1 Elihu sártnui ain:
2 Vuordil veaháš, de mun oahpahan du,
mus lea ain dadjamuš Ipmila beales.
3 Mun vieččan dihton guhkkin,
mun čájehan ahte mu sivdnideaddji
lea vuoigadis.
4 Dat maid mun dajan, ii leat gielis;
du ovddas čuožžu olmmái
gean diehtu lea ollis.
5 Ipmil lea stuoris,
muhto son ii hilggo ovttage.
Son lea fámolaš ja viissis.
6 Ipmilmeahttuma son ii suova eallit,
muhto veahkeha vártnuheami
oažžut vuoigatvuođa.
7 Son ii jorgal čalmmiid eret
vanhurskásis,
muhto diktá su čohkkát truvnnus
gonagasaid bálddas, agálaš gudnis.
8 Muhto jos muhtun lea čadnojuvvon
láhkkiiguin
ja darvánan lihkuhisvuođa gielaide,
9 de Ipmil muittuha
ahte son lea suddudan čeavllistis.
10 Son rahpá su beljiid gullat cuiggodusa
ja gohčču su jorgalit bahás.
11 Jos son dalle gullá Ipmila jiena
ja bálvala su,
de son oažžu eallit lihkolažžan
buot beivviidis,
ja illu deavdá su jagiid.
12 Muhto jos son ii gula,
de son manná jábmiidáibmui,
son jápmá dáidemeahttunvuođastis.
13 Ipmilmeahttumat moaráhuvvet
eaige čuorvvo Ipmilii go son čatná sin.
14 Son jápmá nuorran,
su eallin nohká dego fuorrábártniid eallin.
15 Vártnuheapmái vártnuhisvuohta
gártá bestojupmin,
áŧestusaiguin Ipmil rahpá su beljiid gullat.
16 Don fillehaddet iežat čeavlái.
Don ellet friddjan,
almmá makkárge fuolaid haga,
du beavddi dievva ledje buoiddes herskkot.
17 Muhto dál don gillát
bahás olbmuid ráŋggáštusa,
don oaččut maid ánssášat.
18 Vaikko leat moaris,
de ale fillehala bilkidit,
ale divtte duolgguid čádjidahttit iežat.
19 Sáhttágo du čuorvvas gádjut du
áŧestusas,
vaikko geavahivččet buot fámuidat?
20 Ale huovit dan ija goas álbmogat
rohttejuvvojit eret báikkisteaset.
21 Várut jorgaleames bahávuođa geidnui,
vaikko liikotge dasa eambbo go
gillámuššii.
22 Ipmila váldi lea stuoris.
Gii lea dakkár oahpaheaddji go son?
23 Gii sáhttá mearridit
maid son galgá dahkat,
gii sáhttá dadjat sutnje:
“Don dahket boastut!”
24 Muitte rámidit su daguid,
daid olbmot leat álo máidnon lávlumiin.
25 Buot olbmot leat geahččan
daidda háluin,
vaikko olmmoš geahčadage daid guhkkin.
26 Ipmil lea stuorit go mii áddet,
su jagit eai leat lohkamis.
27 Son čohkke čáhcegoaikkanasaid,
dat šollet Ipmila ájan,
28 balvvain dat golget ja goikot
buot olbmuid ala.
29 Gii sáhtášii áddet,
mo balvvat girdet almmis,
gii ipmirdivččii juma
mii boahtá Ipmila ássansajis?
30 Son lebbe čuovgga iežas birra,
son gokčá ábi ruohttasiid.
31 Nu son biebmá álbmogiid,
nu son addá sidjiide biepmu valjis.
32 Son gokčá gieđaidis álddagasaiguin,
son gohčču, ja dat mannet mearrebáikái.
33 Su čeargganas almmuha su boahtima,
velá oamitge ávaštit, go son lahkana.