Njealját lávlla
1 Gal juo lea golli devkkodan,
giimmagan čielgaseamos golli!
Bassi, mávssolaš geađggit leat suhppojuvvon
buot gáhtačiegaide.
2 Siona hearvás bártnit,
mávssoleappot go čielga golli –
dál sii adnojuvvojit láirálihttin,
láirálihttedahkki duodjin.
3 Velá šakálatge njamahit
ja gallehit čivggaideaset,
muhto mu álbmoga nieiddat
leat šaddan goavvin,
galššasin dego meahci struhccaloddi.
4 Njammimáná njuovčča goiká,
darvána guopmái.
Mánážat ánuhit láibbi,
muhto ii oktage atte.
5 Dat geat ovdal borre
fiinna borramušaid,
nelgot jámas gáhtaide.
Dat geat gárvodedje purpura,
skurbet dál luotneduvnniid.
6 Sodoma duššaduvvui
čalbmeravkalanbottus,
olbmogiehta ii guoskan dasa.
Muhto stuorit go Sodoma suddu
lea mu álbmoga rihkus.
7 Siona oaivámuččat
ledje buhttáseappot go muohta,
vielgadeappot go mielki.
Sin rumaš lei ruoksadeabbo go korálla,
sin hápmi safira láhkásaš.
8 Dál sii leat čáhppadeappot go giehpa,
olmmoš ii dovdá sin gáhtas.
Sin liiki darvána dávttiide,
dat lea goikan dego muorra.
9 Geat gahčče miehkkái
leat lihkoleappot go dat
geat nelgot jámas,
geat sotnet ja goarránit
eatnama šattuid váile.
10 Njuorasváimmot eatnit
vušše iežaset mánáid.
Dat ledje sidjiide biebmun
mu álbmoga heavvaneami beaivvi.
11 Hearrá gurrii iežas vaši,
golggahii buolli moaris.
Son cahkkehii Sionii dola
mii loahpahii dan gitta vuođđudusa rádjái.
12 Eai jáhkkán eatnama gonagasat,
ii báhčán ovttage olbmo millii,
ahte muhtun beaivvi
vuostálasti ja vašálaš
boađášii sisa Jerusalema poarttain.
13 Dat dáhpáhuvai
profehtaid suttuid dihte,
báhpaid rihkkosiid geažil.
Sii golggahedje gávpogis
vigihis olbmuid vara.
14 Nugo čalmmeheamit
sii dál čádjádallet gáhtain
varahuvvan biktasiin
maidda eai oččoše oppa guoskatge.
15 “Gáidet! Buhtismeahttun boahtá!”
olbmot čurvot sin ovddas.
“Gáidet, gáidet! Allet guoskkat sin!”
Sii báhtarit, golggadit vieris eatnamiin,
ja álbmogat dadjet:
“Dáppe sii eai oaččo šat orrut guhkit.”
16 Hearrá ieš lea biđgen sin,
son ii geahča šat eambbo sin beallái.
Báhpat eai gudnejahttojuvvo,
boarrásat eai adnojuvvo maninge.
17 Mii gaiváimet duššás veahki boahtit,
dassážii go čalmmit hilaštišgohte.
Fáktentoartnasteamet
mii várdáimet veahkeheaddji,
álbmoga mii ii dattetge sáhttán gádjut.
18 Olbmot fáktejit min lávkkiid,
mii eat bálle vázzit bálgáideamet.
Min loahppa lea lahka, min áigi lea nohkan.
Duođaid, min loahppa lea boahtán.
19 Min doarrádallit ledje falibut
go almmi goaskimat.
Váriin sii doarrádalle min,
meahcis sii njágahedje min.
20 Olmmái gean Hearrá lea vuoidan,
min eallinvuoigŋa,
gahčai sin bivdoroggái.
Miihan leimmet jurddašan:
“Su suoivanis mii eallit
álbmogin álbmogiid gaskkas.”
21 Ávvut ja illut fal, Edom,
don gii ásat Usa eatnamis.
Maiddái dutnje geigejuvvo cearki –
don juhkaluvat ja nuoladat álás.
22 Du vealgi lea máksojuvvon, Sion,
Hearrá ii doalvvo du šat
eret iežat eatnamis.
Muhto du, Edom, son ráŋggášta,
du vearredaguid son ozahallá,
du suttuid son almmustahttá.