Åvtebaakoe
1 Jïjnjesh joe voejhkelamme gaajhkem soptsestidh guktie mijjen luvnie deajvaskamme, 2 jïh guktie mijjese såårnesovveme dejstie gïeh voestes raajeste gaajhkem vööjnin jïh Baakoem mijjese soptsestin. 3 Voelpeme Teofilos, gosse gaajhkem leam eensilaakan aalkovistie goerehtamme, dellie manne ussjedamme gaajhkem dutnjien tjaeledh 4 guktie edtjh daejredh gaajhke maam datne lïereme, staaran lea.
Laavkoje Jåhha
5 Dej beeli gosse Herodes Judejan gånkine, dellie hearra lij man nomme Saake guhte seamma våarosne goh Avia. Altese gujnen nomme Læspa, gie Aronen maadtojste lij. 6 Gåabpatjahkh Jupmelem golteligan jïh altese båvroej jïh njoelkedassi mietie jeeligan. 7 Jåaloeh-almetjh ligan juktie Læspa idtji maanam åadtjoeh, jïh gåabpatjahkh båeries.
8 Ikth gosse Saaken våaroe hearrine Jupmelen uvte 9 jïh gosse hearraj gaskemsh våarpoehtamme, dellie Saake edtji Jupmelen teempelasse tjaangedh jïh soeve-sjïelem båaltajehtedh. 10 Gaajhkh almetjh ålkolen tjåadtjoen rohkeleminie mearan sjïeledeminie. 11 Dellie Saake Jupmelen eengkelem aalhteren åelkies bealesne vuajna. 12 Saake bïllije jïh dïsse asve leejhkie. 13 Eengkele dïsse jeahta:
«Saake, aellieh maa bïllh!Jupmele dov tjoermehtassem govleme.Gåmmedh Læspa edtja dutnjien baerniem reakadehtedhjïh dam galkh Jåhhine nommestehtedh.14 Baernie dutnjien aavoem jïh gearjoem vadta,jïh gellie dan reakadæmman aavoedieh15 juktie dïhte faamohke Jupmelen uvte sjædta.Ij gåessie gænnah galkh vijnemvuj garre tjaetsiem jovkedh.Joe jiemesne dïhte dïeves Aejlies Voejkenistie.16 Dan dïehre jïjnjh almetjh Jisraelesne gelkiehbååstide Åajvan jïjtsh Jupmielasse jarkedh.17 Åejvien åvtelisnie galka vaedtsedhseamma voejkeninie jïh faamojne goh Hïlje,aehtjiej vaajmoeh edtja maanaj vuestie jarkoestidh,neahkoeh almetjidie edtja rïektes åssjalommesh vedtedhjïh almetjidie illedh Jupmelem dåastoehtidh.»18 Saake eengkelasse jeehti: «Guktie maahtam dïsse jaehkedh? Manne hov båeries jïh mov gåmma aaj.» 19 Eengkele vaestiedi: «Manne Gabri-el gie Jupmelen åajvemes tjahkes-sijjien baalte tjåådtje. Mannem stilleme dutnjien soptsestidh jïh aavoedïjrem dutnjien buektedh. 20 Juktie ih mannem jaehkieh, galkh gïelehth sjïdtedh goske gåmmedh dutnjien baerniem reakadahteme.»
21 Almetjh tjåadtjoejin Saakem vuertieminie jïh ussjedeminie man åvteste dan guhkiem teempelisnie gååte. 22 Gosse olkese bööti, idtji dellie maehtieh dej gujmie soptsestidh. Dah guarkajin Saake volverimmiem teempelisnie åtneme. Gïelehth lij jïh tjoeri sieviehtidh.
23 Gosse galhkeme gaagkestidh, gåetide vöölki. 24 Ånnetji dan mænngan gåmmebe Læspa nåajsan sjïdti, jïh vïjhte askh tjietjelen lij. Dellie jeehti: 25 «Daam Jupmele munnjien dorjeme. Mannem måjhtelamme jïh mov skaamoem almetji luvhtie luajhteme.»
