Hearrá vástida Jobii
1 Hearrá vástidii Jobii ramadaga siste:
2 Gii lea dát gii sevnnjodahttá
mu áigumuša jierpmehis sániidisguin?
3 Ráhkkan, bealuš iežat dego olmmái!
Mun jearan dál dus, ja don vástidat.
4 Gos ledjet dalle
go mun bidjen eatnama vuođđudusa?
Muital munnje, jos dieđát!
5 Gii mearridii eatnama mihtuid?
Almma don dan dieđát?
Gii njulgii mihttobátti dan badjel?
6 Gosa luitojuvvojedje dan vuođđobáccit?
Gii bijai sadjásis dan čiehkageađggi,
7 go buot guovssonásttit ávvudedje
ja ipmiliid bártnit čurvo ilus?
8 Gii dahpai uvssaid duohkái ábi,
go dat borššui eatniheakkas?
9 Mun adden dalle áhpái gárvun balvvaid,
giesaldahkan suhkkes mierkká.
10 Mun merkejin dasa ráji
ja bidjen dan ovdii poarttaid ja bummaid,
11 mun celken: “Dán rádjái,
muhto it guhkibuidda!
Dása cuovkanit du čeavlás bárut.”
12 Leatgo don oktiige gohččon iđida ovdan,
leatgo čájehan iđitguksui dan saji,
13 vai dat dohppe eatnama ravddaide
ja savdnjila eret ipmilmeahttumiid?
14 Dalle eanan rievdá dego láiri
masa deaddiluvvo seaila:
Buot loaiddasta ovdan dego ođđa gárvvuin.
15 Ipmilmeahttumiin váldojuvvo
sin čuovga,
gážžára giehta cuvkejuvvo.
16 Leatgo ollen ábi ádjagiidda,
leatgo vádjolan čiegus čiekŋalasaide?
17 Leatgo jápmima uvssat ihtán du oidnosii,
leatgo oaidnán jápminsuoivana poarttaid?
18 Ipmirdatgo eatnama viidodaga?
Muital áinnas, jos dovddat buot dan!
19 Gokko lea geaidnu čuovgasa vissui,
gos lea seavdnjadasa ássanbáiki?
20 Dongo lávet doalvut daid
dohko gosa dat gullet,
dongo dovddat bálgáid daid vissui?
21 Almma don daid dieđát,
almma don dalle juo ledjet riegádan,
donhan leat eallán nu guhká!
22 Leatgo leamaš
muohttaga vuorkágámmáriin,
leatgo oaidnán čuorbmasiid rájuid?
23 Daid mun lean seastán
áŧestusa áiggiid várás,
soađi ja dáistaleami beaivái.
24 Gos lea geaidnu dohko
gokko čuovga surggiida,
gos nuortabiegga leavvá miehtá eatnama?
25 Gii gohpá gura ráššoarvái,
gii rahpá luotta bajánii ja álddagassii?
26 Gii diktá arvit olbmohis eatnamii,
ávdin meahccái gos ii oktage ása?
27 Gii galleha ávdin guovllu čáziin,
nu ahte das rásit runiidit?
28 Gii lea arvvi áhčči?
Gii sahkanahttá suoldnegoaikkanasaid?
29 Guđe goaŧus šaddá jiekŋa,
gii riegádahttá almmi bizi,
30 go čázit gokčašuvvet
dego geađgelohki vuollái
ja čiekŋalasa bajildus stirdu?
31 Máhtátgo čuolbmadit
Nieidagihpu báttiid
dahje čoavdit Gállábártniid láhkkiid?
32 Dongo divttát eahketnástti
badjánit rivttes áigái,
dongo láidet Sarvaga ja dan misiid?
33 Dovddatgo almmi lágaid,
mearridatgo daid hearrávuođa
eatnama alde?
34 Veajátgo bajidit jienat balvvaid rádjái,
gohčutgo čázi valljugasvuođa
šávvat iežat badjel?
35 Máhtátgo vuolggahit álddagasaid,
nu ahte dat celket dutnje: “Dás mii leat!”
36 Gii lea bidjan viisodaga
dasa mii lea čihkosis,
gii lea addán jierpmi almmigáhppálagaide?
37 Gii máhttá lohkat balvvaid,
gii gurre almmi gáriid,
38 go eanan lea garas dego geađgi
ja muolda lea čoaltuluvvan?