Jesus boahtá Jerusalemii
1 Go sii lahkanedje Jerusalemii ja bohte Betfagei ja Betaniai Oljovári vuollái, de Jesus vuolggahii guoktása máhttájeddjiinis 2 ja celkkii sudnuide: “Manni don gillái mii doppe oidno. Dallánaga go boahtibeahtti dohko, de oaidnibeahtti čadnojuvvon ásenvárssá man čielggis ii oktage olmmoš leat vel čohkkán. Čoavdi dan ja bukti deike. 3 Jos muhtin jearrá manne doai dahkabeahtti nie, de vástideahkki: Hearrá dárbbaša dan, muhto vuolggaha dan fargga fas deike.” 4 Soai vulggiiga ja gávnnaiga ásenvárssá mii lei čadnojuvvon gáhtii uksanjálbmái. Soai čovddiiga dan. 5 Muhtun olbmot geat ledje das, jerre: “Maid doai dahkabeahtti? Manin čoavdibeahtti várssá?” 6 Soai vástideigga nugo Jesus lei gohččon, ja sii dikte sudno mannat. 7 Soai doalvvuiga várssá Jesusii ja lebbiiga iežaska olgguldasbiktasiid dan ala, ja Jesus čohkánii dan čielgái. 8 Ollugat lebbo geidnui biktasiid, earátgis lastaovssiid maid sii čuhppe geaidnoguoras. 9 Ja dat geat vázze su ovddas ja maŋis, čurvo: Hosianna! Buressivdniduvvon lehkos son guhte boahtá Hearrá nammii! 10 Buressivdniduvvon lehkos min áhči Davida riika mii dál boahtá! Hosianna allagasas! 11 Nu Jesus bođii Jerusalemii. Son manai tempelii ja geahčadii doppe buot diŋggaid, muhto go lei juo maŋŋit, de son manai fas Betaniai oktan guoktenuppelohkái máhttájeddjiinis.
Jesus garuha fiikonmuora
12 Go sii maŋit beaivvi vulge Betanias, de Jesusii šattai borranmiella. 13 Son oinnii guhkkin fiikonmuora mas ledje lasttat, ja son manai geahččat gávdnošiigo das mihkkege. Muhto go son bođii muora lusa, de son ii gávdnan das eará go lasttaid, danne go ii lean fiikoniid áigi. 14 Dalle Jesus celkkii murrii: “Allos oktage šat goassege borro du šaddosiid!” Su máhttájeaddjit gulle dan.
Jesus buhtista tempela
15 Go sii bohte Jerusalemii, de Jesus manai tempelii ja ádjigođii olggos daid geat ledje doppe vuovdimin ja oastimin. Son gomihii ruhtacuvkeheddjiid bevddiid ja duvvávuvdiid beaŋkkaid 16 iige suovvan geange guoddit maidege tempelšilju rastá. 17 Ja son oahpahii olbmuid ná: “Almma lea čállojuvvon: Mu viessu galgá gohčoduvvot buot álbmogiid rohkadusa viessun? Muhto dii lehpet dahkan dan rievvárbiedjun.”
18 Bajimusbáhpat ja čáloahppavaččat gulle dan ja árvaledje mo sáhtášedje goddit Jesusa. Sii balle sus, danne go olbmot ovddošedje sakka su oahpahusa. 19 Go eahket lei šaddan, de Jesus ja máhttájeaddjit vulge gávpoga olggobeallái.
Ástan fiikonmuorra
20 Go sii árrat iđedis manne fiikonmuora meattá, de sii oidne ahte dat lei ástan ruohttasiid ráje. 21 Dalle Peter muitái mii lei dáhpáhuvvan, ja son dajai Jesusii: “Rabbi, geahča! Fiikonmuorra maid don garuhit, lea ástan.” 22 Jesus celkkii sidjiide: “Oskot Ipmilii. 23 Duođaid, mun cealkkán didjiide: Jos muhtin dadjá dán várrái: ‘Loktan ja bálkestahte merrii!’ de dat dáhpáhuvvá, jos son ii váimmustis eahpit muhto osku ahte nu šaddá go son dadjá. 24 Danne mun cealkkán didjiide: Maid ihkinassii dii rohkadusas átnubehtet, de oskot ahte lehpet juo ožžon dan, ja dat lea din. 25 Ja go čuožžubehtet rohkadallamin, de addet ándagassii buot unohasvuođaid mat dis leat guđege vuostá. Dalle maiddái din Áhčči gii lea almmis, addá didjiide ándagassii din rihkkumiid. 26 Muhto jos ehpet atte ándagassii, de ii din almmálaš Áhččige atte didjiide ándagassii din rihkkumiid.”
Jesusa váldi
27 Sii bohte fas Jerusalemii. Go Jesus lei vázzimin tempelšiljus, de bajimusbáhpat, čáloahppavaččat ja vuorrasat bohte su lusa. 28 Sii jerre sus: “Mainna válddiin don dagat dákkára? Gii lea addán dutnje válddi dahkat dán?” 29 Jesus vástidii sidjiide: “Mun maiddái jearan dis juoidá. Vástidehket dii vuos munnje, de mun cealkkán didjiide makkár válddiin mun dagan visot dán. 30 Bođiigo Johannesa gásta almmis vai olbmuin? Vástidehket munnje!” 31 Sii árvaledje guhtet guimmiideasetguin: “Jos mii vástidit: Almmis, de son dadjá: Manne dii dalle ehpet oskon sutnje? 32 Vai dajašeimmetgo: Olbmuin?” Muhto sii balle álbmogis, danne go buohkaid mielas Johannes duođaid lei profehta. 33 Danin sii vástidedje: “Mii eat dieđe.” Dalle Jesus celkkii sidjiide: “In munge dalle daja didjiide mainna válddiin mun dagan visot dán.”