1 Nugo muohta geasset,
nugo arvi lájuid áigge,
nu lea gudni jallas olbmui.
2 Dego girddašeaddji cizáš
ja sattáhalli beškkoš
lea ánssáškeahtes garuhus –
ii dat deaivit.
3 Spihčá hestii, suittehat ásenii,
rissi doavkki sealgái!
4 Ale vástit doavkái
su jallavuođa mielde,
amat šaddat su láhkásažžan.
5 Vástit doavkái su jallavuođa mielde,
amas navdit iežas viissisin.
6 Juolggi čuolasta ja vahága bovde
dat gii vuolggaha jalla doalvut sáni.
7 Loažža heaŋgájit lápmása juolggit,
nu maiddái sátnevádjasat jalla njálmmis.
8 Nugo šleŋgui čadnojuvvon geađgi
lea jallii addojuvvon gudni.
9 Dego bastilislátnjáoaksi
gárrenolbmo gieđas
lea sátnevájas jalla njálmmis.
10 Dego báhčči gii hávváduhttá summal,
lea dat gii bálkáha
jalla dahje meaddelmanni.
11 Dego beana mii máhccá
vuovssanasaidasas,
lea jalla gii geardu jallavuođaidis.
12 Jos oainnát olbmá
gii lea viissis iežas čalmmiin –
eambbo doaivu lea jallii go sutnje.
13 Láiki dadjá:
“Geainnus lea spire,
ledjon gasku gáhta!”
14 Uksa jorrá gižaldagas,
láikkan fierada seaŋggastis.
15 Láiki nahkeha gieđa gárrái,
njálmmi rádjái giehta ii badján.
16 Láiki navdá iežas viisábun
go čiehčasa
geat vástidit jierpmálaččat.
17 Golgobeatnaga beljiide dohppe dat
gii suhttiha go earát bealkkašit.
18 Dego mielaheapme gii báhčá
buolli ja goddi njuolaid,
19 lea dat gii beahttá ustibis
ja de dadjá:
Munhan dušše leaikkastallen!
20 Go muorat leat nohkan,
de dolla jáddá,
go šláttardeaddji lea mannan,
de jaskkoda bealku.
21 Činat áššui, muorat dollii,
bealkálas olmmái cahkkeha riiddu.
22 Sealggebealsárdnu ságat leat
dego herskot,
dat vudjot olbmo siskkildassii.
23 Dego silbageardi láirálihtis
leat njálggisteaddji baksamat
ja bahás váibmu.
24 Vaššás olmmoš guoktiluššá
baksamiiddisguin,
muhto siskkildasas
sus lea beahtus.
25 Son dahká jienas linisin,
muhto ale jáhke sutnje,
su váimmus leat čieža fastivuođa.
26 Son čiehká vašis juonalašvuođain,
muhto čoakkalmasas
su bahávuohta boahtá albma.
27 Dat gii roggá hávddi, gahččá dasa ieš,
gii fieraha geađggi,
dan ala dat fierrala.
28 Gielástalli vašuha daid
geaid vahágahttá,
njálggástalli ráhkada heavu.