Bildad sárdnu vuosttaš háve
1 De šuahlaš Bildad sárdnugođii:
2 Man guhká don sártnut diekkáraččaid?
Du sánithan leat dego garra biegga.
3 Botnjágo Ipmil vuoigatvuođa?
Botnjágo Buotveagalaš rievtti?
4 Jos du mánát suddudedje su vuostá,
de sii šadde gillát rihkkumiiddiset dihte.
5 Muhto jos don ieš ozat Ipmila,
jos ánut Buotveagalaččas árpmu
6 ja leat buhtis ja vuoiggalaš,
de son gal veahkeha du,
ja don oaččut fas dan
mii dutnje rievttuid gullá,
7 ja du ovddit dilli lea headju dan ektui
maid vel oaččut.
8 Jeara dain geat ledje ovdal min,
váldde vuhtii maid min áhčit gávnnahedje.
9 Miihan leat ievttáža mánát
eat dieđe maidege,
min beaivvit eatnama alde
leat dego suoivvan.
10 Muhto min áhčit oahpahit du
ja sárdnot dutnje,
sii muitalit dutnje iežaset dieđu.
11 Šaddágo papyrus allagin
doppe gos ii leat suotnju,
guhkkugo lukti almmá čázi haga?
12 Dathan goiká ovdal buot eará rásiid,
dallán go lea ihtán,
ovdal go dan sáhttá čuohppat.
13 Nu geavvá buohkaide
geat vajáldahttet Ipmila.
Ipmilmeahttuma doaivu duššá.
14 Son dorvvasta seakka árpui,
son ohcá oadjebasvuođa heavnnifierpmis.
15 Jos son mieigá dan njeaiga,
de son gahččá,
jos son doallá das gitta, de son jorrala.
16 Son ceaggá beaivvadagas
dego lastás muorra man oavssit
leabbanit miehtá gilvvagárddi,
17 man ruohttasat šaddet juvvii
ja bahkkejit geđggiid gaskii.
18 Muhto go son gaikkihuvvo eret,
de sadji gos son šattai,
biehttala su ja dadjá:
“Mun in leat goassege oaidnán su.”
19 Dies lei su illu,
ja earrásat bohciidit muolddas.
20 Ipmil ii hilggo láitemeahttuma,
ii son doarjjo bahás olbmuid.
21 Ohpit son diktá du boagustit,,
diktá du illudit ja ávvudit.
22 Du vašuheddjiide gárvvuhuvvo heahpat,
iige ipmilmeahttumiid goahti šat leat.