Viissisvuohta sárdnu iežas birra
1 Gula, viisodat čuorvu,
ipmárdus addá jienas gullot.
2 Son čuožžu dieváid alde,
geaidnoguorain ja luoddaearuin.
3 Gávpotpoarttain maid ráigge olbmot
mannet gávpogii, son čuorvu jitnosit:
4 “Mun čuorvvun didjiide, olbmot,
mu jietna čuodjá juohkehažžii.
5 Oččodehket viisodaga,
dáidemeahttumat,
oččodehket jierpmi, jallat!
6 Gullet, mun sártnun
dan mii lea duohta,
mu baksamiin bohtet vuoigatlaš sánit.
7 Mu njuovčča sárdnu duohtavuođa,
mu baksamat fasttášit
ipmilmeahttunvuođa.
8 Buot mu sánit leat vuoigatlaččat,
dain ii leat mihkkege boastut
iige vearrut.
9 Dat leat čielgasat jierpmálažžii,
dat gii lea gávdnan dieđu,
diehtá ahte dat leat vuoigadat.
10 Oamastehket mu bagadusa
silbba sadjái,
dieđu ovdal go válljugolli,
11 danne go viissisvuohta lea
mávssoleabbo go bearralat,
eai makkárge dávvirat
leat dan veardásaččat.
12 Mun, viissisvuohta,
lean jierpmi siidaguoibmi,
mus lea diehtu ja fuolalašvuohta.
13 Gii ballá Hearrás, vašuha buot bahá.
Mun vašuhan goargatvuođa ja čeavlli,
bahás daguid ja gielis ságaid.
14 Mun attán ráđi ja ovdáneami,
mun lean jierbmi, munnje gullá fápmu.
15 Mu vehkiin gonagasat ráđđejit
ja oaivámuččat ásahit dan
mii lea riekta,
16 mu vehkiin ráđđejeaddjit
ja oaivámuččat stivrejit,
buohkat geat dubmejit rievttuid.
17 Mun ráhkistan daid
geat ráhkistit mu,
dat geat ohcet mu, gávdnet mu.
18 Mu luhtte lea riggodat ja gudni,
vuoiggalašvuohta ja bistevaš opmodat.
19 Mu attáldat lea buoret
go fiidnámus golli,
mu šaddu buoret go válljusilba.
20 Mun vádjolan
vanhurskkisvuođa geainnu,
gasku vuoiggalašvuođa bálgáid.
21 Mun attán riggodaga daidda
geat ráhkistit mu,
mun deavddán sin vuorkágámmáriid.
22 Hearrá sivdnidii mu vuosttamužžan,
daguidis álgun, guhká dás ovdal.
23 Agálašvuođas mun hábmejuvvojin,
álggus juo, ovdal go eanan lei.
24 Mun riegádin ovdal go
ledje mearračiekŋalasat,
go ii lean vel oktage čáhccás ája,
25 ovdal go várit biddjojuvvojedje
sadjáseaset,
ovdal buot dieváid riegádin mun,
26 ovdal go son dagai eatnama
ja meahci
dahje muoldda mii gokčá eatnama.
27 Mun ledjen das go son
ráhkadii almmiid,
dalle go son lebbii gomuvuođa
čiekŋalasa badjel,
28 go son attii allagasa balvvaide fámu
ja divttii mearračiekŋalasa
ádjagiid boršut,
29 go son bijai merrii ráji,
nu ahte čáhci bisánii dasa
gosa son gohčui,
go son bijai eatnama vuođđudusaid.
30 Dalle juo mun ledjen mánnán
su luhtte,
mun ledjen su illun beaivvis beaivái
ja duhkoradden álelassii
su muođuid ovddas.
31 Mun duhkoradden
miehtá su máilmmi,
mu illun ledje olbmománát.
32 De gullet dál mu, mánáidan!
Ávdugasat dat geat vádjolit
mu geainnuid.
33 Gullet mu cuiggodusa,
de dii viisubehtet,
allet hilggo dan.
34 Ávdugas dat olmmoš gii guldala mu,
gii beaivvis beaivái gohcá
mu uvssa guoras
ja vuordá mu uksašielmmás.
35 Dat gii mu gávdná, gávdná eallima
ja oažžu Hearrá árpmu.
36 Muhto dat gii mu badjelgeahččá,
vahágahttá iežas,
dat geat mu vašuhit,
ráhkistit jápmima.”