Jesus Pilatusa ovddas
1 Dakkaviđe iđedis bajimusbáhpat ráđđádalle vuorrasiiguin ja čáloahppavaččaiguin, oppa Ráđiin. Sii čatne Jesusa, dolvo su eret ja adde su Pilatusa háldui.
2 Pilatus jearai Jesusis: “Leatgo don juvddálaččaid gonagas?” Jesus vástidii: “Ieš don dan dajat.” 3 Bajimusbáhpat sivahalle su sakka, 4 ja Pilatus jearai: “Itgo don vástit maidege? Almma don gulat mo sii sivahallet du!” 5 Muhto Jesus ii šat vástidan maidege. Dat imaštahtii Pilatusa.
6 Basiid áigge Pilatus lávii luoitit luovos ovtta fáŋgga, dan gean álbmot siđai. 7 Muhtun gean namma lei Barabbas, lei giddagasas stuibmideddjiiguin geat ledje sorbmen olbmo stuimmiid siste. 8 Pilatusa lusa lei čoahkkanan olmmošjoavku mii siđai su dahkat nugo son lávii. 9 Pilatus jearai: “Dáhttubehtetgo mu luoitit luovos juvddálaččaid gonagasa?” 10 Son oainnat diđii ahte bajimusbáhpat gáđašvuođas ledje addán Jesusa su gihtii. 11 Muhto bajimusbáhpat oalgguhedje olbmuid sihtat su luoitit luovos baicca Barabbasa. 12 Pilatus jearai fas álbmogis: “Maid mun dalle dagan dán olbmái gean dii gohčodehpet juvddálaččaid gonagassan?” 13 Sii čurvo: “Russiinávle!” 14 Pilatus jearai: “Maid baháid son lea dahkan?” Muhto sii čurvo vel jitnoseappot: “Russiinávle su!” 15 Pilatus dáhtui dahkat olbmuid miela mielde ja luittii Barabbasa luovos, muhto Jesusa son spihččehii ja attii russiinávlejuvvot.
Soalddáhat bilkidit Jesusa
16 Soalddáhat dolvo Jesusa eatnanhearrá ladni šilljui ja rávke čoahkkái olles fáktaveaga. 17 Sii gárvvuhedje sutnje purpurbiktasa ja bárgidedje bastilislátnjákruvnnu ja bidje dan su oaivái. 18 De sii ripme dearvvahit su: “Dearvva, juvddálaččaid gonagas!” 19 Sii cábme soppiin su oaivvi, čolge su ja čippostedje ja gopmirdedje su ovdii. 20 Go sii ledje bilkidan su, de sii nulle sus purpurbiktasa, gárvvuhedje sutnje fas su iežas biktasiid ja vulge doalvut su russiinávlejuvvot.
Jesus russiinávlejuvvo
21 Sii bággejedje muhtun olbmá gii lei mannamin das meaddel, guoddit Jesusa ruossa. Son lei kyrenelaš Simon, Aleksandrosa ja Rufusa áhčči, gii lei boahtimin gávpogii. 22 Sii dolvo Jesusa báikái man namma lea Golgata – dat lea Oaiveskálžobáiki. 23 Sii adde sutnje juhkat viinni masa lei seaguhuvvon myrra, muhto son ii váldán dan. 24 De sii russiinávlejedje su ja juogadedje su biktasiid ja vuorbádalle maid guhtege oaččui. 25 Lei goalmmát diibmu go sii russiinávlejedje su. 26 Bajilčálusin lei čállojuvvon váidda su vuostá: Juvddálaččaid gonagas. 27 Oktan suinna sii russiinávlejedje guokte rievvára, nubbi su olgeš ja nubbi su gurut beallái. 28 Nu ollašuvve čállagiid sánit: Son lohkkojuvvui láhkarihkkuid searvái. 29 Dat geat manne meattá, bárde oaivvi ja bilkidedje su: “Don gii gaikkut tempela ja hukset dan fas golmma beaivvis, 30 beastte dal iežat ja njieja vuolás ruossas!” 31 Seammá láhkái bilkidedje su maiddái bajimusbáhpat ja čáloahppavaččat. Sii dadje guhtet guoibmáseaset: “Earáid son gal lea beastán, muhto iežas ii veaje beastit. 32 Njidjos dál ruossas – Messias, Israela gonagas! Go mii dan oaidnit, de mii oskut sutnje.” Maiddái dat geat leigga russiinávlejuvvon oktan suinna, hiddjideigga su.
Jesus jápmá
33 Beaiveguovdil, guđát diimmus, sevnnjodii miehtá eatnama, ja seavdnjadas bisttii gitta ovccát diimmu rádjái. 34 Ovccát diimmus Jesus čuorvvui alla jienain: “Eloi, Eloi, lema sabaktani?” Dat lea: “Ipmilan, Ipmilan, manne don leat mu guođđán?” 35 Go muhtumat dain geat ledje das, gulle dan, de sii dadje: “Son čuorvu Elia.” 36 Muhtun viehkalii njuoskadit guobbarasa ettetviinnis, bijai dan soabbegeahčái, attii sutnje juhkat ja dajai: “Gehččot dal, boahtágo Elia váldit su vuolás.” 37 Muhto Jesus čurvii alla jienain ja attii vuoiŋŋas. 38 Dalle tempela ovdaloavdda gaikánii guovdat, badjeravddas gitta vuolleravdii. 39 Go čuohtásaoaivámuš gii čuoččui das su buohta, oinnii Jesusa mo son attii vuoiŋŋas, de son dajai: “Duođaid, dát olmmái lei Ipmila Bárdni!”
40 Dobbelaččas ledje maiddái muhtun nissonat geahččamin. Das ledje Maria Magdalena, nubbi Maria gii lei nuorat Jakoba ja Josesa eadni, ja Salome. 41 Sii ledje vádjolan Jesusa mielde juo Galileas ja bálvalan su. Das ledje maiddái ollu eará nissonat geat ledje boahtán Jerusalemii Jesusa mielde.
Jesus hávdáduvvo
42 Lei šaddan juo eahket; lei sabbaha ruohtta, ráhkkananbeaivi. 43 Dalle dasa bođii arimatealaš Josef, gudnejahttojuvvon ráđđelahttu gii ieš vurddii Ipmila riikka. Son arvvai mannat Pilatusa ságaide ja ánuhii oažžut Jesusa rupmaša. 44 Pilatus imaštii go gulai ahte Jesus lei juo jápmán. Son rávkkai lusas čuohtásaoaivámučča ja jearai leigo Jesus duođaid juo jápmán. 45 Ja go oaivámuš duođaštii dan sutnje, de son attii Jesusa rupmaša Josefii. 46 Josef osttii beallemasliinni, válddii Jesusa vuolás ruossas, giesai su liinni sisa ja bijai su hávdái mii lei čullojuvvon báktái. Hávddi uksaráiggi ovdii son fierahii geađggi. 47 Maria Magdalena ja Josefa eadni Maria geahčaiga gosa Jesus hávdáduvvui.