Dïjre Maarjese Jeesusen bïjre
26 Govhteden asken eengkele Gabri-el Jupmelen luvhtie bööti, noere nïejten gåajkoe, staarese mij Nasaretesne, Galilejesne. 27 Dan nomme Maarja, Josefen faelhkienïejte. Josef Daviden boelveste lij. 28 Eengkele dan gåajkoe båata jïh jeahta: «Aavodh, Jupmele dutnjien åårmege! Jupmele datnine!» 29 Maarja eengkelen baakojste bïllije jïh ussjede guktie edtja daam dïjrem guarkedh. 30 Eengkele jeahta:
«Aellieh bïllh Maarja! Jupmele dutnjien åårmege.31 Nåajsan edtjh sjïdtedh, jïh baerniem baersieldidh,jïh dam galkh Jeesusinie nommestehtedh.32 Dïhte åajvemes sjædtajïh Jallatjommesen baernine gohtjesåvva.Åejvie Jupmele aehtjeben, Daviden,åajvemes tjahkes-sijjiem dïsse vadta.33 Jaahken slïektine ihkuve aajkan reerie,jïh dan faamoe ij gåessie gænnah nåhkh.»34 Maarja eengkelasse jeahta: «Saarnoeh guktie? Im leah dååkerdamme.» 35 Eengkele dellie jeahta:
«Aejlies Voejkene dutnjien båatajïh Jallatjommesen faamoe datnine lea.Dannasinie maana gie reakede,aejlies jïh Jupmelen Baernine gohtjesåvva.36 Dov laevie Læspa aaj nåajsan jïh baerniem vuertieminie, maaje båeries. Læspan bïjre jeehtin idtji maehtieh maanadovvedh, daelie hov govhteden askesne nåajsan. 37 Juktie Jupmele gaajhkem buektehte.» 38 Maarja jeahta: «Manne Jupmelen dïenesjæjja. Vaajt mannine sjædta guktie datne jeahteme.» Jïh eengkele Maarjam leehpi.
Maarja Læspan luvnie guessine
39 Måedtieh biejjieh dan mænngan Maarja varke skodti voenese bijjene Judejesne jïh staarese 40 gusnie Saake. Gåatan tjaangi Læspam gaavnesjidh. 41 Gosse Maarja Læspam buarastehti, dellie Læspa damti jiemesne tsïhki. Dïeves Aejlies Voejkenistie sjïdti jïh 42 reegkes gïeline tjåarvoeji: «Datne jeenemes bueriesjugniedovveme jeatjah nyjsenæjjijste, jïh maana maam datne guadtah, bueriesjugniedovveme lea. 43 Guktie nemhtie, mov Åejvien tjidtjie mov gåajkoe båata? 44 Gosse mannem buarastehtih, maana aavosne mov jiemesne tsïhki. 45 Aavrehke dïhte gie jaahka dam maam Jupmele jeahteme edtja sjïdtedh.» 46 Dellie Maarja jeahta:
Maarjan heevehtimmie
«Mov sealoe Åejvien faamoem heevehte,47 mov voejkene Jupmielinie, mov Lutniestæjjine, aavode.48 Juktie jïjtse giefies dïenesjæjjese vuartasjamme.Daehtie aejkeste gaajhkh boelvh gelkieh mannemheevehtieh jïh jiehtedh manne aavrehke
49 juktie stoere dahkoeh munnjien dorjeme,dïhte Faamohke man nomme aejlies.
