Josua

Israellaččat váldet ja duššadit Aja

¹ Hearrá celkkii Josuai: “Ale bala alege arvvahuva! Váldde mielddát oppa soahteveaga ja vuolgge Ajii. Mun attán du gihtii Aja gonagasa, su álbmoga ja gávpoga ja oppa su eatnama. ² Don galggat dahkat Ajii ja dan gonagassii nugo dahket Jerikoi ja dan gonagassii, muhto sállaša ja omiid dii oažžubehtet goitge váldit. Bija olbmáid beitosii gávpoga nuppe beallái.”

³ Josua vulggii oppa soahteveagainis Aja guvlui. Son válljii golbmalogiduhát roahkkadis soahteolbmá ja vuolggahii sin mátkái ihkku. ⁴ Son gohčui sin: “Dii galgabehtet orrut beitosis gávpoga nuppe bealde. Allet mana beare guhkás gávpogis, muhto lehket buohkat gergosat. ⁵ Mun ja oppa veahka mii lea muinna, lahkonit gávpogii. Go Aja olbmát vulget soahtat minguin nugo ovddit hávege, de mii mahkáš báhtarit sis. ⁶ Sii vulget doarridit min, ja nu mii hohkahit sin olggos gávpogis. Sii oainnat gáddet ahte mii báhtarit sis nugo ovddit hávege. Go mii leat báhtareamen sis, ⁷ de dii galgabehtet čuožžilit beitosis ja váldit gávpoga. Hearrá, din Ipmil, addá dan din gihtii. ⁸ Go dii lehpet váldán gávpoga, de galgabehtet buolláhit dan. Dahket nugo Hearrá lea cealkán. Mun gohčun din ná.” ⁹ Josua vuolggahii olbmáid mátkái, ja sii manne beitosii Aja gávpoga oarjjabeallái, Betela ja Aja gaskii. Josua orui dan ija soahteveaga luhtte.

¹⁰ Árrat iđedis Josua geahčadii soahteveagas. Son ja Israela vuorrasat vulge soahteveaga njunnošis Aja guvlui. ¹¹ Go soahteveahka mii lei suinna lei joavdan gávpoga lahka, de sii dahke soahtesiidda Aja davábeallái, ja sin ja Aja gaskkas lei leahki. ¹² Josua bijai sullii vihttaduhát olbmá beitosii gávpoga oarjjabeallái, Betela ja Aja gaskii. ¹³ Soahteveahka lei dál gearggus soahtat, váldojoavku gávpoga davábealde ja uhcit joavku gávpoga oarjjabealde. Josua orui dan ija leagis. ¹⁴ Go Aja gonagas iđđedis oinnii israellaččaid, de son vulggii dalán oppa soahteveagainis mearrebáikái meahci guvlui soahtat Israeliin, muhto son ii diehtán ahte gávpoga duohken ledje israellaččat beitosis. ¹⁵ Josua ja israellaččat geassádedje ja báhtaredje meahci guvlui. ¹⁶ Dalle buot gávpoga olbmot gohččojuvvojedje doarridit Josua, ja sii gessojuvvojedje olggos gávpogis. ¹⁷ Ii oktage olmmái báhcán Ajii, muhto buohkat vulge israellaččaid maŋŋái. Sii guđđe gávpoga rabasin ja doarridišgohte Israela.

¹⁸ Hearrá celkkii Josuai: “Geige Aja guvlui sábela mii dus lea gieđas. Mun attán gávpoga du gihtii.” Josua dagai nu. ¹⁹ Go dat olbmát geat ledje beitosis oidne Josua geigemin gieđa, de sii čuožžiledje hoahpus čiehkádansajisteaset, fallehedje gávpoga, válde dan ja buolláhedje dan hoahpus. ²⁰ Go Aja olbmát jorggihedje, de sii oidne suova badjáneamen gávpogis almmi guvlui. Muhto sii eai sáhttán báhtarit eai duohko eaige deike, danin go dat soahteveahka mii lei báhtaran meahci guvlui, jorggihii doarrideddjiid vuostá. ²¹ Josua ja israellaččat ledje oaidnán ahte dat olbmát geat ledje leamaš beitosis, ledje váldán gávpoga ja ahte doppe badjánii suovva, ja dalle sii jorggihedje ja fallehedje Aja olbmáid. ²² Ja seammás dot geat ledje váldán gávpoga, fallehedje maid sin, ja nu Aja olbmát báhce guovtti israellaččaid joavkku gaskii. Israellaččat fallehedje sin ovddabealde ja maŋábealde ja časke sin, nu ahte ii oktage sis beassan báhtarussii iige báhcán heggii. ²³ Muhto Aja gonagasa sii dohppejedje eallinaga ja bukte Josua lusa.

²⁴ Go israellaččat ledje goddán buot Aja olbmáid meahccái gosa sii ledje sin doarridan, ja buohkat ledje gahččan miehkkái gitta maŋimuš olbmá ráje, de sii máhcce Ajii ja godde daid geat vel ledje doppe. ²⁵ Dan beaivvi gottáhalle guoktenuppelohkáiduhát olbmá ja nissona, buot Aja ássit. ²⁶ Josua ii váldán ruoktot gieđa mas lei doallamin sábela, ovdal go buot Aja ássit ledje vihahuvvon duššadeapmái. ²⁷ Israellaččat goit rievidedje gávpogis omiid ja eará opmodaga. Sii dahke visot aivve nugo Hearrá lei gohččon Josua. ²⁸ Josua bolddii Aja gávpoga ja dagai dan agálaš čievračopman, ávdin báikin, dakkárin go dat lea otná beaivvige. ²⁹ Muhto Aja gonagasa son harccastii murrii ja divttii su jápma rupmaša heaŋgát das gitta eahkeda rádjái. Go beaivváš luoitádii, de Josua gohčui váldit dan vulos. Sii bálkestedje dan gávpotpoartta ovdii ja guhppejedje dan ala stuorra geađgečoma mii lea das otná beaivvige.

Josua lohká lága Ebalváris

³⁰ Dan áiggi Josua ráhkadii Ebalvárrái áltára Hearrái, Israela Ipmilii, ³¹ nugo Moses, Hearrá bálvaleaddji, lei gohččon israellaččaid dahkat ja nugo lea čállojuvvon Mosesa láhkagirjái. Áltár ráhkaduvvui olles geđggiin maidda ii mihkkege ruvddiid lean guoskan. Dan alde sii oaffarušše Hearrái boaldinoaffariid ja searvevuođaoaffariid. ³² Daidda geđggiide Josua čálii israellaččaid oaidnut geardduhusa dan lágas maid Moses lei čállán. ³³ Oppa Israel, sihke vierrásat ja eatnamis riegádan olbmot, buot Israela vuorrasat, hoavddat ja duopmárat, čužžo goappáge bealde árkka levilaš báhpaid buohta geat galge guoddit Hearrá lihtuárkka. Nubbi bealli álbmogis čuoččui Garisimvárrái čalmmiid, nubbi bealligis Ebalvárrái čalmmiid. Moses, Hearrá bálvaleaddji, lei oainnat gohččon buressivdnidit Israela álbmoga dainna lágiin. ³⁴ Das maŋŋil Josua logai jitnosii oppa lága, sihke buressivdnádusaid ja garuhusaid, aiddo nugo láhkagirjái lei čállojuvvon. ³⁵ Josua ii guođđán eret sánige das maid Moses lei gohččon. Buot lohkkojuvvui oppa Israela searvegoddái ja nissoniidda ja mánáide ja vierrásiidda geat čuvvo sin.