1 Dat gii ráhkista bagadusa,
ráhkista dieđu,
doavki lea dat gii vašuha cuiggodusa.
2 Buorre olmmoš oažžu árpmu Hearrás,
behtolaš olbmo son dubme sivalažžan.
3 Bahávuohta ii atte olbmui coavcci,
muhto vanhurskásiid ruohtas
ii lihkahuvvo.
4 Hágas áhkká lea boadnjás kruvdnu,
guttaheapme lea dego
dávttiid guohcageapmi.
5 Vanhurskásiid mearri
lea vuoiggalašvuohta,
ipmilmeahttumiid ulbmi lea beahtus.
6 Ipmilmeahttumiid ságat
vuđgŋet vara,
vuoigatlaččaid sánit gádjot sin.
7 Ipmilmeahttumat njeidojuvvojit
eaige šat leat,
vuoigatlaččaid viessu
bissu nanusin.
8 Nu olmmoš rámiduvvo
go sus lea jierbmi,
duihmi šaddá badjelgeahčahassan.
9 Buoret badjelgehččojuvvon olmmoš
geas lea bálvá
go stuorástalli geas váilu láibi.
10 Vuoigatlaš olmmoš
atná fuola omiinis,
ipmilmeahttumiid váibmu
lea árpmuheapme.
11 Dat gii gilvá bealddus,
borrá gallás,
gii háhpohallá guorusvuođa,
lea jierpmeheapme.
12 Ipmilmeahttuma hálidus
lea bahái,
vanhurskásiid ruohtas lea nanus.
13 Ipmilmeahttuma behtolaš sánit
šaddet sutnje giellan,
vanhurskkis beassá áŧestusas.
14 Njálmmi sánit gallehit olbmo,
su gieđaid dagut
máksojuvvojit sutnje.
15 Jalla atná iežas vádjolusa vuoigadin,
viissis dat gii guldala rávvagiid.
16 Jalla moarri gulustuvvá dallánaga,
viissis olmmoš ii beroš
juohke bilkosánis.
17 Ávdás duođašteaddji muitala duođa,
vearreduođašteaddji sárdnu behttosa.
18 Jurddaškeahtes sánit
čuggejit dego miehkki,
viisáid sárdnun dálkkoda.
19 Duohta sánit bissot agálaččat,
behtolaš ságat
dušše čalbmeravkalanbotta.
20 Juonalaččaid váimmus lea beahtus,
dat geat nevvodit buorrái, besset illudit.
21 Ii mihkkege baháid
deaivit vuoigatlačča,
ipmilmeahttumiin
leat ollu lihkuhisvuođat.
22 Hearrá fasttáša gielis olbmuid,
vuoigatlaččat leat su miela mielde.
23 Jierpmálaš olmmoš čiehká
maid diehtá,
doavki gulaha
iežas diehtemeahttunvuođa.
24 Viššalis giehta oažžu fámu,
láikodat doalvu šlávvabargui.
25 Moraš losidahttá olbmo váimmu,
ustitlaš sátni illudahttá dan.
26 Vanhurskkis vealtá bahás,
ipmilmeahttumiid geaidnu čádjidahttá.
27 Láiki ii fidne sállaša,
viššalis olmmoš
oažžu mávssolaš dávviriid.
28 Vanhurskkisvuođa bálgás
lea eallin,
dat geaidnu ii leat jápmima geaidnu.