1 Dás mu váibmu suorgana,
dat julká mu rattis.
2 Gullet su jiena juma,
gullet dan jura mii boahtá su njálmmis!
3 Son luoitá álddagasaidis
mannat miehtá almmi,
son vuolggaha daid
gitta eatnama ravddaide.
4 Daid maŋis gullo čeargun,
su gorges jietna jupmá.
Son ii seastte álddagasaidis,
ja su jietna jullá.
5 Ipmil dahká oavdudaguid
jubmi jienainis.
Son dahká stuorra daguid
maid mii eat ádde.
6 Son gohčču muohttaga gahččat,
ráššoarvvi šoallat eatnamii.
7 Son bisseha olbmuid barggu,
vai buohkat dovdet su daguid.
8 Meahcispiret mannet hoaluidasaset
ja bissot biejuineaset.
9 Ramadat vuolgá gámmáristtis
ja buolaš rájustis.
10 Ipmila vuoiŋŋanasas šaddá jiekŋa,
ja govda čázitge stirdot.
11 Son deavdá balvvaid lávttadasain,
balvvain vulget su álddagasat.
12 Dat johtet juohke guvlui
nu mo son dáhttu,
dat dahket buot maid son gohčču
miehtá eatnama jorbadasa.
13 Muhtumin son vuolggaha daid
bagadussan, muhtumin ávkin eatnamii.
14 Guldal dán, Job,
orus guorahallat Ipmila oavdduid!
15 Dieđátgo mo Ipmil bargá,
mo son diktá balvvaidis
álddagasaid šleađgut?
16 Áddetgo mo balvvat sattáhallet,
fihttetgo Buotdiehtti ovddolaš daguid?
17 Don gean biktasat báhkistit
liikki vuostá
go lullibiegga viessada eatnama,
18 dongo leat veahkehan su
lebbet gomuvuođa,
nannosa dego leikejuvvon speadjala?
19 Oahpat min!
Maid mii galgat vástidit sutnje?
Miihan leat seavdnjadis,
eat mii máhte sárdnut maidege.
20 Galgágo sutnje muitaluvvot
ahte mun dáhtun sárdnut suinna?
Gii sávašii šaddat duššaduvvot?
21 Ii oktage máhte geahččat beaivvážii
mii báitá šearradit,
go biegga lea ráidnen almmi.
22 Davvin boahtá gollečuovga,
suorggahahtti báitin birastahttá Ipmila.
23 Mii eat olat Buotveagalačča.
Su fápmu ja vuoiggalašvuohta lea stuoris
ja su vanhurskkisvuohta allat,
ii son áŧes ovttage.
24 Dan dihte olbmot ballet sus,
muhto viissástalliin son ii ane ávvira.