1 Lemuela, Massa gonagasa, sánit,
maid su eadni oahpahii sutnje.
2 Bártnážan,
don gean mun riegádahtten,
mu lohpádusaid bárdni:
3 Ale golat iežat fámu nissoniidda,
ale juogat dan daidda
geat leat gonagasaid heavvu.
4 Ii heive gonagasaide, Lemuel,
ii heive gonagasaide juhkat viinni
iige ráđđejeddjiide leat váibmil
garra juhkamušaide.
5 Go sii juhket,
de sii vajáldahttet lága
ja botnjet vártnuhis olbmuid
vuoigatvuođa.
6 Garra juhkamuš heive dasa
gii lea duššamin,
viidni dasa gean váimmus
lea bahča moraš,
7 vai son jugadettiin
vajáldahttá váivvášvuođas
iige šat muitte iežas váivviid.
8 Bajit jiena gielaheami beales,
bealuš buohkaid geat leat jorraleamen.
9 Bajit jiena ja dubme vuoigatlaččat,
bealuš gefiid ja váivvášiid.
Buorre áhkká
10 Hágas áhkká – gii gávdná su?
Son lea sakka mávssoleabbo
go bearralat.
11 Su boadnjá luohttá sutnje ollásit,
son doallá váni guhkkin.
12 Son dahká boadnjásis buriid,
ii goassege baháid, nu guhká go eallá.
13 Son háhká ulluid ja beallemasaid,
su gieđat barget viššalit.
14 Son lea gávpeolbmá skiippaid
láhkásaš,
guhkkin son viežžá eallámuša.
15 Son lihkká go ain lea idja,
son addá dáluolbmuide borramuša
ja bálvánieiddaidasas sin oasi.
16 Son gávdná buori bealddu
ja oastá dan,
son gilvá viidnegárddi dainna
maid lea dinen.
17 Son boahkánastá alimiid fámuin,
son bargagoahtá gievrras gieđaiguin.
18 Son muosáha fitnuidis
lihkostuvvat,
su lámpá ii čáskka ihkku.
19 Son joraha snáldooaivvi,
son ii luoitte snálddu gieđas.
20 Son geige gieđa vártnuhemiide,
son rahpá sala váivvášiidda.
21 Go muohta boahtá, de son ii bala,
danin go buohkain su bearrašis
leat ullobiktasat.
22 Gokčasiid son gođđá ieš,
su gárvun lea beallemas ja purpur.
23 Su boadnjá adnojuvvo árvvus
go son čohkká vuorrasiiguin
gávpotpoarttas.
24 Son goarru beallemasbiktasiid
ja vuovdá daid,
son bidjá boahkániid gávpeolbmái.
25 Fápmu ja gudni lea su gárvu,
mojunjálmmiid son geahččá boahtteáigái.
26 Go son sárdnu, de son sárdnu viisát,
son addá ustitlaš neavvagiid.
27 Son goziha buot mii dálus
dahkkojuvvo,
ii son bora láibbi láikin.
28 Su mánát máidnot su lihkolažžan,
su boadnjá rámida su:
29 “Eatnat nissonat leat čeahpit
ja viššalat,
muhto don leat sis buoremus.”
30 Liekkusvuohta beahttá,
čábbodat jávká,
rámiduvvon dat áhkká
gii ballá Hearrás!
31 Addet sutnje su barggu bálkká,
rámiduvvos son gávpotpoarttain
daguidis dihte.