Gi hjerteStøtt nettbibelen
Gå til forsiden

Job

42

Joba loahpahansánit

1 Dalle Job dajai Hearrái:

2 Mun dieđán ahte don veaját buot,

dutnje ii leat veadjemeahttun mihkkege

maid leat mearridan dahkat.


3 Don jerret:

“Gii leat dát gii sevnnjodahttá

mu áigumuša jierpmehis sániiguin?”

Mun dat lean.

Mun lean sárdnon áddekeahttá

áššiin main in dieđe maidege –

dat leat munnje menddo ovddolaččat.


4 Don celket: “Dál mun jearan,

ja don vástidat.”


5 Mun ledjen dušše gullan du beaggima,

muhto dál mu čalmmit leat oaidnán du.

6 Danne mun válddán ruoktot

buot ságaidan

ja gáđan gavjjaid ja gunaid siste.

Hearrá sánit Joba ustibiidda

7 Go Hearrá lei sárdnon Jobii, de son celkkii temanlaš Elifasii: “Mun lean moaráhuvvan dutnje ja du guovtti ustibii, danne go dii ehpet sárdnon mu birra duođa, nugo mu bálvaleaddji Job. 8 Váldet dál čieža vuovssá ja čieža viercca ja mannet mu bálvaleaddji Joba lusa ja oaffaruššet daid boaldinoaffarin iežadet ovddas. Mu bálvaleaddji Job rohkadallá din ovddas, ja mun gulan su rohkosa inge meannut dinguin din jallavuođa mielde, vaikko dii ehpet sárdnon mu birra duođa, nugo mu bálvaleaddji Job.”

9 Temanlaš Elifas, šuahlaš Bildad ja naamalaš Sofar dahke nugo Hearrá lei gohččon, ja Hearrá gulai Joba rohkosa. 10 Go Job lei rohkadallan ustibiiddis ovddas, de Hearrá jorgalii su vuorbbi ja attii sutnje guovtte geardái nu ollu go sus lei leamaš ovdal. 11 Buot Joba vieljat ja oappát ja buohkat geat ledje dovdan su juo ovdal, bohte su vissui ja boradedje suinna. Sii árpmoštalle ja jeđđejedje su buot dan lihkuhisvuođa dihte man Hearrá lei diktán deaividit su. Juohkehaš sis attii sutnje ovtta kesita ja gollesuorbmasa.

12 Hearrá buressivdnidii Joba maŋit beivviid vel eambbo go ovddibuid. Son oaččui njealljenuppelotduhát sávzza, guhttaduhát kamela, duhát vuoksápára ja duhát ásendámmá. 13 Son oaččui vel čieža bártni ja golbma nieidda. 14 Vuosttaš niidii son bijai namman Jemima, nubbái Kesia ja goalmmádiigis Keren Happuk. 15 Oppa eatnamis eai lean nu čáppa nissonat go Joba nieiddat. Sin áhčči attii sidjiide árbeoasi nugo sin vieljaidege. 16 Dáid dáhpáhusaid maŋŋil Job elii vel čuođinjealljelogi jagi, ja son beasai oaidnit mánáidis ja mánáidis mánáid njealját buolvva rádjái. 17 De Job jámii, boarisin ja beivviin gallánan.

Les vår personvernserklæring
Skjemaet er beskyttet av reCAPTCHA og Googles Privacy Policy og Terms of Service gjelder.