Job vástida Elifasii
1 De Job sártnui:
2 Vare mu moraš vihkkejuvvošii,
mu lihkuhisvuohta
biddjojuvvošii veavtta ala!
3 Dál dat lea losit go meara sáddot,
danne mun sártnun jurdilkeahttá.
4 Buotveagalačča njuolat
leat deaivan munnje,
daid mirko njammasa mu sillui,
Ipmil diktá balddáhusaidis fallehit mu.
5 Iihan meahcceásen bárggo ruonas gittiin,
vuoksá ii muola go dan ovddas lea fuođar.
6 Muhto gii borašii veahtta biepmu
almmá sálttiid haga,
gii muosáhivččii njivllaurtasa?
7 Maid šattan njiellat, gákkaha váimmu,
dat lea šaddan munnje
lusttuhis borramuššan.
8 Vare mu rohkadus devdošii,
vare Ipmil ollašuhtášii mu doaivaga!
9 Vare son mieđašii cuvket mu,
loktešii gieđa ja čuohpašii gaskat
mu eallima láiggi!
10 Dat livččii dattetge mu jeđđehus
go fieradan garra bákčasiin,
ahte in leat čiehkan dan
maid Bassi lea cealkán.
11 Leago mus fápmu
mii attášii munnje doaivvu,
dakkár ulbmil man veagas mun gierddan?
12 Leago mu fápmu dego geađggi fápmu,
leago mu rumaš nugo bronsa?
13 Almma mus ii leat šat doaivu,
buot mu geainnut leat dahppojuvvon.
14 Dat gii beahttá lagamuččas heađis,
lea heaitán ballamis Buotveagalaččas.
15 Mu vieljat leat behtolaččat
dego jogaš,
nugo johkaroggi gos čáhci jávká.
16 Suddi jiekŋa čáhpodahttá jogaža
ja muohta seahkana dan čáhcái,
17 muhto goikkádahkan dat jaskkoda,
báhkkan dan čáhci goiká.
18 Karavánat mátkkoštit johkarokkiid,
mannet ávdin meahccái ja duššet.
19 Tema karavánat gehččet dan guvlui,
Saba gávpeolbmát bidjet doaivvuset dasa.
20 Muhto go sii ollejit dan gáddái,
de sii beahtahallet: Čáhci ii leat.
21 Dakkáražžan dii lehpet šaddan munnje;
go dii oinniidet balddáhusa,
de dii balláidet.
22 Leango mun dáhtton dis maidege,
leango bivdán din oastit iežan friddjan?
23 Leango čurvon:
“Gádjot mu vašálačča válddis,
čovdet mu veahkaválddálačča gieđas!”
24 Oahpahehket mu, de mun orun jávohaga,
čilgejehket munnje gokko mun lean čádjidan.
25 Lossathan lea gullat duohtavuođa,
muhto man áššis dii áigubehtet
bagadit mu?
26 Áigubehtetgo dii bagadit mu das
maid lean cealkán,
dahkat duššin dorvvuhuvvan olbmá sániid?
27 Dii vuorbádehpet oarbbes mánáid,
dii gávpalehpet ustibiiddádet.
28 Gehččet dal munnje:
Gielistango mun din čalbmehálgui?
29 Jurddašehket,
allet divtte vearrivuođa dáhpáhuvvat!
Jurddašehket!
Mun lean dattetge sivaheapme.
30 Leago mu njuokčamis vearrivuohta?
Iigo mu guopmi
dovddaše bahávuođa smáhka?