1 Go čohkkát beavddis ráđđejeddjiin,
de jurddaš gii lea du muođuid ovddas.
2 Bija vaikko niibbi iežat čoddaga vuostá
jos leat nelgon.
3 Ale borastuva su herskuide,
danne go dat borramuš lea behtolaš.
4 Ale váivvit iežat vai beasat riggut,
leage jierpmálaš ja heaitte eret.
5 Illá leat oppa geahčastange
riggodahkii
ovdal go dat lea juo jávkan,
dat lea ožžon soajáid
ja girdá almmi guvlui dego goaskin.
6 Ale bora utnohis olbmo biepmu,
ale borastuva su njálgga borramušaide,
7 dat lea dego njielašit vuoktačalmmi.
Son dadjá gal dutnje:
“Bora ja juga,”
muhto ii son oaivvil dan.
8 Dan uhccánačča maid leat borran,
don šattat vuoksit,
ja du ustitlaš sánit mannet duššás.
9 Ale sártno jallain,
son badjelgeahččá du jierpmálaš sániid.
10 Ale sirdde dološ rádjegeađggi
alege bahkke oarbásiid eatnamii,
11 dasgo sin lonisteaddji
lea gievra,
son čuoččuha sin ášši du vuostá.
12 Raba váimmot bagadusii
ja beljiidat jierpmálaš sániide.
13 Ale divtte bártni leat bagadusa haga,
jos don risset su, de son ii jáme.
14 Go don risset su,
de don gájut su jábmiidáimmus.
15 Bártnážan, jos du váibmu lea viissis,
de mu váibmu illuda.
16 Mu siskkildas ávvuda,
go don sártnut dan mii lea duohta.
17 Ale gáđaš suttolaččaid,
muhto áŋgiruša álo vádjolit
Hearrá balus.
18 Dalle dus lea boahtteáigi,
iige du doaivu šatta duššin.
19 Guldal, bártnážan, ja viisso,
divtte iežat jurdagiid
mannat njulges bálgá.
20 Ale šatta juhkkiid
ja vuovddušteddjiid láhkásažžan,
21 danin go juhkkit ja borešat gefojit,
ja ođešvuohta gárvvuha sáigguide.
22 Guldal áhčát gii sahkanahtii du,
alege badjelgeahča eatnát
go son lea boarásmuvvan.
23 Oastte duohtavuođa, ale vuovdde dan,
oččot viissisvuođa,
bagadusa ja áddejumi.
24 Vanhurskása áhčči ávvuda jitnosit,
dat geas lea viissis bárdni, beassá illudit.
25 Illudahte áhčát ja eatnát,
ávvudehkos dat gii riegádahtii du.
26 Bártnážan, luohte munnje,
geahča mo mun ealán
ja vádjol mu geainnu.
27 Fuorrá lea čiekŋalis hávdi,
vierronisson gáržžes gáivo.
28 Son njágada dego rievvár,
son lasiha oskkáldasmeahttumiid logu.
29 Gii luoibmá ja šuohkká?
Gii riidala ja váidala?
Geas leat hávit dušši dihte,
geas rukses čalmmit?
30 Das gii gohcá guhká ja juhká viinni,
gii lea boahtán smáhket máisttaviinni.
31 Ale geahča viinni ruoksatvuhtii,
mo dat šelggohallá cearkkis
ja álkit golggiha čoddagii.
32 Maŋážassii dat gáská
dego gearpmaš,
čuolasta nugo mirkogearpmaš.
33 Dalle du čalmmit oidnet ártegiid,
du oaivái badjánit jorggojurdagat.
34 Orru dego don livččet guovdu ábi
dahje veallášit stivlegores.
35 “Mun huškkohallen,
muhto in mun bávččagan,
mun cápmáhallen,
muhto in mun diehtán maidege.
Goasson mun morránan?
Lasi mun áiggošin viežžat.”