1 Dát lea Hearrá sátni mii bođii morešetlaš Mikai Juda gonagasaid Jotama, Ahasa ja Hiskia áigge, dát leat Mika oainnáhusat Samaria ja Jerusalema hárrái.
Samaria duopmu
2 Gullet, buot álbmogat,
guldal, eanan ja buot mii dus lea!
Hearrá, mu Ipmil,
duođašta din vuostá,
Hearrá ieš bassi tempelisttis.
3 Gehččet, Hearrá vuolgá viesustis,
son njiedjá ja loaiddasta ovdan
eatnama dieváid badjel.
4 Várit suddet su vuolde
dego gáhčči dola ovddas,
leagit luoddanaddet dego čáhci
mii boršu bávtti badjel.
5 Buot dát dáhpáhuvvá
Jakoba rihkkumiid dihte,
Israela álbmoga suttuid dihte!
Mii lea Jakoba rihkkun?
Iigo dat leat Samaria?
Mii lea Juda suddu?
Iigo dat leat Jerusalem?
6 Mun dagan Samaria čievračopman,
fierahan dan geđggiid leahkái,
gaikkodan dan vuođđudusaid,
dagan dan geađgevieltin
ja viidnegárddiid steallin.
7 Buot dan ipmilgovat cuvkejuvvojit,
buot fuorráattáldagat boldojuvvojit.
Mun dagan duššin buot eahpeipmiliid.
Fuorrábálkán dat daid čohkkii,
fuorrábálkán dat fas šaddet.
Vašálaš áitá Jerusalema
8 Dan dihte mun váidalan ja vuobaidan,
váccán rabas julggiid ja álásin.
Mun holvvun dego šakála,
luoimman dego struhcca.
9 Samaria hávvi ii leat buorideames,
dat ollá Judai, mu álbmoga poarttaide,
gitta Jerusalema rádjái.
10 Allet muital dan Gatis,
allet čiero jitnosii.
Fieradehket muolddas, dii Bet-Leafra olbmot!
11 Vulget gávpogisttádet, dii Šafira ássit,
álásin ja heahppášuhttojuvvon!
Saanana olbmot eai beasa eret.
Bet-Haeselis gullo váidalančuorvvas,
dat doarjja lea váldojuvvon dis eret.
12 Dat geat ásset Marotis, vurdet buori,
muhto lihkuhisvuohta maid
Hearrá lea vuolggahan,
lea ollán gitta Jerusalema poarttaid rádjái.
13 Dii leŋgiidet heasttaid vovnnaid ovdii,
dii Lakiša ássit.
Dát lei Siona suttu álgu,
Israela rihkkumušat
bohte oidnosii din luhtte.
14 Addet Morešet-Gatii earroattáldaga!
Aksiba viesut leat beahttán
Israela gonagasaid.
15 Velá oktii, Mareša olbmot,
mun vuolggahan din vuostá
dakkára gii vuoitá din.
Israela hearvásvuohta
ferte fas báhtarit Adullamii.
16 Čuohpat oaivvi báljisin,
ráhke moraštemiin vuovttaidat
mánáidat dihte geat ledje du illu.
Daga iežat oaivvi báljisin
dego ráhtogoaskima oaivi,
dasgo sii leat dolvojuvvon du luhtte eret.