Doalat eret eará olbmá áhkás!
1 Bártnážan, guldal mu viisodaga,
váldde vuhtii mu buriid neavvagiid,
2 vai anát áimmuin ipmárdusa,
ja diehtu báidná du sániid.
3 Vierronissonis lea honnet baksamiin,
su njuovčča lea litnáseabbo go olju,
4 muhto loahpas son lea rihča
dego máron,
bastil dego guovtteávjjot miehkki.
5 Su juolggit vázzet jápmimii,
su lávkkit dolvot jábmiidáibmui.
6 Ii son beroš eallima geainnus,
ii son fuomáš ahte lea láhppomin.
7 Dan dihte, mánáidan, guldalehket mu,
allet gáidda mu sániin.
8 Doalat guhkkin sus,
ale oppa lahkange su viesu uksii,
9 vai it šattaše addit
iežat fámu earáide,
jagiidat árpmuhis hearrái,
10 vai vierrásat eai anáše ávkki
du vuimmiin,
vai du rahčamušaid bohtosat
eai šattaše vierrása vissui.
11 Don luoimmat go loahppa boahtá,
go du rumaš ja oažži sotná:
12 “Manne mun vašuhin bagadusa
ja badjelgehččen cuiggodusa?
13 Manne mun in guldalan
oahpaheddjiidan,
manne in váldán vuhtii sin sániid?
14 Mun ledjen goasii šaddan
oasehisvuhtii
oppa searvegotti ovddas.”
15 Juga čázi iežat gáivvos,
golgi čázi iežat ádjagis.
16 Galggašedjego du ádjagat
golgat gáhtaide,
du čáhcejogažat márkanšiljuide?
17 Lehkoset dat aivvefal du,
ale juogat daid vierrásiiguin!
18 Lehkos du ája buressivdniduvvon,
illut nuorravuođa áhká dihte.
19 Eahcálaš sarvvaáldu,
liekkus gasella,
áhpásmahttos su raddi du juohke áigái,
leage álelassii juhkaluvvan
su ráhkisvuođas.
20 Manne, bártnážan, divttášit
eará nissona gárihuhttit iežat,
manne fátmmastivččet vierronissona?
21 Hearrá oaidná gos olmmái vádjola,
son dárko buot su lávkkiid.
22 Ipmilmeahttun darvána
iežas vearredaguide,
roahkkasa suttuidis gillii.
23 Son jápmá danne go
hilggui bagadusa,
stuorra jallavuođastis
son guosada.