Hearrá addá viisodaga
1 Bártnážan,
jos don válddát vuhtii mu sániid
ja vurket mu báhkkomiid iežat siste,
2 nu ahte jorgalat bealji
gullat viisodaga,
rabastat váimmu ipmárdussii,
3 rávkkat jierpmi
ja čuorvvut jitnosit áddejumi,
4 jos ozat dan dego silbba,
oččodat dan nugo čihkkojuvvon dávviriid,
5 de dalle don ipmirdat Hearrá balu
ja áddet mii lea dovdat Ipmila.
6 Dasgo Hearrá addá viisodaga,
su njálmmis boahtá diehtu ja
ja áddejupmi.
7 Son veahkeha vuoigatlaččaid ovdánit,
son lea daid galba
geat vádjolit láitemeahttumit,
8 son várjala vuoigatvuođa bálgáid
ja gáhtte oskkáldasaidis geainnuid.
9 Dalle don ipmirdat vanhurskkisvuođa,
vuoigatvuođa ja vuoigatlašvuođa,
juohke buori bálgá.
10 Viisodat deavdá du váimmu
ja diehtu addá dutnje ilu,
11 dárkilvuohta lea du gáhttejeaddji,
ipmárdus du várjaleaddji.
12 Dat gádjot du bahás geainnus,
olbmuin geat botnjet duohtavuođa,
13 dain geat leat gáidan njulges bálgáin
ja vádjolit seavdnjadasa geainnuid,
14 geat illudit go dahket bahá
ja ávvudit das mii lea bahá ja jorgut,
15 geat vádjolit mohkkás bálgáid
ja spiehkastit vearrigeainnuide.
16 Viisodat beastá du vierronissonis,
sus gii dahká sániidis livttisin,
17 sus gii lea guođđán
nuorravuođa ustibis
ja vajáldahttán lihtu Ipmiliinnis.
18 Su viessu vuodju jábmiidáibmui,
su geaidnu doalvu jámežiid lusa.
19 Dat geat mannet su lusa,
eai goassege máhca,
eai sii gávnna eallima bálgá.
20 Vádjol don baicce
buriid olbmuid geainnu
ja čuovo vanhurskásiid bálgáid.
21 Vuoigatlaččat ožžot ássat eatnamis,
láitemeahttun olbmot
besset orrut doppe,
22 muhto ipmilmeahttumat
duššaduvvojit eatnamis,
behtolaš olbmot rohttejuvvojit
doppe eret.