Lihttu nannejuvvo Sikemis
1 Josua čohkkii buot Israela čearddaid Sikemii ja rávkkai lusas Israela vuorrasiid, oaivámuččaid, duopmáriid ja hoavddaid. Doppe sii loaiddastedje Ipmila ovdii. 2 Josua dajai álbmogii: “Ná cealká Hearrá, Israela Ipmil: Dolin din áhčit ásse don bealde Eufrateanu, ja sii bálvaledje eará ipmiliid. Okta din áhčiin lei Terah, Abrahama ja Nahora áhčči. 3 Muhto mun bukten din áhči Abrahama don bealde Eufrata ja dikten su vádjolit miehtá oppa Kanaana. Mun dahken su náli eatnagin. Mun adden sutnje Isaka, 4 ja Isakii mun adden Jakoba ja Esau. Esau oapmin mun adden Seira várreeatnama, muhto Jakob ja su bártnit fárrejedje Egyptii. 5 Mun vuolggahin Mosesa ja Arona, mun časken Egypta givssiiguin ja bukten din doppe eret. 6 Go mun bukten din áhčiid Egyptas, ja dii leiddet boahtán Ruksesmeara gáddái, de egyptalaččat doarridedje din áhčiid heasttaideasetguin ja soahtevovnnaideasetguin gitta meara rádjái. 7 Dalle din áhčit čurvo Hearrái, ja son bijai seavdnjadasa din ja egyptalaččaid gaskii ja divttii meara heavahit sin. Dii oinniidet iežadet čalmmiiguin maid mun dahken egyptalaččaide. Dasto dii oruidet meahcis guhkes áiggi. 8 Doppe mun bukten din amorlaččaid eatnamii Jordana nuorttabeallái. Amorlaččat soahttájedje dinguin, muhto mun adden sin din gihtii. Dii válddiidet sin eatnama, ja mun duššadin sin din ovddas. 9 Dasto Moaba gonagas Balak, Sippora bárdni, soahttái Israeliin ja rávkkai Bileama, Beora bártni, garuhit din. 10 Muhto mun in dáhtton gullat Bileama, ja son šattai buressivdnidit din. Nu mun gádjon din Balaka gieđas. 11 Go dii leiddet rasttildan Jordana ja boahtán Jeriko lahka, de dan ássit sohte dinguin, nu maiddái amorlaččat, perisselaččat, kanaanlaččat, hetlaččat, girgašlaččat, hivvelaččat ja jebuslaččat, muhto mun adden sin din gihtii. 12 Mun vuolggahin hirpma din ovdal, ja dat ájii dan guokte amorlaš gonagasa din ovddas eret; ii din miehkki iige din juoksa dan dahkan. 13 Mun adden didjiide eatnama maid dii ehpet lean njáskan, gávpogiid maid ehpet ieža lean huksen, ja dii beasaidet ássat daidda. Mun adden didjiide viidnegárddiid ja oliivagárddiid maid ehpet ieža lean gilván, muhto maid šaddosiid dii beassabehtet borrat.
14 De ballet dal Hearrás ja bálvalehket su láitemeahttumit ja oskkáldasat. Jávkadehket ipmiliid maid din áhčit bálvaledje don bealde Eufrata ja Egyptas, ja bálvalehket Hearrá. 15 Jos dii ehpet dáhto bálvalit Hearrá, de válljejehket otná beaivvi gean bálvalit: Dáhttubehtetgo bálvalit daid ipmiliid maid din áhčit bálvaledje don bealde Eufrata, vai amorlaččaid ipmiliid, daid amorlaččaid geaid eatnamis dii dál ássabehtet. Mun ja mu bearaš bálvalit Hearrá.”
16 Dalle álbmot vástidii: “Mii eat goassege hilggo Hearrá eatge bálval eará ipmiliid! 17 Hearrá lea min Ipmil, son buvttii min ja min áhčiid Egyptas, šlávvaviesus, son dagai buot daid stuorra mearkkaid min oaidnut. Son várjalii min mátkkis, go mii manaimet eará álbmogiid eatnamiid čađa. 18 Hearrá ájii min ovddas buot álbmogiid mat ásse dán eatnamis, maiddái amorlaččaid. Mii dáhttut bálvalit Hearrá. Son lea min Ipmil.”
19 Dalle Josua dajai álbmogii: “Ehpet dii veaje bálvalit Hearrá! Son lea bassi Ipmil, áŋgiris Ipmil gii ii atte ándagassii din rihkkumiid iige suttuid. 20 Jos dii hilgubehtet Hearrá ja bálvališgoahtibehtet vieris ipmiliid, de son jorgala dis eret ja diktá lihkuhisvuođa deaividit din ja duššada din, vaikko son ovdal lea leamaš didjiide buorre.” 21 Álbmot vástidii Josuai: “Hearrá mii dáhttut bálvalit!” 22 Josua dajai álbmogii: “Dii lehpet dál válljen Hearrá ja dáhttubehtet bálvalit su. Dii lehpet ieža dan duođašteaddjit.” Israellaččat vástidedje: “Mii leat duođašteaddjit.” 23 Josua dajai: “Hilgot dál vieris ipmiliiddádet ja sojahehket váimmodet Hearrá, Israela Ipmila, beallái.” 24 Álbmot dajai Josuai: “Mii dáhttut bálvalit Hearrá, Ipmileamet, su mii dáhttut jeagadit.”
25 Dan beaivvi Josua nannii Sikemis álbmoga beales lihtu ja gulahii sidjiide lihtu lágaid ja vuoigatvuođaid. 26 Son čálii daid visot Ipmila láhkagirjái. De son válddii stuorra geađggi ja ceggii dan terebintta vuollái mii lei Hearrá bassibáikkis. 27 De Josua dajai álbmogii: “Dát geađgi lea duođašteaddji, dasgo dat lea gullan buot maid Hearrá lea sárdnon midjiide. Dat lea duođašteaddji, vai dii ehpet biehttalivčče Ipmileattet.” 28 Dasto Josua luittii álbmoga mannat, iešguđege ruktosis iežas eatnamii.
29 Muhtin áiggi geažes daid dáhpáhusaid maŋŋil Josua, Nuna bárdni, Hearrá bálvaleaddji, jámii čuođilogi jagi boarisin. 30 Son hávdáduvvui iežas eatnamii Timnat-Serahii, mii lea Efraima várreeatnamis Gaašvári davvelis. 31 Israel bálvalii Hearrá nu guhká go Josua elii ja maŋŋilge, nu guhká go ain ledje eallimin dat vuorrasat geat ledje oaidnán buot daid stuorra daguid maid Hearrá lei dahkan Israelii.
32 Josefa dávttit maid israellaččat ledje buktán Egyptas, hávdáduvvojedje Sikemii, dan eananbihttái maid Jakob lei oastán čuđiin kesitain Hamora, Sikema áhči, bártniin, ja maid Josefa nálli lei ožžon opmodahkan.
33 Maiddái Elasar, Arona bárdni, jámii. Son hávdáduvvui Gibeai, dan gávpogii maid su bárdni Pinehas lei ožžon Efraima várreeatnamis.