Josua

Levilaččaid gávpogat

¹ Levilaččaid bearašoaivámuččat bohte Kanaana Šiloi báhppa Elasara ja Josua, Nuna bártni, ja Israela eará čearddaid bearašoaivámuččaid ságaide ² ja dadje sidjiide: “Hearrá gohčui Mosesa bokte ahte midjiide galget addojuvvot gávpogat ássanbáikin ja guohtuneatnamat min omiid várás.” ³ Israellaččat adde iežaset guovlluin levilaččaide gávpogiid oktan daid guohtuneatnamiiguin, nugo Hearrá lei gohččon. ⁴ Vuorbádeamis vuosttaš vuorbi gahčai kehatlaččaid sogaide. Daidda levilaččaide geat nállašuvve báhppa Aronis, vuorbáduvvojedje golbmanuppelohkái gávpoga Juda, Simeona ja Benjamina čearddaid guovlluin. ⁵ Eará kehatlaččaid sogaide vuorbáduvvojedje logi gávpoga Efraima ja Dana čearddaid ja Manasse čeardabeale guovlluin. ⁶ Geršonlaččaid sogaide vuorbáduvvojedje golbmanuppelohkái gávpoga Isaskara, Ašera ja Naftali čearddaid guovlluin ja Manasse čeardabeale guovllus Bašanis. ⁷ Merarilaččaid sogaide vuorbáduvvojedje guoktenuppelohkái gávpoga Rubena, Gada ja Sebulona čearddaid guovlluin. ⁸ Daid gávpogiid ja guohtuneatnamiid daid birra israellaččat vuorbádedje levilaččaide, nugo Hearrá lei gohččon Mosesa bokte.

⁹ Juda ja Simeona čearddaid guovlluin addojuvvojedje čuovvovaš gávpogat. ¹⁰ Dat addojuvvojedje daidda levilaččaide geat leat Arona bártni Kehata nális, dasgo vuosttaš vuorbi gahčai sidjiide. ¹¹ Sidjiide addojuvvui Juda várreeatnamis anaklaččaid máttu Arba gávpot Kirjat-Arba dahjege Hebron oktan guohtuneatnamiinnis. ¹² Gávpoga bealddut ja birasbáikkit ledje addojuvvon opmodahkan Kalebii, Jefunne bárdnái. ¹³ Báhppa Arona nállái addojuvvojedje Juda ja Simeona čearddaid guovlluin nappo Hebron, dorvogávpot, Libna, ¹⁴ Jattir, Eštemoa, ¹⁵ Holon, Debir, ¹⁶ Ašan, Bet-Šemeš, ovcci gávpoga oktan guohtuneatnamiiddisetguin. ¹⁷ Benjamina čeardda guovllus sidjiide addojuvvojedje Gibeon, Geba, ¹⁸ Anatot ja Almon, njeallje gávpoga oktan guohtuneatnamiiddisetguin. ¹⁹ Arona soga báhpain ledje buohkanassii golbmanuppelohkái gávpoga oktan guohtuneatnamiiddisetguin.

²⁰ Eará kehatlaččaid sogaid levilaččat ožžo vuorbádemiin gávpogiid Efraima čeardda guovllus. ²¹ Efraima várreeatnamis sidjiide addojuvvojedje Sikem, dorvogávpot, Geser, ²² Kibsajim ja Bet-Horon, njeallje gávpoga oktan guohtuneatnamiiddisetguin. ²³ Dana čeardda guovllus sidjiide addojuvvojedje Elteke, Gibbeton, ²⁴ Ajalon ja Gat-Rimmon, njeallje gávpoga oktan guohtuneatnamiiddisetguin. ²⁵ Manasse čeardabeale guovllus sidjiide addojuvvojedje Taanak ja Jibleam, guokte gávpoga oktan guohtuneatnamiiddisetguin. ²⁶ Dát kehatlaččaid sogat ožžo oktiibuot logi gávpoga oktan guohtuneatnamiiddisetguin.

²⁷ Daidda levilaččaid sogaide mat nállašuvvet Geršonis, addojuvvojedje Manasse čeardabeale guovllus Bašanis Golan, dorvogávpot, ja Aštarot, guokte gávpoga oktan guohtuneatnamiiddisetguin. ²⁸ Isaskara čeardda guovllus sidjiide addojuvvojedje Kišon, Daberat, ²⁹ Jarmut ja En-Gannim, njeallje gávpoga oktan guohtuneatnamiiddisetguin. ³⁰ Ašera čeardda guovllus sidjiide addojuvvojedje Mišal, Abdon, ³¹ Helkat ja Rehob, njeallje gávpoga oktan guohtuneatnamiiddisetguin. ³² Naftali čeardda guovllus sidjiide addojuvvojedje Galileas Kedeš, dorvogávpot, Hammot-Dor ja Kartan, golbma gávpoga oktan guohtuneatnamiiddisetguin. ³³ Geršonlaččaid sogaide addojuvvojedje oktiibuot golbmanuppelohkái gávpoga oktan guohtuneatnamiiddisetguin.

³⁴ Daidda levilaččaide geat nállašuvvet Meraris, addojuvvojedje Sebulona čeardda guovllus Jokneam, Karta, ³⁵ Rimmona ja Nahalal, njeallje gávpoga oktan guohtuneatnamiiddisetguin. ³⁶ Jordana don bealde, Jeriko nuorttabealde, sidjiide addojuvvojedje Rubena čeardda guovllus Beser, dorvogávpot, mii lei alážis meahcis, Jahas, ³⁷ Kedemot ja Mefaat, njeallje gávpoga oktan guohtuneatnamiiddisetguin. ³⁸ Gada čeardda guovllus Gileadis sidjiide addojuvvojedje Ramot, dorvogávpot, Mahanajim, ³⁹ Hešbon ja Jaser, njeallje gávpoga oktan guohtuneatnamiiddisetguin. ⁴⁰ Oktiibuot merarilaččaid sogat ožžo vuorbádemiin guoktenuppelohkái gávpoga. ⁴¹ Buot levilaččat ožžo Israela čearddaid guovlluin oktiibuot njealljelogigávcci gávpoga oktan guohtuneatnamiiddisetguin. ⁴² Guđege gávpogii gulle guohtuneatnamat mat ledje dan birra.

⁴³ Ná Hearrá attii israellaččaide oppa dan eatnama maid son lei váliin lohpidan sin áhčiide áigut addit, ja sii válde eatnama ja ásse dohko. ⁴⁴ Hearrá divttii sin eallit ráfis juohke sajis, nugo son lei vurdnon sin áhčiide. Ii oktage sin vašálaččain bihtán sis, muhto Hearrá attii daid buohkaid sin gihtii. ⁴⁵ Ii mihkkege buot dain buriin maid Hearrá lei lohpidan Israela álbmogii, šaddan duššin. Buot lohpádusat ollašuvve.