1 Olbmo oassi eatnama alde lea rahčan,
su beaivvit leat dego
beaivebálkkolačča beaivvit.
2 Son lea dego šlávva
gii áibbaša suoivanii,
dego beaivebálkkolaš gii vuordá bálkkás.
3 Nu šadde vártnuhisvuođa mánut
mu vuorbin,
gillámuša ijat mu oassin.
4 Go mun veallánan, de mun jurddašan:
“Iigo juo fargga leat lihkkanáigi?”
Idja lea guhkki,
ja mun mállagušan
gitta iđedisgukso rádjái.
5 Máđut ja ruoppit gokčet mu rupmaša,
mu hávit irdašuvvet ja sidjot.
6 Mu beaivvit mannet johtileappot
go gođđi suhkkol,
dat nohket doaivvuhisvuhtii.
7 Muitte ahte mu eallin
lea dušše vuoiŋŋanas,
mun in goassege šat muosát lihku.
8 Dat gii oaidná mu dál,
ii oainne mu šat goassege,
go son geahčasta mu beallái,
de mun lean jávkan.
9 Balva bieđgana ja jávká.
Dat gii manná jábmiidáibmui,
ii šat máhca.
10 Ii son šat goassege boađe ruoktot,
su báiki ii šat dovdda su.
11 Dan dihte mun in doalat sániidan,
mun sártnun vuoigŋan áŧestusas,
váidalan bahča bákčasiin.
12 Leango mun áhpi dahje ábi guovdi,
go don bijat munnje fávtta?
13 Go mun jurddašan:
“Seaŋga lea mu jeđđehus,
mu oađđinsadji geahpeda mu morraša,”
14 dalle don suorggahat mu nieguiguin,
balddát mu oainnáhusaiguin.
15 Mun anán buorebun hávkat.
Mun jámášin ovdal go gillát dáid gibuid.
16 Mun sonan, in mun eale agálaččat.
Divtte mu leat ráfis,
mu beaivvit leat dego hieibma.
17 Mii lea olmmoš,
go don anát su nu dehálažžan
ja gozihat su álelassii,
18 dutkkat su juohke iđida
ja dárkot su juohke čalbmeravkalanbotta?
19 Geahčas eará guvlui ja divtte mu orrut,
vai mun bállen njielastit iežan čolgga.
20 Jos mun leange suddudan,
de maid mun lean dahkan dainna dutnje,
olbmuid goziheaddji?
Manne don leat dahkan mu
fallehemiidat moallan?
Manne mun lean šaddan dutnje noađđin?
21 Manne don it atte mu suttuid ándagassii
itge divtte mu suttuid jávkat?
Fargga mun veallánan muldii;
jos ozat mu, de mun in šat leat.