Efraima ja Manasse eatnamat
1 Josefa nálli oaččui vuorbádeamis eatnama Jordangáttis Jeriko lahka, dan meahcis mii lea Jeriko ádjagiid nuorttabealde. Jerikos rádji manná váriid mielde Betelii. 2 Betelis dat manná Lusii ja doppe arkilaččaid eatnamii Atarotii, 3 gos dat njiedjá oarjjás jafletlaččaid eatnamii Vuolit Bet-Horona guovllu rádjái ja de Geserii ja dasto merrii.
4 Dán guovllu oaččuiga opmodahkan Josefa bártnit Manasse ja Efraim. 5 Efraima čeardda sogat ožžo opmodahkan dán guovllu: Sin opmodaga rádji vuolgá Atrot Addaris nuortan ja manná Bajit Bet-Horonii 6 ja dasto merrii. Davvin rádji gávvá Mikmetatis nuorttas Taanat-Šiloi ja doppe nuorttas Janoahii. 7 Janoahis rádji njiedjá Atarotii ja Naarai, manná de Jerikoi ja dasto Jordanii. 8 Tappuahis rádji manná oarjjás Kanajogažii ja dasto merrii. Dát lea dat opmodat mii bođii Efraima čeardda sogaide. 9 Dasa lassin dat ožžo vel buot daid gávpogiid ja daid birasbáikkiid mat sirrejuvvojedje sidjiide Manasse čeardda eatnama siste. 10 Muhto efraimlaččat eai duššadan kanaanlaččaid geat ásse Geseris. Ain otná beaivvige kanaanlaččat ásset efraimlaččaid gaskkas, muhto sii gártet bargat bággobarggu.