattašii fas muoldan.
16 Gula dál, jos dus lea jierbmi,
guldal maid mun dajan.
17 Sáhtášiigo ráđđet dakkár
gii vašuha vuoigatvuođa?
Dubmetgo don vearredahkkin
fámolačča ja vuoigatlačča,
18 su gii cealká gonagassii: “Skealbma!”
ja oaivámuččaide: “Návccaheamit!”
19 Ii son doala ráđđejeddjiid beali,
ii son vállje riggáid ovdal váivvášiid –
sonhan lea sivdnidan sin buohkaid.
20 Sii jápmet fáhkkestaga, idjaguovdil,
álbmogat suibot ja nohket.
Fámolaš rohttejuvvo eret,
muhto ii olbmogieđain.
21 Ipmil goziha olbmo geainnuid,
son oaidná buot su lávkkiid,
22 ii leat dakkár moskkuseavdnjadas
gosa vearredahkkit sáhtášedje čiehkádit.
23 Ipmil ii almmut bottu
goas olmmoš šaddá boahtit
su ovdii dubmejuvvot.
24 Dutkkakeahttá son cuvke fámolaččaid
ja divvu earrásiid sin sadjái.
25 Son dovdá visot sin daguid,
go idja boahtá, de son njeaidá sin,
ja sii duššet.
26 Son časká sin sin vearredaguid dihte
albmosit, buohkaid oaidnut,
27 danne go sii leat gáidan sus
eaige leat vádjolan su geainnuid.
28 Nu váivvášiid čuorvasat
bohtet su ovdii,
son gullá go vártnuheamit čurvot.
29 Muhto jos son lea jávohaga,
de gii sáhttá dubmet su?
Jos son čiehká ámadajus,
de gii sáhttá soažžudit su?
Son goziha juohke álbmoga ja juohke olbmo.
30 Son ii divtte ipmilmeahttun olbmá
ráđđet ja jorralahttit álbmoga.
31 Almma don dál dajat Ipmilii:
“Mun čádjidin, mun in áiggo šat
dahkat baháid.
32 Oahpat mu, de mun ipmirdan!
Jos lean dahkan boastut, de in šat daga.”
33 Gáttátgo don Ipmila
bálkkašit du nugo don sávat,
go don badjelgeahčat su neavvaga?
Ieš don fertet válljet, in mun.
Sártno, juos dieđát juoidá!
34 Jierpmálaš olbmát dadjet munnje,
viissis olbmot geat gullet mu:
35 “Job sárdnu jurddaškeahttá,
su sániin váilu ipmárdus.”
36 Vare son geahččaluvvošii álelassii,
danne go son lea vástidan
vearredahkkiid láhkái!
37 Son lasiha vearredagu vearredahkui,
min gaskkas son hiddjida.
Son ii heaitte sárdnumis Ipmila vuostá.