Sálbma 101
1 Davida sálbma.
Mun lávllun du oskkáldasvuođa
ja vuoiggalašvuođa,
mun lávllun dutnje máidnuma, Hearrá.
2 Mun dáhtun oahppat vádjolit
vuoigatlaččat
– goas boađát mu veahkkin?
Mun dáhtun eallit láitemeahttumit
iežan viesus.
3 Mun in riema masage
mii lea árvvuheapme.
Mun vašuhan daid geat rihkkot lága,
dakkárat eai oaččo boahtit mu lahka.
4 Gáidos behtolašvuohta mu luhtte,
mun in fuola bahás.
5 Mun jávohuhtán dan gii sárdnu
lagamuččas sealggebealde.
Čeavlás čalmmiid ja gorges váimmu
mun in gierdda.
6 Mu čalmmit gehččet
eatnama oskkáldasaide,
sii besset ássat mu luhtte.
Dan gii vádjola láitemeahttumit,
mun válddán bálvaleaddjin,
7 muhto behtolaš ii beasa
ássat mu viesus.
Dan gii sárdnu giellásiid,
mun in duotto oaidnit.
8 Juohke iđida mun duššadan
ipmilmeahttumiid eatnamis,
jávkadan Hearrá gávpogis
buohkaid geat dahket veriid.