Gi hjerteStøtt nettbibelen
Gå til forsiden

Markusa evangelium

6

Profehta iežas ruovttugávpogis

1 Jesus vulggii doppe ja bođii iežas ruovttugávpogii, ja su máhttájeaddjit ledje su mielde. 2 Go bođii sabbat, de son oahpahišgođii synagogas, ja máŋgasat geat gulle su, ovddošedje ja dadje: “Gos son lea ožžon buot dáid? Mii viisodagaid lea addojuvvon sutnje go sáhttá dahkat dakkár oavdudaguid gieđaidisguin? 3 Iigo son leat dat snihkkár, Maria bárdni, Jakoba, Josesa, Judasa ja Simona viellja? Dáppehan su oappátge ásset, min gaskkas.” Nu sii vearránedje sus. 4 Jesus celkkii sidjiide: “Ii profehta badjelgehččojuvvo gostege nugo iežas ruovttugávpogis, olbmuidis gaskkas ja iežas ruovttus.” 5 Iige son sáhttán dahkat doppe maidege veagalaš daguid, earret dan ahte bijai gieđaid muhtun buhcciid ala ja buoridii sin. 6 Ja son imaštii olbmuid eahpeoskku. Son vádjolii dasto gilis gillái ja oahpahii.

Máhttájeaddjit vuolggahuvvojit

7 Jesus rávkkai lusas dan guoktenuppelohkása ja vuolggahii sin mátkái guoktásiid guoktásiid, ja son attii sidjiide fámu ádjit olbmuin olggos buhtismeahttun vuoiŋŋaid. 8 Son gilddii sin váldimis mielde maidege earret soappi: Ii láibbi, ii lávkka iige ruđa boahkánii. 9 Gápmagiid sii ožžo váldit, muhto eai gárvodit guokte báiddi. 10 Ja son celkkii sidjiide: “Go dii lehpet orron muhtun vissui, de galgabehtet orrut das dassážii go fas vuolgibehtet. 11 Jos muhtun báikkis eai váldde din vuostá eaige dáhto guldalit din, de vulget doppe eret ja savdnjilehket gavjja julggiineattet. Dat lea duođaštus sin vuostá.”

12 Máhttájeaddjit vulge ja gulahedje ahte buohkat galge jorgalit. 13 Sii ádje olggos máŋga bahás vuoiŋŋa, vuide oljjuin máŋga buohcci ja buoridedje sin.

Herodes ja Johannes gásttašeaddji

14 Jesusa namma lei gulustuvvan viidát, ja gonagas Herodes gulai olbmuid dadjamin: “Johannes gásttašeaddji lea čuožžilan jábmiid luhtte, danne sus leat dákkár fámut.” 15 Muhtumat dadje ahte son lei Elia, earrásatgis ahte son lei profehta, dakkár go profehtat ledje leamaš. 16 Go Herodes dan gulai, de son dajai: “Johannes, dat olmmái gean mun dikten steavliduvvot, lea čuožžilan jábmiid luhtte.” 17 Dasgo Herodes lei vuolggahan olbmuid váldit Johannesa gitta ja bidjat su giddagassii vieljas Filipa áhká Herodiasa dihte. Herodes lei váldán áhkkán Herodiasa, 18 muhto Johannes lei dadjan sutnje: “Dus ii leat lohpi eallit vieljat áhkáin.” 19 Herodias ii gierdan Johannesa ja hálidii goddit su, muhto ii sáhttán, 20 danin go Herodes balai Johannesis. Herodes diđii Johannesa vuoiggalaš ja bassi olmmájin ja várjalii su. Go son lei guldalan Johannesa, de son lei muosehuvvan sakka, muhto livččii áinnas dáhtton gullat lasi.

21 Muhto de Herodias oaččui liibba go Herodes doalai riegádanbeaivvi ja fálai guossemállásiid hoavvahearráidasas, soahteveaga oaivámuččaide ja Galilea njunušolbmáide. 22 Herodiasa nieida bođii dalle sisa ja dánssui, ja Herodes ja su guossit liikojedje dasa sakka. Gonagas dajai niidii: “Siđa mus maid ihkinassii dáhtut, de mun attán dan dutnje.” 23 Ja son lohpidii ja vuortnui: “Maid ihkinassii mus dáhtut, de mun attán dan dutnje, vaikko beali iežan riikkas.” 24 Nieida manai olggos ja jearai eatnistis: “Maid mun siđan?” Eadni vástidii: “Siđa Johannes gásttašeaddji oaivvi.” 25 Nieida manai hoahpus ruoktot gonagasa lusa ja dajai: “Mun dáhtun du addit munnje dállánaga Johannes gásttašeaddji oaivvi gári siste.” 26 Gonagas šlunddui, muhto go son lei vurdnon váli gussiid gullut, de son ii sáhttán biehttalit nieiddas dan. 27 Son gohčui bievvala viežžat Johannesa oaivvi. Bievval manai giddagassii ja steavlidii doppe Johannesa. 28 De son buvttii oaivvi gári siste ja attii dan niidii, ja nieida attii oaivvi eadnásis. 29 Go Johannesa máhttájeaddjit gulle dan, de sii bohte viežžat rupmaša ja hávdádedje dan.

