Gávpoga vuoiggalaš ráŋggáštus
1 Vuoi varragávpoga
man dievva lea gielisvuohta
ja rieviduvvon sálaš!
Ii goassege noga stajádus.
2 Gula, spižát spohkket,
juvllat skorret,
heasttat ruhttet,
vovnnat skirvanaddet.
3 Riidejeaddjit bahkkejit ovdan,
miehkit šelgot,
sáittit álddagastet.
Goddojuvvon olbmot dievva, liikagubat,
lohkameahttun ollu jábmit,
olmmoš jorraladdá liikkaide.
4 Nu šattai dán liekkus čáppa fuorá
eatnatgeardásaš furrošeami dihte.
Son lei čeahppi noidošit,
son čanai álbmogiid fuorrávuođainis,
čearddaid noidošemiinis.
5 Dál mun jorgalan du vuostá,
cealká Hearrá, Almmiveagaid Ipmil.
Mun bajidan du vuolppu
badjel du muođuid
ja čájehan álbmogiidda du álásvuođa,
riikkaide du heahpada.
6 Mun bállahastalan du durddiin,
heahppášuhtán du,
bijan du geahčadeamošin.
7 Buohkat geat oidnet du
jorgalit dutnje selggiid ja dadjet:
“Ninive lea hearjiduvvon,
gii dan árpmoštalašii?
Leago oktage gii jeđđe su?”
Bilkolávlla Ninive birra
8 Leatgo don buoret go No Amon,
mii lei Nileanu gáttis, čáziid gasku?
Eatnu lei dan suodji, čáhci dan muvra.
9 Nubia ja Egypta adde gávpogii
dan stuorra fámu,
Put ja Libya ledje dan doarjagat.
10 Dattetge dan álbmot dolvojuvvui veagal,
datnai fertii mannat fáŋgavuhtii.
Velá sin mánážatge cuvkejuvvojedje
buot gáhtačiegain.
Allanálat olbmát vuorbádallojuvvojedje,
buot dan stuorrát biddjojuvvojedje láhkkiide.
11 Maiddái don juhkaluvat
nu ahte mielahuvat.
Maiddái don galggat ohcat suoji
vašálačča ovddas.
12 Buot du ladnit leat dego fiikonmuorat
main leat árra šaddosat:
Jos dat savdnjiluvvojit,
de dat gahččet dan njálbmái
gii dáhttu daid borrat.
13 Geahča: Du soahteolbmát
leat dego nissonat.
Du eatnama poarttat
leat rabastuvvon vašálažžii.
Dolla lea loaktán du poartabummaid.
14 Goaivvo alccesat čázi
birastahttojumi várás,
nanne ladniidat!
Steaččo rábáha, duolmma láirrá,
dohppe diilageađgefoarpma!
15 Dolla loaktá du, miehkki loahpaha du,
borrá du dego rásselohkkosuoksa,
vaikko dii lehpet ollugat
dego rásselohkkosuovssat,
eatnagat dego rásselohkkomoahti.
16 Vaikko du gávpeolbmát livčče eanebut
go almmi násttit,
de dat leat dego suovssat
mat guđđet gara ja girdilit.
17 Du virgeolbmát leat eatnagat
dego rásselohkut,
du čállit nugo rásselohkkomoahti
mii seaivu muvrra ala,
go beaivi jálddosma,
muhto go beaivváš badjána,
de dat girdilit,
iige oktage dieđe gosa dat šadde.
18 Du báimmanat snahppojit,
Assyria gonagas,
du oaivámuččat ođđet.
Du álbmot lea bieđganan váriide,
iige oktage čohkke dan.
19 Du vihkái ii leat geahpádus,
du hávvi ii leat buorideames.
Buohkat geat gullet ságaid du birra,
spežžot gieđaid.
Giiba ii livčče deaivvahallan
du heaittekeahtes bahávuhtii?