Jesus buorida lámis olbmá
1 Muhtun beivviid das maŋŋil Jesus bođii fas Kapernaumii, ja beaggigođii ahte son lei ruovttus. 2 Dohko čoagganii nu ollu olmmoš ahte buohkat eai čáhkan uvssa ovdiige. Jesus sárdnidii sidjiide sáni. 3 Sii bukte lámis olbmá su lusa. Njeallje olbmá gudde su, 4 muhto olbmuid eatnatvuođa dihte sii eai beassan Jesusa lusa. Dalle sii gaiko dáhki dakko gokko Jesus lei, ja go ledje ráigan dáhki, de sii luite vuolás guoddinseaŋgga mas lámis olmmái veallái. 5 Go Jesus oinnii sin oskku, de son celkkii lápmásii: “Bártnážan, du suttut leat dutnje ándagassii addojuvvon.”
6 Muhtun čáloahppavaččat ledje čohkkámin das, ja sii jurddašedje váimmusteaset: 7 “Mo son sáhttá sárdnut nie? Son bilkida Ipmila. Gii sáhttá addit suttuid ándagassii earret Ipmila?” 8 Jesus dovddai dalán vuoiŋŋastis maid sii jurddašedje, ja son celkkii sidjiide: “Manne dis leat diekkár jurdagat? 9 Goabbá lea álkit dadjat lápmásii: Du suttut addojuvvojit dutnje ándagassii, vai: Čuožžil, váldde seaŋggat ja vázzil? 10 Muhto vai diehtibehtet ahte Olbmobártnis lea váldi eatnama alde addit suttuid ándagassii” – ja son cealká lámis olbmái – 11 “mun cealkkán dutnje: Čuožžil, váldde seaŋggat ja mana ruoktot.” 12 Ja olmmái čuožžilii, válddii dallánaga seaŋggas ja váccii olggos buohkaid oaidnut. Buohkat hirpmástuvve. Sii máidno Ipmila ja dadje: “Dákkára mii eat leat goassege oaidnán.”
Jesus rávká Levi máhttájeaddjin
13 Dasto Jesus manai fas jávregátti. Ollu olbmot bohte su maŋis, ja son oahpahii sin. 14 Go son lei vázzimin tuolloviesu meaddel, de son oinnii Levi, Alfeusa bártni, čohkkámin das. Jesus celkkii sutnje: “Čuovo mu!” ja son čuožžilii ja vulggii čuovvut Jesusa.
15 Maŋŋil Jesus lei boradeamen Levi viesus. Ollu tuollárat ja suttolaččat ledje boradeamen Jesusiin ja su máhttájeddjiiguin, danne go sii ledje juo eatnagat daid gaskkas geat čuvvo su. 16 Go láhkadovdit geat gulle farisealaččaide, oidne su boradeamen suttolaččaiguin ja tuolláriiguin, de sii dadje su máhttájeddjiide: “Mo son sáhttá boradit tuolláriiguin ja suttolaččaiguin!” 17 Jesus gulai dan ja celkkii: “Eai dearvvaš olbmot dárbbaš dálkkasteaddji, muhto buohccit. In mun leat boahtán rávkat vanhurskásiid, muhto suttolaččaid.”
Headjaguossit eai fástut
18 Johannesa máhttájeaddjit ja farisealaččat fástudedje. Muhtumat bohte jearrat Jesusis: “Manne du máhttájeaddjit eai fástut, go sihke Johannesa máhttájeaddjit ja farisealaččaid máhttájeaddjit fástudit?” 19 Jesus vástidii: “Eai suige headjaguossit sáhte fástudit dalle go irgi lea sin luhtte? Nu guhká go irgi lea sin luhtte, de sii eai sáhte fástudit. 20 Muhto boahtá áigi go irgi váldojuvvo sin luhtte eret, ja dalle, dan beaivvi sii fástudit.
21 Ii oktage goaro duhppekeahtes diŋggas duogŋasa boares biktasii. Dasgo dalle boares bivttas gaikána ođđa duogŋasa guoras ja ráigi šaddá stuoribun go ovdal. 22 Iige oktage leaikko varas viinni boares viidneseahkaide. Dasgo dalle viidni ludde seahkaid, ja sihke viidni ja seahkat billašuvvet. Varas viinni galgá baicca leaikut ođđa viidneseahkaide.”
Sabbaha hearrá
23 Muhtun sabbaha Jesus váccii gordnebealdduid čađa, ja váccedettiin máhttájeaddjit gáskigohte gordneoivviid. 24 Dalle farisealaččat dadje sutnje: “Manne du máhttájeaddjit dahket dakkára maid ii oaččo dahkat sabbahin?” 25 Muhto Jesus vástidii sidjiide: “Ehpetgo goassege leat lohkan maid David dagai go son ja su olbmát ledje nealgumin? 26 Son manai Ipmila vissui, dalle go Ebjatar lei bajimusbáhppan, borai oaffarláibbiid, maid ii oktage eará go báhpat oaččo borrat, ja son attii maiddái sidjiide geat ledje suinna.” 27 Ja Jesus celkkii sidjiide: “Sabbat lea olbmo várás iige olmmoš sabbaha várás. 28 Danin Olbmobárdni lea maiddái sabbaha hearrá.”