1 Gula sátnedoalvu lávkkiid,
son boahtá váriid badjel ja gulaha ráfi.
Doala basiidat, Juda,
ja deavdde lohpádusaidat.
Dasgo bahádáhtolaš ii goassege šat
mana du čađa.
Son lea áibbas duššaduvvon.
Ninive loahppa
2 Duššadeaddji boahtá du vuostá, Ninive.
Várut ladni, geahča geaidnoráigge!
Boahkánastte alimiiddát,
leage gievra ja fámolaš!
3 Dál Hearrá čuoččáldahttá
Jakoba stuorisvuođa
ja Israela stuorisvuođa.
Speaddjit leat speadjan sin
ja billistan sin viidnegárddiid.
4 Soahteolbmáid galbbat ruoksájit,
gievrrat leat gárvodan purpura,
vovnnaid stálli šealgu dego dolla.
Vovnnat biddjojuvvojit soahttán láhkái,
heasttat leat mášoheamit.
5 Vovnnat mannet deama gáhtaid mielde,
dat šuvget šiljuid rastá.
Dat čuvget dego spáidarat,
álddagasaid láhkái dat mannet ovdan.
6 Son rávká oaivámuččaidis,
sii guosadit áŋgirvuođasteaset,
sii dopmet muvrra guvlui
ja galbadáhkki ceggejuvvo.
7 Eanu beale poarttat rabastuvvojit,
ja tempel suoibu.
8 Almmidronnet buktojuvvo
oidnosii ja nuolahuvvo.
Su bálvaleaddjinissonat dolvojuvvojit eret,
sii váidalit dego duvvát
ja čorbmadit ratti morrašis.
9 Ninive lea dego láddu
mas čáhci golgá eret.
“Bisánehket! Bisánehket!”
Muhto ii oktage máhca.
10 Rievidehket silbba, rievidehket golli!
Dáppe leat nohkameahttun riggodagat,
badjelmearálaččat mávssolaš dávvirat!
11 Guorus, ávdin ja gurrejuvvon!
Ballán váimmut ja suoibu čippit,
buohkaid alimat doarggistit,
juohke ámadadju šovkkoda.
12 Gos dál lea ledjoniid biedju,
nuorra ledjoniid borransadji
gos rávjáledjon vádjolii njiŋŋelasain,
iige oktage baldán daid čivggaid?
13 Ledjon gaikkodii galle
čivggaidis biebmun,
buvihii bivddu njiŋŋelasaidasas,
devddii iežas bieju sállašiin,
orrunsajis gaikkoduvvon ráppiiguin.
14 Dál mun jorgalan du vuostá,
cealká Hearrá, Almmiveagaid Ipmil.
Du riggodat šaddá suovvan,
miehkki loahpaha du nuorra ledjoniid.
Buot du sállaša mun heavahan,
iige du áirasiid jietna gullo šat eambbo.