50 Boelveste boelvide åårmegedejtie gïeh altemse våavkasjieh.
51 Gïetine vieksies dahkoeh darjoeji,dejtie gïeh tjievliedieh, speadtjoeji.
52 Reerijidie åajvemes tjahkes-sijjijste beelhki,jïh giefies almetjidie lutnji.
53 Dejtie gïeh nealkoeminie, laeviehti,jïh dejtie gïeh ræjhkoes, namhtah-gïeti saehtieji.
54 Jïjtse deanere Jisraelem vaarjelijïh mujhtieji aarmoedidh
55 guktie dåajvoehtamme mijjen maadtojde,Abrahamese jïh altese maanide ihkuve aajkan.»
56 Maarja Læspan luvnie golme askh lij jïh dan mænngan gåetide vöölki.
Laavkoje Jåhhan reakadimmie
57 Læspa vuertiemisnie jïh baerniem baersieldi. 58 Kraannah jïh slïekth åadtjoejin govledh magkeres stoere aarmoem Jupmele dïsse vuesiehtamme, jïh dah Læspine aavoedin.
59 Dan gaaktseden biejjien böötin baerniem bïjretjoehpestehtedh. Dah sïjhtin maanam aehtjeben nommine, Saakine, nommestehtedh. 60 Tjidtjebe gujht nyöjhki: «Ijje, daan nomme Jåhha.» 61 Dïsse jeehtin: «Ij leah gie dov slïektesne, gïen nomme Jåhha.» 62 Jïh aehtjebem stillin soptsestidh guktie baerniem nommestehtedh. 63 Taavlan mietie gihtjie jïh dellie tjaala: «Jåhha dan nomme», jïh gaajhkesh dovnesh bååhperin. 64 Dastegh meehti soptsestidh. Soptsestalli jïh Jupmelem heevehti. 65 Gaajhkh lïhkesadtjh bïllijin jïh daan bïjre såaltje juhtieji abpe Judejan byjreskisnie. 66 Jïh gaajhkesh gïeh dam govlin, dam mujhtiejin jïh gihtjin: «Saarnoeh, mij edtja dehtie maaneste sjïdtedh?» Dïhte Jupmelen åelesne. 67 Aejlies Voejkene aehtjebe Saakese bööti jïh Saake profeeten baakoejgujmie soptsestalli:
Saaken heevehtimmie
68 «Åejvie, Jisraelen Jupmele, bueriesjugniedovveme,juktie jïjtse åålmegem gååsseme jïh dam lutniestamme.69 Åejvie jïjtse deanere Daviden boelvestemijjese gorredimmien tjåerviem tseegkeme
70 guktie dej beeli dåajvoehtijïh jïjtse aejlies profeetide raaji soptsestidh:
71 gorredimmie mijjen vidtjie-nïerijstejïh gaajhkijste dejstie gïeh mijjem væssjoehtieh.
72 Mijjen maadtojde åårmege jïh stynkehke lij,jïh jïjtse aejlies sjïehtedimmiem mujhtieji
73 jïh dååjvehtassem maam mijjenmaadter-aehtjie Abrahamese våarnoeji:
74 mijjem vidtjie-nïeri gïetijste gorredidhguktie Jupmelem asvehth dïenesjibie75 tjïelke jïh rïektesvoetesne gaajhkide mijjen jielemebiejjide.
76 Jïh datne maaneme,Jallatjommesen profeetine gohtjesovvhjuktie datne Jupmelen åvtelen vaadtsah,jïh dïsse baalkam röönjh.
77 Dellie altese åålmege daajra gorredimmie daesniegosse sådtojste luajhtasåvva78 juktie mijjen Jupmelen stoere aarmoe.
Jallatjommesistie tjoevke båatamijjen gåajkoe goh låvnadahke,
79 tjoevkedh dejtie gïeh jemhkielisniejïh jaemeden yörhkesne,jïh mijjem raeffien baalkam vaedtsiehtidh.»
80 Baernie stoere sjïdti jïh voejkeninie veaksehke lij. Miehtjies dajvesne årroeji dan beajjan gossege Jisraelen uvte edtji tjåadtjodh.