Viisodat ja Hearrá ballu
1 Bártnážan, ale vajáldahte
maid mun lean oahpahan dutnje,
vurke mu báhkkomiid váibmosat.
2 Dat lasihit dutnje eallinjagiid,
addet dutnje ráfi ja lihku.
3 Ale divtte buorrevuođa
ja oskkáldasvuođa gáidat luhtát –
giesa daid iežat čeabehii,
čále daid váimmot távvalii,
4 de Ipmil ja olbmot atnet du árvvus
du viissisvuođa dihte.
5 Dorvvas Hearrái oppa váimmus,
alege luohte iežat jierbmái.
6 Jurddaš su gos dal vádjoleaččat,
de son dahká du bálgáid njuolgadin.
7 Ale leage jierbmái iežat čalmmiin;
bala Hearrás ja gáidda bahás.
8 Dat šaddá dearvvasvuohtan
du rupmašii,
fápmun buot dan dávttiide.
9 Gudnejahte Hearrá
buot dainna mii dus lea,
buot dan álgošattuin maid leat šaddadan.
10 Dalle gortnit devdet du áittiid,
ja viidni golgá
du bohčingáriid badjel.
11 Bártnážan, ale hilggo
Hearrá bagadusa,
ale nuonddahala
go son cuiggoda du,
12 danne go Hearrá ráŋgu dan
gean son ráhkista,
son bagada dan bártni
gean son atná ráhkisin.
Lihkolaš dat gii lea gávdnan viisodaga
13 Lihkolaš dat olmmoš
gii lea gávdnan viisodaga,
dat gii lea joksan dieđu.
14 Buoret go silba lea viisodat,
dat addá buoret vuoittu go golli.
15 Viisodat lea mávssoleabbo
go bearralat,
ii mihkkege buot dávviriin
leat dan veardásaš.
16 Dan olgeš gieđas lea guhkes eallin,
dan gurut gieđas riggodat ja gudni.
17 Viisodaga geainnuid
lea hávski vádjolit,
buot dan bálgát dolvot ráfái.
18 Dat lea eallima muorra
buohkaide geat fáhtejit dan,
lihkolaš dat gii doallá das gitta.
19 Hearrá vuođđudii eatnama
viisodagain,
son lebbii almmi ipmárdusain.
20 Su diehtu rabai
čiekŋalasaid rávnnji
ja divttii balvvaid suolnni goaikut.
21 Bártnážan, ane áimmuin
jierpmálašvuođa ja fuolalašvuođa,
ale luoitte daid gáidat
čalmmiidat ovddas,
22 danin go dat addet dutnje eallima,
dat leat čikŋa du čeabeha birra.
23 Dalle don vádjolat oadjebasat,
it nordda juolggát,
24 ja go leat veallánan, de oađát njálgát,
it bala mastege.
25 Ale bala fáhkkes suorggahusas,
ale garra dálkkis
mii deaivida ipmilmeahttumiid,
26 dasgo Hearrá lea du dorvu,
son várjala du juolggi darváneames gillii.
Daga buori lagamužžasat!
27 Ale biehttal veahkeheames,
jos nubbi olmmoš dárbbaša veahki
ja don sáhtát dahkat sutnje buori.
28 Jos dus lea mihkkege maid addit,
de ale daja lagamužžasat:
“Mana dál ja boađe ihttin,
de mun attán dutnje!”
29 Ale hutkka baháid lagamuččat vuostá
gii atná oadjebassan ássat du siidaguoibmin.
30 Ale bealkke nuppiin almmá siva haga,
go son ii leat dahkan dutnje
maidege baháid.
31 Ale gáđaš veahkaválddálaš olbmá,
ale čuovvul su luottaid.
32 Hearrá fasttáša vearálaš olbmo,
muhto vuoigatlačča son atná ustibin.
33 Hearrá garuha
ipmilmeahttumiid viesu,
muhto vanhurskásiid ruovttu
son buressivdnida.
34 Bilkideddjiid son bilkida,
muhto vuollegaččaide son addá árpmu.
35 Viisát ožžot gudni,
jierpmeheamit guddet iežaset heahpada.