Sálbma 105
105Giitet Hearrá, čurvot su nama,
          muitalehket álbmogiidda
          su stuorra daguid!

    2 Lávlot ja čuojahehket su gudnin,
          almmuhehket buot su oavdduid.

    3 Máidnot su bassi nama,
          illudehkoset dat geat ohcet Hearrá!

    4 Ohcet Hearrá ja su fámu,
          loaiddastehket álelassii su muođuid ovdii.

    5 Muitet daid oavdudaguid
          maid son lea dahkan,
          su mearkkaid ja su duomuid,

    6 dii Abrahama, su bálvaleaddji, mánát,
          dii Jakoba bártnit, geaid son lea válljen.

    7 Son lea Hearrá, min Ipmil,
          su duomut jukset oppa eatnama.

    8 Son muitá lihtus agálaš áigái,
          duhát bulvii báhkkoma maid attii,

    9 lihtu maid dagai Abrahamiin,
          váli maid vuortnui Isakii.

    10 Son attii dan Jakobii láhkan,
          Israelii agálaš lihttun.

    11 “Mun attán dutnje Kanaana eatnama
          árbin ja opmodahkan.”

    12 Vaikko sii ledje dušše
          uhca jovkkoš, vierrásat

    13 geat vádjoledje álbmogis álbmogii,
          riikkas nubbái,

    14 de son ii suovvan ovttage soardit sin.
          Sin dihte son ráŋggui gonagasaid:

    15 “Allet guoskka daidda
          geaid mun lean vuoidan,
          allet daga baháid mu profehtaide.”

    16 Son gohčui nealggi boahtit eatnamii
          ja válddii sis láibbi,

    17 son vuolggahii olbmá ovdal sin,
          Josefa, gii vuvdojuvvui šlávvan.

    18 Sii bággejedje Josefa julggiid láhkkiide,
          ruovdi biddjojuvvui su čeahpáha birra,

    19 dassá go su sátni ollašuvai,
          ja Hearrá duođaštii su áššeheapmin.

    20 Gonagas gohčui luoitit su friddjan,
          álbmogiid ráđđejeaddji luittii su luovos.

    21 Son bijai Josefa iežas viesu hearrán,
          hálddašit buot su opmodaga,

    22 bagadit oaivámuččaid
          iežas dáhtu mielde
          ja oahpahit vuorrasiidda viissisvuođa.

    23 Nu Israel bođii Egyptii,
          Jakob vierisin Hama eatnamii.

    24 Ipmil dagai álbmogis šattolažžan,
          gievrrabun go dan vašálaččat.

    25 Son jorgalii egyptalaččaid miela,
          ja sii vašuhišgohte su álbmoga,
          meannudedje gávvilit su bálvaleddjiiguin.

    26 Son vuolggahii Mosesa, bálvaleaddjis,
          ja Arona gean son lei válljen.

    27 Soai dagaiga Egyptas Ipmila mearkkaid,
          oavdudaguid Hama eatnamis.

    28 Hearrá vuolggahii seavdnjadasa,
          ja visot sevnnjodii,
          muhto egyptalaččat nággárušše
          su sáni vuostá.

    29 Son nuppástuhtii sin čázi varran
          ja gottii visot sin guliid.

    30 Cubbot giđđudedje sin eatnamis,
          velá gonagasa gámmáriid sistege.

    31 Hearrá gohčui, ja čurotmoađit bohte,
          čuoikkat levve miehtá sin riikka.

    32 Son attii čuorbmasiid arvvi sadjái
          ja časkkii eatnama šloavvi dolain.

    33 Son njeiddii sin viidnemuoraid
          ja fiikonmuoraid
          ja dojii juohke muora sin eatnamis.

    34 Son gohčui, ja rásselohkut bohte,
          lohkameahttun jurssánat.

    35 Dat borre eatnamis buot ruotnasa,
          jurse visot bealdduid šattuid.

    36 Ipmil sorbmii buot
          sin vuosttašriegádeddjiid,
          sin olmmáivuođa vuosttaš šattuid.

    37 Son doalvvui israellaččaid eret Egyptas,
          sii vulge ja gudde silbba ja golli,
          su čearddaid olbmuin
          ii oktage guossalan.

    38 Egypta illudii go sii vulge,
          dasgo álbmot balai sis.

    39 Son lebbii balvva govččasin
          ja bijai dola čuvget ija.

    40 Sii gáibidedje borramuša,
          ja son vuolggahii váktillottiid,
          son gallehii sin almmi láibbiin.

    41 Son rabastii bávtti, ja čáhci golggihii,
          dat golggai johkan goikeeatnamis.

    42 Hearrá muittii bassi lohpádusas
          Abrahamii, bálvaleaddjásis,

    43 ja divttii álbmogis vuolgit iluin.
          Álbmot maid son lei válljen,
          beasai johttát ávvudemiin.

    44 Son attii sidjiide
          eará álbmogiid ássansajiid,
          sii besse váldit vierroálbmogiid
          rahčamušaid šaddosiid,

    45 ja sii galge doallat su báhkkomiid,
          doahttalit su lágaid.
          Halleluja!

< Forrige kapittel

Neste kapittel >

02. juli 2022

Dagens bibelord

Matteus 16,24–27

Les i nettbibelen

24Deretter sa Jesus til disiplene: «Om noen vil følge etter meg, må han fornekte seg selv og ta sitt kors opp og følge meg. 25For den som vil berge sitt liv, skal miste det. Men den som mister sitt liv for min skyld, skal finne det. ... Vis hele teksten

Les vår personvernserklæring

Hopp rett til

Sálmmaid girji

Dagens bibelord

Motta Dagens Bibelord på e-post hver dag