1 Viidni lea bilkideaddji,
garra juhkamuš dahká šláma,
dat gii suoibu gárremiin, ii leat viissis.
2 Dego ledjona čeargun
lea gonagasa moarri;
dat gii su moaráhuhttá, rihkku heakkas.
3 Gudni dasa gii vealtá nákkus,
dušše doavkkit hástalit riidui.
4 Láikkes olmmoš ii jorggo
eatnama čakčat
ja láddjenáigge son ii gávnna maidege.
5 Olbmo áigumušat leat dego
čiekŋalis čáhci,
muhto viissis olmmái goaivu daid bajás.
6 Olusat čurvot iežaset oskkáldasvuođa,
muhto gos gávdno luohtehahtti olmmái?
7 Vanhurskkis eallá láitemeahttumit,
lihkolaččat su mánát su maŋŋil.
8 Go gonagas čohkká duopmárstuolus,
de son čuoldá geahčastagainis eret
buot bahás olbmuid.
9 Gii sáhttá dadjat:
Mun lean buhtistan váibmon,
mun lean buhtis suttustan?
10 Guovttelágáš veaktageađggit
ja guovttelágáš mihtut,
goappašagaid Hearrá fasttáša.
11 Juo bártnáža daguin vuohttá,
leago su eallin buhtis ja vuoigat.
12 Gulli beallji ja oaidni čalbmi –
Hearrá lea sivdnidan goappašagaid.
13 Ale ráhkis nahkáriid,
amat šaddat geafin,
lihka árrat, de oaččut borrat gallás.
14 “Heittot, heittot,” dadjá oasti,
muhto go son vuolgá, de son rámida iežas.
15 Golli ja bearralat gal leat ollu,
muhto viissis sánit leat hárvenaš dávvir.
16 Váldde biktasa das
gii lea dáhkidan vierrása ovddas,
váldde pántta go dat guoská
amas olbmui.
17 Behttosa láibi njálggiida,
muhto dasto njálbmi dievvá čievrrain.
18 Áigumušat lihkostuvvet
ráđđádallamiin,
ale soađa ráđđádalakeahttá.
19 Šoambás olmmoš
muitala čiegusvuođaid,
šláttardeaddjis galggat váruhit.
20 Gii garuha áhčis ja eatnis,
dan lámpá čáská suhkkes seavdnjadin.
21 Árbi maid olmmoš ribada
menddo árrat,
ii šatta maŋimustá buressivdnádussan.
22 Ale daja:
“Mun mávssahan dán bahá.”
Vuordde Hearrá, son veahkeha du.
23 Guovttelágáš veaktageđggiid
Hearrá fasttáša,
vearreveavttaid son ii dohkket.
24 Hearrá stivre olbmo lávkkiid.
Mo olmmoš ieš sáhttá ipmirdit
iežas geainnu?
25 Olbmui lea váralaš addit
bassi lohpádusaid
ja easkka maŋŋil jurddašit.
26 Viissis gonagas čuoldá
ipmilmeahttumiid eret,
diktá gordnenjuvlla jorrat
sin badjel.
27 Hearrá goziha olbmo eallinvuoiŋŋa
ja suokkarda su siskkildasa.
28 Buorrevuohta ja duohtavuohta
várjalit gonagasa,
oskkáldasvuođain son doarju
iežas truvnnu.
29 Fápmu lea nuoraid goargu,
čurges vuovttat vuorrasiid gudni.
30 Buhtástussan leat bahás olbmui
guvhllit ja hávit,
časkkástagat ráidnejit olbmo siskkildasa.