1 Láđis vástádus loažžuda suhtu,
nordašuhtti sánit boktet moari.
2 Viisáid sárdnumis goaiku diehtu,
dovkkiid njálmmis golgá jallodat.
3 Hearrá geahčastat ollá juohke báikái,
dat vákšu sihke baháid ja buriid.
4 Njuokčama lodjivuohta
lea eallima muorra,
behtolaš sátni bávččagahttá.
5 Jalla hilgu áhčis bagadusa,
jierpmálaš váldá vuhtii cuiggodusa.
6 Vanhurskása viesus
lea stuorra riggodat,
ipmilmeahttuma dienas
manná duššás.
7 Viisáid sánit gilvet dieđu,
jallaid jurdagat čádjádaddet.
8 Ipmilmeahttumiid oaffara
Hearrá fasttáša,
vuoigatlaččaid rohkadus
lea sutnje dohkálaš.
9 Ipmilmeahttuma vádjolusa
Hearrá fasttáša,
dan gii váinnuha vanhurskkisvuođa,
son ráhkista.
10 Bagadus lea garas dasa
gii spiehkkasa bálgás,
dat gii vašuha cuiggodusa,
galgá jápmit.
11 Jábmiidáimmu čiekŋalas
lea Hearrái almmus,
man sakka eambbo dalle
olbmuid váimmut!
12 Bilkár ii liiko cuiggodussii,
viisáid lusa son ii mana.
13 Ilolaš váibmu čuvge ámadaju,
váimmu moraš hearddohuhttá olbmo.
14 Jierpmálaš olmmoš ohcá dieđu,
doavkkit hupmet aivve duššiid.
15 Buot vártnuhis olbmo
beaivvit leat bahát,
muhto ilolaš váibmu ávvuda čađat.
16 Buoret uhccánaš Hearrá balus
go riggodat ja ollu ráfehisvuohta.
17 Buoret ruonasšaddoborramuš
ja ráhkisvuohta
go vuovssábiergu ja vašši.
18 Hohpposlunddot olmmái
boktá bealkkuid,
guhkesmielalaš olmmoš
jaskkodahttá nákkuid.
19 Láikkes olbmo geaidnu
lea bastilislátnjámiestta,
vuoiggalaččaid geaidnu lea jalgat.
20 Viissis bárdni lea áhčis illu,
doavkkes olmmái badjelgeahččá eatnis.
21 Jallavuohta illudahttá jierpmeheami,
jierpmálaš olmmoš
vádjola njuolga ovddos.
22 Áigumušat šaddet duššin
go ii ráđđádallojuvvo,
dat ovdánit go leat ollu ráđđeaddit.
23 Olmmái illuda go máhttá vástidit –
mii vel buoret go sátni vuogas áigái!
24 Jierpmálaš vádjola bajás
eallima geainnu,
nu son vealtá mannamis
vuolás jábmiidáibmui.
25 Hearrá gaikkoda
čeavlás olbmuid viesu,
muhto leaskka rádjegeađggi son bisuha.
26 Hearrá fasttáša baháid áigumušaid,
muhto ustitlaš sánit leat buhttásat.
27 Dat gii bivdá vearrevuoittu,
goarida iežas viesu,
dat gii vašuha duolgguid, eallá guhká.
28 Vanhurskkis jurddaša
ovdal go vástida,
muhto ipmilmeahttumiid njálmmis
golgá bahávuohta.
29 Hearrá lea guhkkin eret
ipmilmeahttumiin,
muhto vanhurskásiid rohkadusa son gullá.
30 Ustitlaš geahčastat
illudahttá váimmu,
buorre sáhka addá dávttiide ađđama.
31 Dat gii gullá dearvvašlaš cuiggodeami,
beassá viisáid searvái.
32 Dat gii hilgu bagadusa, hilgu iežas,
gii oahppá cuiggodusas,
fidne áddejumi.
33 Hearrá ballu bagada viissisvuhtii,
gudni ovdal manná vuollegašvuohta.