1 Čuorvvo fal!
Vástidago dutnje oktage?
Gii lea dat basiid gean beallái don jorgalat?
2 Suhttu duššada jalla,
moarri goddá jierpmeheami.
3 Mun oidnen jalla ruohtastuvvamin,
muhto fáhkkestaga garuhus čuzii su vissui,
4 su mánát eai lean veahkeheames,
sii cuvkejuvvojedje rievttis
iige oktage gádjon sin.
5 Nealgeolbmot borre su šattuid,
boibmo daid velá
bastilis biikkaid gaskkasge,
vuđgŋe vuovdát su opmodaga.
6 Ii lihkuhisvuohta bohcit muolddas,
iige váivi iđe eatnamis.
7 Olmmošhan ieš lea riegádan váivái,
nugo čuotnamat leat šaddan
girdit allagassii.
8 Ieš mun jorgalivččen Ipmila beallái
ja attášin áššán su gihtii.
9 Son dahká stuorra daguid
maid mii eat ipmir,
eambbo oavdduid go oktage máhttá lohkat.
10 Son addá arvvi eatnamii,
son golggaha čázi bealdduide.
11 Son alida váivvášiid,
morašteaddjit ožžot oadjebasvuođa.
12 Gávviliid juonaid son dahká duššin,
sin doaimmat eai lihkostuva.
13 Son giellá viisáid sin iežaset gávvilvuhtii,
gávviliid juonat gopmánit fáhkka.
14 Beaivet seavdnjatvuohta deaivida sin,
gaskabeaivvi sii rávjot dego ihkku.
15 Nu son gádju geafi
sin njuokčamiid miehkis,
gádju váivváša gievrras olbmo gieđas.
16 Dalle vártnuheapme oažžu doaivvu,
ja bahávuohta ferte jávohuvvat.
17 Ávdugas dat olmmoš
gean Ipmil cuiggoda!
Ale badjelgeahča
Buotveagalačča bagadusa!
18 Son hávvádahttá,
muhto maiddái čatná háviid,
su giehta časká,
muhto dat maid dálkkasta.
19 Guđa áŧestusas son gádju du,
čieža bahá eai čuoze dutnje.
20 Nealggi áigge son lonista du jápmimis,
soađi áiggi miehkis.
21 Njuokčama spihčá ii olat du,
itge don ballá go veahkaváldi boahtá.
22 Don boagustat veahkaválddi,
heavvaneami ja nealggi,
it don bala meahci beađuin,
23 dasgo dus lea lihttu
eatnama geđggiiguin,
ja don ealát ráfis meahcispiriiguin.
24 Don ealát ráfis goađistat,
go don geahčadat ássanbáikkát,
de it váillat maidege.
25 Don beasat oaidnit
ahte du sohka stuorru,
du nálli badjána dego rásit eatnamis.
26 Don manat hávdái olles agis,
nugo gordnegihput
čohkkejuvvojit rivttes áigái.
27 Dán mii leat gávnnahan, ja ná dat lea.
Gula ja ipmir donnai!