Jååvna Åejvien luvhtie ræpma
1 Åejvien baakoeh Jonese, Amittajen alkan, böötin: 2 «Tjuedtjelh, vaedtsieh stoere staarese, Ninivese, jïh tjåarvoeh dej bahhasvoete mov ååredæjjan uvte båateme.» 3 Dellie Jååvna tjuedtjieli edtji Tarsisasse Åejvien luvhtie rïpmedh. Jaffese vöölki jïh vïnhtsem vööjni mij Tarsisasse edtji vuelkedh. Vuelkemen åvteste meeksi jïh vïnhtsese veedtsi Tarsisasse vuelkedh Åejvien luvhtie.
4 Dellie Åejvie værtoem mearose seedti, jïh værtoe dan veaksehke guktie vïnhtse mahte mårhkani. 5 Dellie mearoe-almetjh bïllijin, jïh fïereguhte jïjtse jupmielasse tjåarvoeji. Laares vïnhtseste döömin olles vïnhtse mårhkenh. Mohte Jååvna våålese vïnhtsen sïjse vualkeme åarajidh. Dïsse nahkestamme. 6 Vïnhtsen åvtehke Jååvnan gåajkoe bööti jïh jeehti: «Mij datnine? Nahkestamme? Tjuedtjelh jïh tjåarvoeh dov jupmielasse! Mejtie jupmele mijjem måjhtije guktie ibie båtnenh.»
7 Dellie gaarmanæjjah sinsætnan jiehtieh: «Våarpoehtibie vuejnedh gïen gielhtie daate mïrhtoe mijjem låavteme!» Våarpoehtieh jïh dellie vuejnieh Jååvnan skåltoe lea. 8 Dellie jiehtieh: «Soptsesth dellie gïen skåltoe juktie mïrhtoe mijjem låavteme! Mij dov barkoe? Gubpede datne båatah? Gusnie dov dajve? Gïeh dov almetjh?» 9 Jååvna vaestede: «Hebreladtje leam jïh manne Åejvien luvhtie rïpmeminie, elmien Jupmelen luvhtie gie mearoem jïh gejhkie laantem sjugniedamme.»
10 Dellie gaarmanæjjah asvedieh. Jonese jiehtieh: «Maam datne dorjeme?» Daejrieh gujht Jååvna Åejvien luvhtie rïpmeme. Jååvna dam joe soptsestamme. 11 «Maam edtjebe datnine darjodh guktie mearoe laagna?» gihtjieh. Værtoe garrebe garrebe sjædta. 12 Jååvna vaestede: «Lutnjestidie jïh hajkedidie mannem mearose! Dellie værtoe orrije jïh måeriem luajhta. Daajram værtoe mov gielhtie dijjem låavteme.»
13 Gaarmanæjjah sovkin edtjin gaadtan jaksedh. Idtjin daajedh juktie værtoe sagke veaksahkåbpoe sjïdteme. 14 Dellie Åajvan tjåarvoejin: « Åejvie! Aellieh baajh mijjem båtnanidh doen faajkes ålman gielhtie. Aellieh baajh skåltohts vïrrem mijjese galkedh. Juktie datne, Åejvie dorjeme guktie datne sïjhtih.»
15 Jååvnam mearose beelhkin, jïh dellie löödtji. 16 Dellie gaarmanæjjah Åejveste asvedin. Niesties-sjïelem Åajvan sjïeledin jïh dåajvoehtin.