Jesus galleha vihttaduhát olbmá

30 Apostalat čoahkkanedje fas Jesusa lusa ja muitaledje sutnje buot maid ledje dahkan ja maid oahpahan. 31 Son celkkii sidjiide: “Vulget muinna ávdin báikái gos beassat leat sierranassii, vai oažžubehtet vuoiŋŋastit uhccánaš.” Olbmot oainnat bohte ja manne geažos áigge, eaige máhttájeaddjit bállen oppa boraditge. 32 De sii vulge fatnasiin ávdin báikái gos sáhtte leat sierranassii. 33 Muhto olbmot oidne sin vuolgimin ja máŋgasat ožžo diehtit dan. Olbmot bohte viega buot gávpogiin ja jovde dohko ovdal sin. 34 Go Jesus manai fatnasis gáddái, de son oinnii buot daid olbmuid ja árkkášii sin njuorrasit, danne go sii ledje dego sávzzat main ii lean geahčči. Son oahpahišgođii sin ja sártnui sidjiide guhká.

35 Go beaivi lei juo nohkamin, de máhttájeaddjit bohte su lusa ja dadje: “Dát báiki lea ávdin, ja lea juo maŋŋit. 36 Vuolggat olbmuid dáppe eret, vai sii besset mannat lagaš báikkiid dáluide oastit alcceseaset borramuša.” 37 Muhto Jesus vástidii sidjiide: “Addet dii ieža sidjiide borramuša.” Sii dadje sutnje: “Galggašeimmetgo mii vuolgit oastit láibbiid guvttiinčuđiin denárain ja addit daid sidjiide borrat?” 38 Son jearai: “Galle láibbi dis leat? Mannet geahččat!” Sii dahke nu ja de dadje: “Vihtta, ja guokte guoli.” 39 Jesus gohčui sin bidjat olbmuid čohkkát dohkiid dohkiid ruonas rássegieddái. 40 Olbmot čohkánadde eatnamii dohkiid dohkiid, muhtun dohkiide čuođi ja muhtun dohkiide vihttalogi. 41 De son válddii dan vihtta láibbi ja guokte guoli, geahčai bajás albmái ja buressivdnidii daid. De son doadjalii láibbiid ja attii bihtáid máhttájeddjiidasas, ja sii juogadedje daid olbmuide. Dan guokte guolige son juogadii buohkaide. 42 Buohkat borre ja gallánedje. 43 Maŋŋil čohkkejedje láibebihtáid ja guliid, guoktenuppelohkái veaddelihti dievva. 44 Vihttaduhát olbmá ledje leamaš boradeamen.

Jesus vádjola čáhcegierragis

45 De Jesus gohčui máhttájeddjiidis mannat fatnasii ja vuolgit jávrri nuppi beallái Betsaidai, dan botta go son ieš vuolggaha olbmuid eret. 46 Go son lei váldán sis earu, de son manai várrái rohkadallat.

47 Go eahket lei šaddan, de fanas lei gasku jávrri ja Jesus lei okto gáttis. 48 Son oinnii ahte máhttájeaddjit rahče suhkat vuostebiggii. Njealját idjagohcinvuorus son bođii sin guvlui vádjolemiin čáhcegierragis ja áiggui mannat sin meattá. 49 Go sii oidne su vádjoleamen čáhcegierragis, de sii doivo su gobmin ja huikigohte. 50 Sii buohkat oidne su ja suorganedje. Muhto seammás Jesus sártnui sidjiide: “Lehket roahkkadat, mun dat lean. Allet bala!” 51 Son lávkii fatnasii sin lusa, ja biegga ložžii. Máhttájeaddjit hirpmástuvve sakka ja ovddošedje. 52 Sii eai lean jierbman dasge mii dáhpáhuvai láibbiide. Sin váibmu lei nu buššon.

Buohccit buorránit

53 Go sii ledje ollen jávrri rastá, de sii bohte gáddái Gennesaretis. 54 Seammás go sii lávkejedje fatnasis, de olbmot fuobmájedje gii lei boahtán. 55 Sii vulge hoahpus doalvut sáni oppa dan guvlui. Olbmot guoddigohte buhcciid guoddinseaŋggain dohko gos sii gulle Jesusa leamen. 56 Ja gosa ihkinassii son bođii giliide, gávpogiidda dahje dáluide, de olbmot bukte buhcciid šiljuide ja ánuhedje beassat guoskkahit su bivttasdiehpi. Ja buohkat geat guoskkahedje su, buorránedje.

Les vår personvernserklæring
Skjemaet er beskyttet av reCAPTCHA og Googles Privacy Policy og Terms of Service gjelder.