1 Buorre beaggin lea mávssoleabbo
go stuorra riggodat,
árvvus adnojupmi lea buoret
go golli ja silba.
2 Rikkis ja geafi gávnnadeaba:
Hearrá lea sivdnidan goappašagaid.
3 Jierpmálaš oaidná vára ja čiehkáda,
dáidemeahttumat mannet ovdan
ja šaddet gillát.
4 Vuollegašvuođa ja Hearrá balu bálká
lea riggodat, gudni ja eallin.
5 Behtolaš olbmo geainnus
leat bastilislánját ja gielat,
dat gii dáhttu gádjut heakkas,
váruha dain.
6 Oahpis nuorra olbmo dan geidnui
man son galgá vádjolit,
de son ii spiehkkas das boarisinge.
7 Rikkis lea geafi hearrá,
loatnaváldi šaddá lonejeaddji šlávvan.
8 Dat gii gilvá vearrivuođa,
láddje lihkuhisvuođa;
su moari rissi doddjo.
9 Utnolaš olmmoš buressivdniduvvo,
dainna go son attii láibbistis váivvášii.
10 Áje bilkára eret,
de bealku manná su mielde,
ja nággu ja heahppášuhttojupmi nohká.
11 Dat gii ráhkista buhtis váimmu
ja sárdnu liggosit,
oažžu ustibin gonagasa.
12 Hearrá čalmmit várjalit dieđu,
behtolačča sániid son dahká duššin.
13 Láikkan dadjá: Olgun lea ledjon,
soaittán vel gottáhallat gasku gáhta!
14 Vierronissona njálbmi
lea čiekŋalis hávdi;
dasa gahččá dat geasa
Hearrá lea moaris.
15 Jallodat gullá nuorravuhtii,
muhto bagadeaddji rissi
vuojeha dan guhkás.
16 Dat gii givssida váivváša
ja skeaŋku riggái,
ii das rikko, muhto gefo.
17 Guldal dárkilit, gula viisáid sániid,
váldde vuostá dieđu maid mun oahpahan.
18 Bures dagat jos vurket dan
iežat siskkildassii
ja anát dan álo
iežat baksamiid alde.
19 Mun oahpahan dál dutnje
Hearrá geainnu,
vai don dorvvastivččet sutnje.
20 Golbmalogi njuolggadusa
mun lean čállán dutnje rávan ja diehtun,
21 vai don oahpašit duohta sániid
ja máhtášit vástidit daidda
geat leat vuolggahan du.
22 Ale rievit geafes olbmos
danin go son lea geafi,
alege duolmma vártnuheami rievttis,
23 dasgo Hearrá čuoččuha su ášši
ja rievida rievváriin heakka.
24 Ale ustibastal moarrás olbmáin
alege guoibmádala suhtadahkes olbmuin,
25 amat hárjánit su dábiide
ja bidjat giela alccesat.
26 Ale leage daid láhkái
geat addalit gieđaid
ja dáhkidit velggiid;
27 jos dus ii leat mainna máksit,
dallehan sii dolvot vel seaŋggage
mas veallát.
28 Ale sirdde dološ rádjegeađggi
maid du áhčit leat ceggen.
29 Oainnátgo olbmá
gii lea ábas bargguinis?
Gonagasaid son manná bálvalit,
ii smávváid.