Bibelsøk

Søk
Velg oversettelse
Hvor finner jeg...

.

Tilbake til oversikten

Njealját Mosesgirji

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36

< Forrige kapittelNeste kapittel >
24Bileam ipmirdii dál ahte lei Hearrá dáhtu mielde buressivdnidit Israela. Son ii mannan šat ohcat mearkkaid nugo ovdal, muhto jorgalii muođuid meahci guvlui.  2 Go son geahčái dohko, de son oinnii israellaččaid geat ledje luoitalan čearddaid mielde. Dalle Ipmila vuoigŋa bođii sutnje,  3 ja son sártnui dáid sániid:
        
          Ná sárdnu Bileam, Beora bárdni,
          ná sárdnu olmmái gii oaidná čielgasit,
          
   
 4 ná olmmái gii gullá Ipmila sárdnuma,
          gii Alimusa dieđuin, eatnamii luoitádan
          oažžu rabas čalmmiid geahčadit
          Buotveagalačča oainnáhusaid:
          
   
 5 Man čábbát leat du goađit, Jakob,
          du orrunsajit, Israel!
          
   
 6 Dat leabbanit nugo ruonas leagit,
          dat leat nugo šaddogárddit eatnogáttis,
          nugo aloemuorat maid Hearrá lea gilván,
          nugo sedermuorat čáhcegáttis.
          
   
 7 Čáhci stilču sin eabbáriin,
          ja sin gilvin láktaduvvo valjis.
          Sin gonagas šaddá stuoribun go Agag,
          su gonagasvuohta lea veagalaš.
          
   
 8 Ipmil buvttii sin Egyptas;
          sin fápmu lea dego meahcivuovssá givrodat.
          Sii loahpahit vašuheaddji álbmogiid,
          dodjet sin dávttiid, cuvkejit sordiid.
          
   
 9 Go sii vuoiŋŋastit,
          de sii leat gorjon dego ledjon,
          dego njiŋŋelas ledjon –
          gii duostá sin muosehuhttit?
          Buressivdniduvvon lehkos dat
          geat du buressivdnidit,
          garuhuvvon dat geat du garuhit.

   
10 Dalle Balak moaráskii Bileamii, spežžii gieđaidis oktii ja dajai: “Mun rávken du deike garuhit iežan vašálaččaid, muhto dál don leat juo golbmii buressivdnidan sin! 11 Mana geidnosat! Mun áigon bálkkašit du valjit, muhto Hearrá lea biehttalan dus bálkká.” 12 Bileam dajai Balakii: “Munhan dadjen du áirasiidda geaid vuolggahit mu lusa: 13 Vaikko Balak attášii munnje buot golli ja silbba šloahtastis, de mun in almmatge sáhtáše rihkkut Hearrá báhkkoma inge dahkat maidege iežan dáhtu mielde, in buori inge bahá. Maid Hearrá sárdnu, dan munge ferten sárdnut. 14 Mun máhcan dál iežan álbmoga lusa, muhto dál mun várren du das maid dát álbmot dahká du álbmogii boahtti beivviid.” 15 Ja son sártnui dáid sániid:
        
          Ná sárdnu Bileam, Beora bárdni,
          ná sárdnu olmmái gii oaidná čielgasit,
          
   
16 ná olmmái gii gullá Ipmila sárdnuma,
          gii Alimusa dieđuin, eatnamii luoitádan
          oažžu rabas čalmmiid geahčadit
          Buotveagalačča oainnáhusaid:
          
   
17 Mun oainnán su, in dattetge dál,
          mun geahčadan su, in dattetge lahka.
          Násti badjána Jakoba gasku,
          ráđđejeaddji soabbi Israelis.
          Son cuvke Moaba geađđaša,
          buot Seta bártniid oaivečohka.
          
   
18 Edom šaddá su opmodahkan,
          Seir gahččá su gihtii.
          Israel čájeha iežas fámu.
          
   
19 Ráđđejeaddji boahtá Jakobis,
          son duššada gávpogiin daid
          geat ain leat báhcán.

   
20 Go Bileam oinnii amaleklaččaid, de son sártnui dáid sániid:
        
          Amalek lea álbmogiin vuosttamuš,
          muhto su nálli duššaduvvo agálaččat.

   
21 Go Bileam oinnii kenlaččaid, de son sártnui dáid sániid:
        
          Nanus lea du ássansadji,
          bávtti ala du beassi lea huksejuvvon.
          
   
22 Muhto almmatge Kain heavahuvvo;
          Man guhká lea dasa go Assur
          doalvu du fáŋgavuhtii?

   
23 Bileam sártnui vel dáid sániid:
        
          Sulluid álbmogat čoahkkanit davvin,
          
   
24 skiippat bohtet kittelaččaid rittuin.
          Dat vuolidit Assura, vuolidit Ebera,
          muhto maiddái sii duššaduvvojit agibeaivái.

   
25 De Bileam vulggii ja máhcai ruoktot báikásis, ja maiddái Balak manai geidnosis.
< Forrige kapittelNeste kapittel >