1 Profehtasátni Ninive birra. Elkošlaš Nahuma oainnáhusaid girji.
Hearrá mávssaha vuostálastiidasas
2 Hearrá lea áŋgiris ja mávssaheaddji Ipmil.
Hearrá lea mávssaheaddji ja dievva moari.
Hearrá mávssaha vuostálastiidasas.
Vašálaččaidis son ii heaitte vašuheames.
3 Hearrá lea gierdavaš,
muhto su fápmu lea stuoris,
ii son guođe sivalačča ráŋggáškeahttá.
Riđus ja garra dálkkis manná su geaidnu,
balvvat leat su julggiid gavja.
4 Son šiggu meara ja goikada dan,
buot jogaid son dahká goikkisin.
Bašan ja Karmel vuoimmehuvvet,
Libanona lieđit goldnet.
5 Várit doarggistit su ovddas,
dievát suddet.
Hearrá duššada eatnama,
máilmmi ja buohkat geat orrot das.
6 Gii bihtá su vašis,
gii gierdá su buolli moari?
Su suhttu russu nugo dolla,
ja bávttit luoddanaddet su ovddas.
7 Hearrá lea buorre,
son lea suodji áŧestusa beaivvi.
Son atná fuola dain geat dorvvastit sutnje.
8 Nugo veagalaš dulvebárru
son duššada vuostálastiidis
ja ádjá vašálaččaidis seavdnjadassii.
9 Maid dii hutkabehtet Hearrá vuostái?
Son duššada vašálaččaid,
áŧestus ii deaivit din nuppádis.
10 Sii bullet dego bastilislátnjásorri,
dego oaksegihppu,
dego ollásit goikan oalggat.
11 Dus vulggii olmmái
gii hutkkai baháid Hearrá vuostá
ja attii bahádáhtolaš ráđiid.
12 Ná cealká Hearrá:
Sii leat gievrrat ja sii leat eatnagat,
muhto sii časkojuvvojit eatnamii ja duššet.
Mun lean givssidan du,
muhto in šat daga dan.
13 Dál mun doaján geassá
maid son bijai du niskái,
ja cuvken du láhkkiid.
14 Ná Hearrá lea mearridan
du hárrái, Ninive:
Du namma nohká.
Du tempelis mun duššadan
čuhppojuvvon ja leikejuvvon ipmilgovaid.
Mun ráhkadan dutnje hávddi,
don it leat šat mihkkege.