1 Viissisvuohta hukse viesus,
jallavuohta gaikkoda dan iežas gieđaiguin.
2 Dat gii ballá Hearrás,
vádjola njulges geainnuid,
dat gii manná mohkkegeainnuid,
badjelgeahččá Hearrá.
3 Jalla sánit šaddet rissin
su iežas sealgái,
viisáid baksamat leat sin várjalus.
4 Geas eai leat vuovssát,
dan krubbá lea guorus,
gievrras burruid fámus
boahtá buorre šaddu.
5 Oskkáldas duođašteaddji ii gielástala,
vearreduođašteaddji vuoigŋá giellásiid.
6 Bilkár ohcá viissisvuođa duššás,
jierpmálaš fidne dieđu álkit.
7 Gáidda doavkki luhtte,
su ságain it gávnna dieđu.
8 Jierpmálačča viissisvuohta lea
dovdat iežas geainnu,
jallaid jallavuohta beahttá.
9 Bilkára viesus ássá sivalašvuohta,
muhto árbmu vuoigatlaš olbmuid luhtte.
10 Váibmu dovdá iežas bákčasa,
iige dan ilu sáhte juogadit earáiguin.
11 Ipmilmeahttumiid viessu
heavahuvvo,
vuoigatlaččaid goahti bissu.
12 Dat geaidnu mii orru olbmái
vuoigadin,
lea dattetge jápmima geaidnu.
13 Velá boagusteamisge
váibmu sáhttá bávččastit,
go illu nohká, de moraš báhcá.
14 Ávddahis olmmoš oažžu
maid ánssáša,
nu maiddái buorre olmmoš.
15 Dáidemeahttun jáhkká juohke sátnái,
jierpmálaš olmmoš váruha lávkkiidis.
16 Viissis ballá bahás ja garvá dan,
jalla lea rámppas iige ádde ballat.
17 Hohppos olmmoš dahká jallavuođaid,
loavddes olmmoš gudnejahttojuvvo.
18 Jallavuohta lea dáidemeahttumiid
hearva,
jierpmálaččaid oaivvis
lea dieđu gudnegierdu.
19 Bahát šaddet gopmirdit
buriid olbmuide,
ipmilmeahttumat
vanhurskásiid poarttaid guoras.
20 Velá geafitge vašuhit
geafes olbmo,
riggás leat ustibat eatnat.
21 Dat gii badjelgeahččá lagamuččas,
sudduda,
lihkolaš dat gii árpmiha vártnuheami.
22 Juonalaččat čádjidit,
dat geain leat buorit áigumušat,
ožžot buorrevuođa ja oskkáldasvuođa.
23 Buot rahčamuš
buktá valljugasvuođa,
guoros ságat dušše vahága.
24 Riggodat lea viisáid kruvdnu,
dovkkiid gudnegierdu lea jallavuohta.
25 Oskkáldas duođašteaddji
gádju heakka,
gielisteaddji beahttá.
26 Das gii ballá Hearrás,
lea nana suodji,
su mánát ožžot das báhtaransaji.
27 Hearrá ballu lea eallima ája,
dat veahkeha vealtat jápmima gielain.
28 Álbmoga eatnatvuohta
lea gonagasa gudni,
olbmuid vátnivuohta šaddá
ráđđejeaddji heavvun.
29 Gierdavaččas lea eatnat ipmárdus,
hohpposmielat lasiha iežas jallodaga.
30 Lojes váibmu lea rupmaša eallin,
gáđašvuohta guohcagahttá dávttiid.
31 Dat gii soardá vártnuheami,
bilkida su sivdnideaddji,
dat gii veahkeha váivváša,
gudnejahttá Ipmila.
32 Ipmilmeahttun jorrala bahávuohtasis,
vuoigatlašvuohta
suodjala vanhurskása.
33 Viisodat vuoiŋŋasta
jierpmálaš olbmo váimmus,
muhto jallaid gaskkas dat lea amas.
34 Vanhurskkisvuohta
lea álbmoga gudni,
muhto suddu lea álbmogiid heahpat.
35 Gonagas liiko jierpmálaš
bálvaleaddjái,
guttaheapmái son moaráhuvvá.