Sálbma 102
1 Vártnuhis ja vuoimmehuvvan olbmo rohkos, go son bidjá morrašiiddis Hearrá ovdii.
2 Hearrá, gula mu rohkosa,
divtte mu čuorvasa olahit du lusa!
3 Ale čiega mus muođuidat
go mun lean heađis.
Guldal mu,
doama vástidit go mun čuorvvun.
4 Mu beaivvit jávket dego suovva,
mu dávttit bullet nugo ráttit.
5 Mu siskkildas lea dego goikan
ja goldnan rássi,
mun in muitte šat oppa borratge.
6 Mun šuohkán ja luoimman,
mun lean dego sohppojuvvon dákti.
7 Mun lean dego skuolfi meahcis,
nugo idjaloddi mii orru heavvobázahasain.
8 Mun gozán ijaid,
mun lean dego loddi
mii huhttá dáhki alde.
9 Mu vašálaččat hiddjidit mu
geažos beaivvi,
sii bilkidit mu ja atnet mu nama
garrusátnin.
10 Mun boran gunaid láibin,
seaguhan iežan juhkamuša gatnjaliiguin.
11 Moaris ja suhtus don dohppejit mu
ja suhppejit mu eatnamii.
12 Mu beaivvit leat dego eahketsuoivvan,
mun golnnan rási láhkái.
13 Muhto don, Hearrá,
čohkkát truvnnustat agálaš áigái,
du namma bissu buolvvas bulvii.
14 Don čuožžilat árpmihit Siona.
Dan boddu lea boahtán,
lea áigi árpmihit dan.
15 Du bálvaleaddjit ráhkistit
Siona geđggiid,
árkkášit go oidnet dan gunaid.
16 Álbmogat ballet Hearrá namas,
buot eatnama gonagasat
Hearrá hearvásvuođas,
17 go son hukse Siona
ja almmustuvvá hearvásvuođastis.
18 Son geahččá vártnuhemiid beallái,
iige badjelgeahča sin rohkosiid.
19 Dát čállojuvvo boahtti áiggiid várás,
ođđa buolvvat máidnot Hearrá.
20 Hearrá geahččá vuolás
bassi allagasastis,
almmis son geahččá eatnamii.
21 Son gullá fáŋggaid šuohkkima,
son čoavdá daid
geat leat dubmejuvvon jápmit.
22 Hearrá namma gulahuvvo Sionis,
su máidnun gullo Jerusalemis,
23 go álbmogat čoagganit,
go riikkat bohtet bálvalit Hearrá.
24 Son lea vuoimmehuhttán mu
gaskan mátkki,
mu beivviid son lea oanidan.
25 Mun rohkadalan: Mu Ipmil,
ale váldde mu eret gaskan beivviidan,
don gean jagit bistet buolvvas bulvii.
26 Don vuođđudit eatnama juo dolin,
albmi lea du gieđaid dahku.
27 Dat duššet, muhto don bisut.
Dat nohket dego bivttas,
don molssut daid dego gárvvuid,
eaige dat šat leat.
28 Muhto don leat álo seammá,
du jagit eai noga.
29 Du bálvaleddjiid mánát
besset ássat ráfis,
sin sohka bissu nanusin
du muođuid ovddas.