Kristusa vuollegašvuohta
1 Jos Kristusa ráhkisvuohta jeđđe ja arvvosmahttá min, jos Vuoiŋŋa searvevuohta čatná min oktii ja jos mii dovdat láđisvuođa ja árkkálmastinvuođa guhtet guimmiideametguin, 2 de dahket mu ilu ollisin ja lehket ovttamielalaččat. Ellet seammá ráhkisvuođas ja seammá miellalágis, 3 allet daga maidege iešbuorrevuođas dahje gudneáŋgirvuođas, muhto atnet vuollegašvuođas earáid alibun go iežadet. 4 Allet háhpohala dušše iežadet ávkki, muhto maiddái earáid ávkki. 5 Lehkos dis seammá miellaláhki mii Kristus Jesusis lei.
6 Sus lei Ipmila hápmi,
muhto son ii atnán iežas vuoigatvuohtan
leat Ipmila veardásaš.
7 Son hilggui buot mii sus lei,
válddii bálvaleaddji hámi
ja šattai olbmuid láhkásažžan.
Son elii olmmožin olbmuid gaskkas,
8 son vuolidii iežas
ja lei gulolaš jápmima rádjái,
velá ruossajápmima rádjái.
9 Dan dihte Ipmil lea alidan su badjelii buot
ja addán sutnje nama
mii lea badjel buot namaid.
10 Jesusa nammii buohkat šaddet čippostit,
buohkat geat leat almmis, eatnama alde
ja eatnama vuolde,
11 ja juohke njuovčča šaddá dovddastit
ahte Jesus Kristus lea Hearrá,
Ipmil Áhččái gudnin.
Ipmila mánát máilmmis
12 Dan dihte, ráhkkásiiddán, nugo dii lehpet jeagadan mu álo go lean leamaš din luhtte, de jeagadehket sakka eambbo dál go mun orun eret: Barget bestojuvvot baluin ja doarggistemiin. 13 Dasgo Ipmil lea dat guhte duddjo din siste vai dii sihke dáhttubehtet ja dahkabehtet dan mii lea su buori dáhtu mielde. 14 Dahket buot nimmorkeahttá ja almmá ákkaid haga 15 vai šaddabehtet láitemeahttumin ja buhtisin, Ipmila máinnehis mánnán dán gážžáris jorggu buolvva gaskii. Dii báitibehtet dego násttit almmis 16 go doallabehtet gitta eallima sánis, ja mun beasan rámádallat Kristusa beaivvi das ahte in leat viehkan ja rahčan duššás. 17 Vaikko vel mu varrage golggahuvvošii go mun buvttán din oskku oaffarin Ipmilii, de mun dattetge lean ilus ja ávvudan dinguin buohkaiguin. 18 Lehket maiddái dii ilus ja illudehket oktan muinna.
Timoteus ja Epafroditus
19 Hearrá Jesus lea addán munnje dan doaivvu ahte mun fargga beasan vuolggahit Timoteusa din lusa, vai maiddái mun arvvosmuvan go gulan didjiide ságaid. 20 Mus ii leat oktage su láhkásaš, ii oktage gii nu vuoiggalaččat anášii dis fuola, 21 danin go buohkat bivdet dušše iežaset ávkki eaige dan mii gullá Jesus Kristusii. 22 Muhto Timoteusa oskkáldasvuođa dii dovdabehtet: Son lea oktan muinna ovddidan evangeliuma dego bárdni gii bálvala áhčis. 23 Mun sávan beassat vuolggahit su din lusa nu fargga go oainnán mo munnje geavvá. 24 Ja mun luohtán Hearrái ahte mun ieš fargga beasan boahtit din lusa.
25 Dál mun goit šattan vuolggahit din lusa vielljamet Epafroditusa, iežan guoimmi barggus ja soađis. Son lea maid din áirras gii bođii veahkehit dalle go mun dárbbašin veahki. 26 Son ohcala din buohkaid ja lea morrašis go dii leiddet gullan ahte son lei buohcamin. 27 Buohcamin son maid lei, goasii jápmimin, muhto Ipmil árpmihii su, iige dušše su muhto maiddái mu, aman oažžut ođđa morraša lassin ovddežiidda. 28 Dan dihte mun dađe movttegeappot vuolggahan su din lusa, vai beassabehtet illudit go fas oaidnalehpet, ja vai munge livččen uhcit morrašis. 29 Váldet su vuostái stuora iluin Hearrá nammii ja gudnejahttet su lágan olbmuid. 30 Dasgo Kristusa barggu dihte son goasii jámii. Son bijai iežas heakkavárrii vai beasai addit munnje dan veahki maid dii ehpet sáhttán addit.