Gilvi
1 De Jesus oahpahii fas jávregáttis. Su birra čoahkkanedje nu ollu olbmot ahte son fertii mannat čohkkát fatnasii. Son čohkkái jávrri alde fatnasis, ja olbmot čužžo gáttis. 2 Son oahpahii sidjiide eatnat áššiid veardádusaiguin. Ná son oahpahii: 3 “Gullet! Gilvi vulggii gilvit. 4 Ja go son lei gilvimin, de muhtun gilvagat gahčče geaidnogurrii, ja lottit bohte ja borre daid. 5 Muhtun gilvagat gahčče geađgás eatnamii mas ii lean ollu muolda, ja dat ihte johtilit, danin go eanan ii lean assái. 6 Muhto go beaivváš badjánii, de dat bulle ja goldne, danne go dain ii lean ruohtas. 7 Muhtun gilvagat gahčče bastilislánjáid gaskii, ja bastilislánját šadde ja hávkadedje daid, iige šaddu šaddan. 8 Muhto muhtun gilvagat gahčče buori eatnamii. Dat ihte, šadde ja adde šattu, muhtumat golbmalogigeardásaš, muhtumat guhttalogigeardásaš, muhtumatgis čuođigeardásaš šattu.” 9 Ja son celkkii: “Geas leat bealjit, dat gullos!”
Veardádusaid mearkkašupmi
10 Go Jesus de lei báhcán okto dainna guoktenuppelohkásiin ja daiguin earáiguin geat ledje das, de sii jerre sus veardádusaid mearkkašumi. 11 Son celkkii sidjiide: “Didjiide lea oskkilduvvon Ipmila riikka čiegusvuohta, muhto dat geat leat olggobealde, gullet visot dušše veardádussan, 12 vai sii oainnedettiinge eai oainnáše eaige fuobmáše, vai sii guladettiinge eai gulaše eaige áddeše, eai jorgalivčče eaige oččoše ándagassii.”
13 De Jesus celkkii sidjiide: “Jos dii ehpet ipmir dán veardádusa, mo dalle sáhttibehtet ipmirdit eará veardádusaid? 14 Dat maid gilvi gilvá, lea sátni. 15 Gilvva mii lea gilvojuvvon geaidnogurrii, lea olbmot geat gullet sáni, muhto dalán go dat lea sidjiide gilvojuvvon, de boahtá Sáhtán váldit dan eret. 16 Dat geat ožžot gilvagiid geađgás eatnamii leat dat geat váldet vuostá sáni iluin go gullet dan, 17 muhto sii bissot dušše muhtun áiggi, danin go sis eai leat ruohttasat. Go boahtá áŧestus ja doarrádallojupmi sáni dihte, de sii vearránit dallánaga. 18 De lea gilvva mii gilvojuvvui bastilislánjáid seahká. Dat lea dat geat gullet sáni, 19 muhto dán máilmmi morrašat, riggodaga fillehus ja eará anistumit bohtet ja hávkadit sáni, iige dat atte šattu. 20 Muhto gilvva mii lea gilvojuvvon buori eatnamii, lea olbmot geat gullet sáni, váldet dan vuostá ja addet šattu golbmalogigeardásaččat, guhttalogigeardásaččat dahje čuođigeardásaččat.”
Lámpá
21 Jesus celkkii: “Buktojuvvogo lámpá latnjii vai dat biddjojuvvo gári dahje seaŋgga vuollái? Almma dat biddjojuvvo lámpájuolgái? 22 Ii mihkkege leat čihkkojuvvon muđui go ahte dat boahtá oidnosii, ii leat mihkkege suollemasaid mii ii dahkkojuvvoše almmusin. 23 Geas leat bealjit, dat gullos!”
24 Ja son celkkii sidjiide: “Váldet vuhtii maid gullabehtet. Nugo dii mihtidehpet, nu didjiidegis mihtiduvvo, ja velá eambboge. 25 Geas lea, sutnje addojuvvo, muhto geas ii leat, sus váldojuvvo eret vel datge mii sus lea.”
26 Jesus celkkii: “Ipmila riika lea dákkár. Olmmái gilvá gilvagiid eatnamii. 27 Son oađđá ja lihkká ain ođđa beaivái, gilvagat ihtet ja šaddet iige son dieđe mo. 28 Eanan šaddada šattu iešalddis, vuos rási, de gordneoaivvi, de dievas gortniid gordneoivviide. 29 Muhto go šaddu lea ollis, de son vuolggaha sirppe, dainna go láddjenáigi lea boahtán.”
Sennetsiepman
30 Jesus celkkii vel: “Manin mii veardidivččiimet Ipmila riikka? Makkár veardádusa geavahivččiimet? 31 Dat lea dego sennetsiepman mii lea uhcimus buot máilmmi siepmaniin, 32 muhto go dat lea gilvojuvvon, de dat bohciida eatnamis ja šaddá stuoribun go buot eará gilvvašattut. Dat šaddada nu stuorra ovssiid ahte almmi lottit sáhttet dahkat beasi dan suoivanii.” 33 Eatnat dákkár veardádusaiguin son sártnui sidjiide sáni, dađe mielde go sii vedje ipmirdit. 34 Almmá veardádusaid haga son ii sárdnon sidjiide, muhto go son lei sierranassii máhttájeddjiidisguin, de son čilgii sidjiide buot.
Jesus šiggu biekka
35 Go dan seammá beaivvi eahket lei šaddan, de Jesus celkkii máhttájeddjiidasas: “Vulgot don beallái jávrri.” 36 Máhttájeaddjit luite olbmuid vuolgit ja manne fatnasii mas Jesus lei juo čohkkámin. Eará fatnasatge čuovvuledje. 37 De bođii garra jorribiegga, ja bárut leiko fatnasii nu ahte dat juo devdogođii. 38 Muhto Jesus lei fatnasa maŋágeahčen oađđimin guottá vuostá. Máhttájeaddjit bokte su ja dadje: “Oahpaheaddji, itgo don beroš das ahte mii heavvanit?” 39 De son morránii, šikkui biekka ja gohčui jávrri: “Jávohuva! Oro jaska!” De váhččii, ja šattai áibbas goalki. 40 Jesus celkkii sidjiide: “Manne dii lehpet nu balus? Iigo dis veláge leat osku?” 41 Dalle sii balle sakka ja dadje guhtet guoibmáseaset: “Mii olbmáid dát lea? Velá biegga ja jávrige jeagadit su.”