Olmmái geas giehta lei ástan
1 Son manai fas synagogai. Doppe lei olmmái geas giehta lei ástan. 2 Farisealaččat atne Jesusa čalmmis vai oidnet buoridago son olbmá sabbahin, danin go sii dáhtto váidit su. 3 Jesus celkkii olbmái geas giehta lei ástan: “Čuožžil ja boađe deike,” 4 ja jearai dasto farisealaččain: “Goabbá lea lobálaš sabbahin, dahkat buriid vai dahkat baháid, gádjut olbmo heakka vai goddit olbmo?” Muhto sii orro jávohaga. 5 Jesus geahčastii sidjiide moaris ja morrašis sin garra váimmu dihte, ja celkkii olbmái: “Geige gieđa.” Olmmái geigii gieđa, ja giehta šattai fas dearvvašin. 6 Muhto farisealaččat manne olggos ja ráđđádallagohte dalán Herodesa doarjaleddjiiguin, mo sáhtášedje goddit Jesusa.
Jesus beaggá viidát
7 Jesus gáiddai fas máhttájeddjiidisguin jávregáddái, ja ollu olbmot čoagganedje dohko. Sii bohte Galileas, Judeas 8 ja Jerusalemis, Idumeas, don bealde Jordana ja Tyrosa ja Sidona guovlluin. Hui eatnat olbmot bohte su lusa, go sii gulle buot maid son dagai. 9 Jesus siđai máhttájeddjiidis doallat sutnje fatnasa gárvvisin olbmuid eatnatvuođa dihte, amaset bahkket su ala. 10 Son lei buoridan eatnagiid, ja nu buohkat geain ledje vigit, bahkkejedje su njeaiga ja geahččaledje guoskkahit su. 11 Go buhtismeahttun vuoiŋŋat oidne su, de dat luoitádedje su ovdii ja čurvo: “Don leat Ipmila Bárdni!” 12 Muhto son gilddii garrasit daid muitaleames gii son lea.
Guoktenuppelohkái apostala
13 De Jesus goarkŋui várrái. Son rávkkai lusas daid geaid lei válljen, ja sii bohte su lusa. 14 Jesus rávkkai guoktenuppelohkása leat iežas mielde, vai beassá vuolggahit sin sárdnidit 15 ja addit sidjiide válddi ádjit olggos bahás vuoiŋŋaid. 16 Dat guoktenuppelogis geaid son válljii, ledje Simon gean son gohčodii Peterin, 17 Jakob Sebedeusa bárdni ja su viellja Johannes geaidda son bijai namman Boanerges – dat mearkkaša bajána bártnit – 18 ja Andreas, Filip, Bartolomeus, Matteus, Tomas, Jakob, Alfeusa bárdni, Taddeus, Simon Kananeus 19 ja Judas Iskariot, gii behtii su.
Jesus ja Beelsebul
20 De Jesus máhcai ruoktot, ja olbmot čoahkkanedje fas nu ollu ahte son ja su máhttájeaddjit eai bállen oppa boraditge. 21 Go Jesusa olbmot gulle visot dán, de sii vulge dohko vai besset atnit sus fuola; sii oainnat gádde ahte son lei dájáskan.
22 Muhto čáloahppavaččat geat ledje boahtán Jerusalemis, dadje: “Sus lea Beelsebul, bahás vuoiŋŋaid oaivámučča fámuin son ádjá olggos bahás vuoiŋŋaid.” 23 Dalle Jesus rávkkai sin lusas ja sártnui sidjiide veardádusaiguin: “Mo Sáhtán sáhttá ádjit olggos Sáhtána? 24 Jos riika juohkása, de dat ii sáhte bissut, 25 iige bearašge sáhte bissut, jos das leat siskkáldas riiddut. 26 Jos Sáhtán čuožžila iežas vuostá ja riidala iežainis, de dat ii sáhte bissut. Dalle dan loahppa lea boahtán. 27 Ii oktage sáhte mannat gievrras olbmá vissui ja rievidit su biergasiid muđuigo son vuos čatná dan gievrras olbmá. Easkka dalle son sáhttá rievidit su viesu ja biergasiid. 28 Duođaid, mun cealkkán didjiide: Buot addojuvvo olbmuide ándagassii, buot suttut ja bilkádusat, man ollu dal de bilkidežžet. 29 Muhto jos muhtun bilkida Bassi Vuoiŋŋa, de son ii goassege oaččo ándagassii, muhto lea sivalaš agálaš suddui.”
30 Siihan ledje dadjan: “Sus lea buhtismeahttun vuoigŋa.”
Jesusa duohta bearaš
31 De bohte Jesusa eadni ja vieljat. Sii čuoččastedje olggobeallái ja bivde rávkat su boahtit. 32 Ollu olbmot ledje čohkkámin su birra, ja sutnje buktojuvvui sátni: “Du eadni ja vieljat ja du oappát leat olgun ja jearahit du.” 33 Muhto Jesus vástidii sidjiide: “Gii lea mu eadni? Geat leat mu vieljat?” 34 Ja son geahčai olbmuide geat ledje das čohkkámin, ja celkkii: “Dás leat mu eadni ja vieljat. 35 Dat gii dahká Ipmila dáhtu, lea mu viellja ja oabbá ja eadni.”