Sálbma 104
1 Máinno Hearrá, mu siellu!
Hearrá, mu Ipmil, don leat stuoris!
Don leat gárvodan allatvuođa
ja hearvásvuođa,
2 čuovggas du birra lea dego bivttas.
Don leat lebben almmi dego loavdaga
3 ja huksen iežat sála čáziid badjel.
Don dagat balvvaid iežat vovdnan
ja jođát biekka soajáiguin.
4 Biekkaid don dagat áirrasin,
šloavvi dola bálvaleaddjinat.
5 Don vuođđudit eatnama
nana vuođu ala,
dat ii lihkahuvvo agálaš áigái.
6 Mearračiekŋalas govččai dan
dego bivttas,
čázit ledje váriid badjel.
7 Muhto don gohččot čáziid
ja dat báhtaredje,
dat manne hoahpus
du bajána jiena ovddas.
8 Čázit badjánedje váriid badjel
ja golge legiide,
daidda sajiide maid don mearridit.
9 Don bidjet ráji čáziide,
eaige dat šat goassege
máhca gokčat eatnama.
10 Don diktet ádjagiid golggiidit legiin,
dat golget johkan váriid gaskka.
11 Dat addet čázi buot eatnama elliide,
doppe meahcceásenat čáskadit goikku.
12 Daid gáttiin almmi lottit bessejit
ja vizardit ovssiid alde.
13 Don čáhccet váriid alla sálastat,
ja eanan gallehuvvo
buot dainna maid don attát.
14 Don šaddadat rási omiide
ja šattuid ávkin olbmuide.
Nu don divttát biepmu boahtit eatnamis
15 ja viinni illudahttit olbmo váimmu.
Olju dahká ámadaju báitin,
ja láibi addá olbmui áhpiid.
16 Hearrá muorat gallehuvvojit,
Libanona sederat maid son lea gilván.
17 Lottit huksejit daid ovssiide beasi,
stoarkka viessu lea daid gierragiin.
18 Alla várit leat várregáicca ruoktu,
bákteluomuin gávdná báktemievri suoji.
19 Don dahket mánu čájehit áiggiid,
ja beaivváža mii diehtá luoitádanáiggis.
20 Don vuolggahat seavdnjadasa,
ja idja šaddá.
Dalle lihkadišgohtet buot meahcieallit.
21 Nuorra ledjonat čergot
stajádusa maŋŋái,
dat bivdet Ipmilis biepmu.
22 Go beaivváš badjána, dat čiehkádit
ja mannet goarjut biejuidasaset.
23 Dalle olmmoš vuolgá bargosis
ja bargá gitta eahkedii.
24 Hearrá, lohkameahttumat
leat du dagut!
Buot daid don dahket viissisvuođain,
eatnama dievva leat du sivdnádusat.
25 Das lea áhpi, stuoris ja viiddis,
giđđudeaddji elliid eatnatvuohta,
lohkameahttun ollu eallit,
sihke smávvát ja stuorrát.
26 Doppe johtet skiippat,
doppe lea Leviatan maid don dahket
duhkoraddat čiekŋalasas.
27 Buot dat bidjet doaivvu dutnje,
vurdet du biebmat sin rivttes áigái.
28 Don attát daidda, ja dat váldet,
don rabastat gieđa a gallehat daid
buriid attáldagaiguin.
29 Go don jorgalat eret,
de dat suorganit,
don válddát dain eallinvuoiŋŋanasa,
ja dat jápmet ja šaddet fas muoldan.
30 Don vuolggahat vuoiŋŋat,
ja eallin sivdniduvvo,
don ođasmahtát eatnama hámi.
31 Vare Hearrá gudni bisttášii agálaš áigái,
vare Hearrá beasašii illudit daguidis dihte!
32 Son geahččá eatnamii,
ja dat doarggista,
son guoskkaha váriid,
ja dat borggistit.
33 Mun rámidan Hearrá buot beivviidan,
máinnun Ipmilan nu guhká go ealán.
34 Vare Hearrá liikošii mu lávlagii,
vare mun beasašin illudit Hearrás!
35 Vare buot suttolaččat
jávkkašedje eatnamis,
eaige ipmilmeahttumat šat livčče das!
Máinno Hearrá, mu siellu!
Halleluja!