Njealját Mosesgirji

Nasiraláhka

¹ Hearrá sártnui Mosesii:

² Cealkke israellaččaide: Jos muhtun olmmái dahje nisson dahká duođalaš lohpádusa doallat iežas sierra vai beassá leat Hearrá nasiran, ³ de son ii oaččo juhkat viinni ja garra juhkamuša. Son ii oaččo juhkat etteha mii lea dahkkojuvvon viinnis dahje garra juhkamušas, ii juhkat viidnemuorjesáhpi iige borrat varas dahje goikaduvvon viidnemurjjiid. ⁴ Nu guhká go son lea nasiran, de son ii oaččo borrat maidege maid viidnemuoras oažžu, ii siskkoža iige garaid. ⁵ Nu guhká go su nasiralohpádus bistá, de ráhkenniibi ii oaččo boahtit su oaivái. Nu guhká go son lea Hearrá nasiran, de son lea bassi ja galgá diktit vuovttaidis šaddat veaiddalis. ⁶ Buot daid beivviid maid son lea Hearrá nasiran, de son ii oaččo mannat jábmi lahka. ⁷ Vaikko sus jámášii áhčči dahje eadni, viellja dahje oabbá, de son ii oaččo dahkat iežas buhtismeahttumin sin dihte. Su vuovttat leat mearkan das ahte son lea Ipmila nasira. ⁸ Nu guhká go son lea nasiran, de son lea basuhuvvon Hearrái.

⁹ Jos muhtun fáhkkestaga jápmá su lahka, nu ahte su nasiravuovttat šaddet buhtismeahttumin, de son galgá ráhket oaivvi báljisin dan beaivvi go son fas lea buhtis; čihččet beaivvi son galgá ráhket oaivvi. ¹⁰ Gávccát beaivvi son galgá buktit guokte turtelduvvá dahje guokte eará duvvá báhppii almmustusgoađi uvssa ovdii. ¹¹ Báhppa galgá oaffaruššat nuppi suddooaffarin ja nuppigis boaldinoaffarin. Ná báhppa doaimmaha sutnje soabahusa dan suttu dihte maid son dagai go guoskkahii rupmaša. Seammá beaivvi son galgá fas basuhit oaivvis ¹² vai livččii Hearrá nasiran nu guhká go álggus lei lohpidan. Vealgeoaffarin son galgá buktit jahkásaš lábbá. Vuosttaš beaivvit eai lohkkojuvvo, danin go su nasiramearka lei šaddan buhtismeahttumin.

¹³ Dát lea nasiraláhka. Go nasiraáigi lea dievvan, de nasira galgá boahtit almmustusgoađi uvssa ovdii ¹⁴ ja buktit Hearrái boaldinoaffarin jahkásaš viercalábbá mii lea almmá vigi haga, suddooaffarin jahkásaš njiŋŋelas lábbá mii lea almmá vigi haga ja searvevuođaoaffarin viercca mii lea almmá vigi haga, ¹⁵ veaddelihti dievva suvrutkeahtes láibbiid mat leat ráhkaduvvon sevlejuvvon jáffuin, oljjuin láibojuvvon gáhkuid ja oljjuin vuidojuvvon suvrutkeahtes láibbážiid ja velá borramušoaffara ja juhkamušoaffara mat gullet daidda. ¹⁶ Báhppa galgá doalvut buot daid Hearrá muođuid ovdii ja oaffaruššat suddooaffara ja boaldinoaffara, ¹⁷ oaffaruššat viercca searvevuođaoaffarin Hearrái ja oktan dainna veaddelihti dievva suvrutkeahtes láibbiid ja vel oaffaruššat borramušoaffara ja juhkamušoaffara.

¹⁸ Nasira galgá almmustusgoađi uvssa ovddas ráhket eret nasiravuovttaidis ja bálkestit daid dollii mii buollá searvevuođaoaffara vuolde. ¹⁹ Go vierca lea vuššojuvvon, de báhppa galgá váldit das čoamohasa ja vel nasira veaddelihtis suvrutkeahtes gáhku ja suvrutkeahtes láibbáža ja bidjat daid nasira gihtii maŋŋil go nasira lea ráhken eret nasiravuovttaidis. ²⁰ De báhppa galgá bajidit biepmuid oaffarin Hearrá muođuid ovddas. Dat lea basuhuvvon báhppii, nugo maiddái mielga mii bajiduvvo ja čoarbbealli mii lea addojuvvon oaffarin. Das maŋŋil nasira oažžu fas juhkat viinni.

²¹ Dát láhka gusto nasirii ja daidda oaffarattáldagaide maid son nasiralohpádusas geažil lea geatnegas buktit Hearrái. Daidda lassin son oažžu velá addit maid suitá. Son galgá maiddái dahkat visot maid lea lohpidan nasiralága gáibádusaid lassin.

Hearrá buressivdnádus

²² Hearrá sártnui Mosesii:

²³ Cealkke Aronii ja su bártniide: Go dii buressivdnidehpet Israela, de celket ná:

²⁴ Hearrá buressivdnidivččii du

ja várjalivččii du,

²⁵ Hearrá čuvgešii muođuidis dutnje

ja livččii dutnje árbmugas.

²⁶ Hearrá jorgalivččii čalmmiidis

du ala

ja attášii dutnje ráfi.

²⁷ Go sii ná buressivdnidit Israela mu nammii, de mun buressivdnidan dan.