Hopp rett til
Kirkeårets teksterDagens bibelord
Tegnforklaringer
Bibelleseplaner
Kjøp Bibelen
Bibelsøk
Søk
 |
 |
 |
| Hvor finner jeg... |
.
Váidaluslávlagat
1 2 3 4 5| < Forrige kapittel | Neste kapittel > |
Goalmmát lávlla 3Mun lean olmmái gii lean šaddan gillát Hearrá moari rissi. 2 Son lea ádján mu seavdnjadassii, moskkuseavdnjadii. 3 Mu vuostái son lea bajidan gieđas ain ođđasis. 4 Son gaikkodii mu oačči ja loahpahii mu liikki, cuvkii buot mu dávttiid. 5 Son huksii muvrra mu ovdii, birastahtii mu mirkkuin ja váivviin. 6 Son bijai mu ássat seavdnjadassii, olbmuid gaskii geat leat jápmán áigá juo. 7 Son válddii mu gitta aman beassat báhtarussii, son čanai mu lossa láhkkiiguin. 8 Vaikko mun bárggun ja fuoikkun, de son ii gula mu rohkadusa. 9 Son muvrii mu geainnu gitta čullojuvvon geđggiiguin, dagai mu bálgá veadjemeahttumin johtit. 10 Son lei munnje nugo njágadeaddji guovža, dego ledjon mii lea čiehkádan. 11 Son čádjidahtii mu luottas, gaikkodii mu ja guđii mu njaŋgát. 12 Son gelddii dávggis ja divui mu njuolaidis moallan. 13 Son ráiggai mu monimuččaid njuollaskuohpus njuolaiguin. 14 Mun gárten buot olbmuid bogostahkan, sin bilkolávllan beaivvis beaivái. 15 Son gallehii mu rihča urtasiiguin, attii munnje márona juhkat. 16 Son dettii mu vuolás gavjii, cuvkii mu bániid čievrrain. 17 Buot buorre lea jávkan mu eallimis, mun vajáldahtten mii lihkku lea. 18 Mun dadjen: Mun in šat veaje, Hearrá lea váldán mus doaivvu. 19 Mun muittán iežan vártnuhisvuođa ja ruovttuhisvuođa, dat lea munnje máron ja mirko. 20 Dan mun jurddašan álo, dat čuohcá munnje sakka. 21 Dat givssida mu, ja mun váivašuvan. 22 Hearrá árbmugasvuođas ii leat loahppa, su váibmoláđisvuohta ii noga goassege. 23 Dat lea ođas juohke iđida, stuoris lea su oskkáldasvuohta. 24 Mun dajan: Hearrá lea mu oassi, mun dorvvastan sutnje. 25 Hearrá lea buorre dasa gii vuordá su ja ohcá su. 26 Buorre lea jaskatvuođas vuordit veahki Hearrás. 27 Buorre lea olbmái guoddit geassá nuorravuođas. 28 Čohkkájehkos son okto ja orros jávohaga, go Hearrá bidjá su guoddit nođiid, 29 deddos son ámadaju eatnamii – ain sáhttá leat doaivu. 30 Jorgalehkos son niera dasa gii doške, gallehuvvos son hiddjádusain. 31 Hearrá ii hilggo agálaččat. 32 Jos son lea moraštahttán, de son fastain árpmiha stuorra oskkáldasvuođastis. 33 Ii leat su miela mielde vuortnuhit ja moraštahttit olbmuid. 34 Go dulbmet julggiid vuollái buot eatnama fáŋggaid, 35 go botnjet olbmo vuoigatvuođa Alimusa čalmmiid ovddas, 36 go biehttalit olbmos su vuoigatvuođa – iigoson Hearrá oainne dan? 37 Gean sátni ollašuvvá? Almma visot dáhpáhuvvá nugo Hearrá cealká? 38 Almma bahá ja buorre boahtá nugo Alimus gohčču? 39 Manne dalle ealli olmmoš váidala suttuidis bálkká? 40 Suokkardehkot ja guorahallot geainnuideamet ja máhccot Hearrá lusa. 41 Bajidehkot gieđaid ja váimmu albmái, Ipmila guvlui. 42 Mii leat suddudan ja nággáruššan du vuostá, don it leat addán ándagassii. 43 Don gokčet iežat moriin ja doarrádallet min, don goddet seasttekeahttá. 44 Don gokčet iežat balvvaiguin maid čađa rohkadus ii beasa. 45 Don dahket min rihpan ja hilggohassan álbmogiid gaskii. 46 Buot min vašálaččat njezzot midjiide. 47 Min oassin lea šaddan hirbma ja hávdi, heavahus ja duššadeapmi. 48 Gatnjalat golget mu čalmmiin, danne go mu álbmot lea duššamin. 49 Mu gatnjalat golget heaittekeahttá, dat eai noga 50 ovdal go Hearrá geahččá vuolás almmis ja oaidná. 51 Munnje čuohcá geahččat iežan gávpoga nieiddaid bákčasa. 52 Dat geat doarridit mu almmá siva haga, bivdaledje mu dego lotti. 53 Sii ádje mu eallinaga gáivui, sii geađgádedje mu. 54 Čázit bádde mu oaivvi badjel, mun jurddašin: Dát lea mu loahppa. 55 Hearrá, mun čuorvvun du nama gáivvo čiekŋalasas. 56 Don gulat mu čuorvasa – ale dahpa beljiidat go mun ánuhan geahpádusa ja bestojumi. 57 Don boađát mu lusa go mun čuorvvun, don cealkkát: Ale bala! 58 Hearrá, don čuoččuhat mu ášši, don lonistat mu heakka. 59 Don oainnát dan vearrivuođa maid mun gillán, Hearrá. Veahket mu oažžut vuoigatvuođa! 60 Don oainnát mu vašálaččaid mávssahanhálu, buot sin bahás juonaid. 61 Hearrá, don gulat go sii hiddjidit mu, don oainnát sin bahás áigumušaid. 62 Mu vašálaččat savkkástallet ja humeštit mu vuostá duojážassii. 63 Fuomáš, mo sii dahket mu bogostahkan gos sii ain čohkkájit dahje čuččodit. 64 Hearrá, mávssat sidjiide sin daguid. 65 Sevnnjodahte sin jierpmi, divtte garuhusa deaivat sidjiide. 66 Hearrá, doarrit sin moaristat, ale suova sin eallit iežat almmi vuolde. |
| < Forrige kapittel | Neste kapittel > |
Lukk X
Her kan registrerte brukere snart lagre egne kommentarer på det valgte verset.
Nå lager vi ny nettbibel
Nettbibelen blir ny høsten 2023. Vi ruller ut nye funksjoner fortløpende, og trenger din hjelp til å teste og gi tilbakemelding.
Test på beta.bibel.no