Soahti Meroma čáhcegáttis
1 Go Jabin, Hasora gonagas, gulai israellaččaid vuoittuid, de son vuolggahii sága Madona gonagassii Jobabii, Šimrona ja Akšafa gonagasaide 2 ja daidda gonagasaide geat ráđđejedje várreeatnamis davvin, Kinnereta lulábeale meahcis, Šefelas ja Dora alážiin oarjin. 3 Son vuolggahii sága maiddái kanaanlaččaide geat ásse nuortan ja oarjin, várreeatnama amorlaččaide, hetlaččaide, perisselaččaide ja jebuslaččaide ja vel hivvelaččaide geat ásse Hermonvári vuolde Mispa guovllus. 4 Gonagasat vulge johtui buot soahteveagaideasetguin main lei olmmoš nu eatnat dego sáttočalmmit mearragáttis. Maiddái heasttat ja soahtevovnnat ledje hui ollu. 5 Buot dát gonagasat manne oktan joavkun Meroma čáhcegáddái ja dahke dohko soahtesiidda, vai besset soahtat Israeliin.
6 Hearrá celkkii Josuai: “Ale bala sis! Ihttin dáid muttuid mun divttán sin buohkaid gottáhallat israellaččaide. Don čuohpat sin heasttaid čeavžesuonaid ja boalddát sin soahtevovnnaid.” 7 Josua fallehii soahteveagainis heahkka sin soahtesiidda mii lei Meroma čáhcegáttis, 8 ja Hearrá attii sin israellaččaid gihtii. Israellaččat časke sin bieđgguid ja doarridedje sin stuorra Sidonii, Misrefot-Majimii ja nuortan gitta Mispaleagi rádjái. Sii godde báhtareddjiid eaige diktán ovttage eallit. 9 Josua dagai nugo Hearrá lei cealkán; son čuohpai sin heasttaid čeavžesuonaid ja bolddii sin soahtevovnnaid.
10 Dasto Josua jorgalii ruoktot. Son válddii Hasora mii dovle lei veagaleamos buot dan guovllu gávpotriikkain, ja gottii dan gonagasa. 11 Israellaččat vihahedje Hasora duššadeapmái ja godde buot dan heakkalaččaid. Sii eai guođđán doppe ovttage heggii, ja Hasora gávpoga Josua bolddii. 12 Son válddii maid buot eará gávpogiid ja daid gonagasaid, vihahii sin ja sin gávpogiid duššadeapmái ja gottii buot olbmuid, nugo Moses, Hearrá bálvaleaddji, lei gohččon. 13 Muhto israellaččat eai boaldán ovttage dain gávpogiin mat ledje dieváin; dušše Hasora Josua bolddii. 14 Israellaččat válde alcceseaset dáin gávpogiin buot sállaša ja buot omiid, muhto olbmuid sii godde, dassážii go ledje duššadan buohkaid. Sii eai guođđán ovttage heggii.
15 Dan gohččuma Hearrá lei addán bálvaleaddjásis Mosesii, ja Moses lei addán dán gohččuma Josuai gii ollašuhtii buot gohččumiid maid Hearrá lei addán Mosesii.
Israellaččat ráđđejit oppa eatnama
16 Josua válddii oppa eatnama: Várreeatnama ja oppa Negeva, Gošena guovllu, Šefela ja Jordanleagi, Israela várreeatnama ja vuollegis eatnama. 17 Son válddii dan guovllu mii Halakvári rájes ollá Seira guvlui ja gitta Baal-Gada rádjái Libanonleahkái Hermonvári vuollái. Buot dáid guovlluid gonagasaid son válddii fáŋgan ja gottii. 18 Josua soađai guhká daid gonagasaiguin. 19 Ii oktage gávpot dahkan ráfi israellaččaiguin, earret hivvelaččaid Gibeona. Buot eará gávpogiid israellaččat válde soahtamiin. 20 Hearrá lei buoššudan vašálaččaid váimmu ja ožžon sin soahtat Israeliin, vai sii árpmitkeahttá vihahuvvošedje duššadeapmái ja heavahuvvošedje dan gohččuma mielde maid Hearrá lei addán Mosesii.
21 Daid áiggiid Josua duššadii anaklaččaid várreeatnamis, Hebronis, Debiris, Anabis ja juohke bealde Juda ja Israela várreeatnamiin, ja vihahii sin ja sin gávpogiid duššadeapmái. 22 Israellaččaid eatnamii ii báhcán oktage anaklaš, duššefal Gazai, Gatii ja Ašdodii báhce soapmásat.
23 Josua válddii oppa eatnama, aiddo nugo Hearrá lei sárdnon Mosesii. Son attii dan opmodahkan Israelii, guđege čerdii dan iežas oasi.
Dáid sođiid maŋŋil eatnamis lei ráfi.