Sálbma 106
1 Halleluja!
Giitet Hearrá! Son lea buorre,
su árbmu bistá agálaččat.
2 Gii máhttá muitalit Hearrá
veagalaš daguid,
almmuhit buot maid son lea dahkan?
3 Ávdugasat dat geat ellet
nugo lea vuoigat,
geat álelassii barget vuoiggalaččat.
4 Hearrá, don leat árbmugas
iežat álbmogii – oahppalatta munai!
Veahket mu ja beastte mu,
5 divtte mu dovdat daid olbmuid lihku
geaid leat válljen,
illudit go du álbmot illuda
ja ávvudit oktan daiguin geat gullet dutnje.
6 Mii leat suddudan nugo min áhčitge,
mii leat dahkan baháid
ja eallán ipmilmeahttumit.
7 Go min áhčit ledje Egyptas,
de sii eai ipmirdan du oavdudaguid.
Sii eai muitán buot buriid
maid ledjet dahkan.
Ruksesmeara gáttis
sii nággárušše du vuostá.
8 Muhto Hearrá besttii sin,
namas gudni dihte,
son čájehii iežas fámu ja válddi.
9 Son áittii Ruksesmeara, ja dat goikkai,
son doalvvui sin mearračiekŋalasa čađa,
mearrabotni dego meahcceluotta.
10 Son besttii sin vašuheddjiin,
lonistii sin vašálačča gieđas.
11 Čáhci govččai buot sin vuostálastiid,
ii oktage dain báhcán heggii.
12 Dalle sii osko maid son lei sárdnon,
ja lávlo sutnje giitosa.
13 Dattetge sii fargga vajáldahtte su daguid,
eai luohttán su neavvagiidda.
14 Meahcis sii dohppehalle anistupmái
ja geahččaledje Ipmila.
15 Dalle son attii sidjiide
maid sii gáibidedje,
muhto vuolggahii sin gaskii maiddái
issoras dávdda.
16 Siiddas sii gáđaštedje Mosesa
ja Arona, Hearrá bassi olbmá.
17 Dalle eanan rahpasii ja njielai Datana,
govččai Abirama joavkku.
18 Daid vuostá geat čuvvo su,
buollái dolla,
njivžžanas duššadii ipmilmeahttumiid.
19 Horeba vuolde sii leikejedje gálbbi
ja gopmirdedje bácci
maid ledje ráhkadan.
20 Sii lonuhedje gudniset vuovssá govain,
šibiha mii borrá rásiid.
21 Sii vajáldahtte Ipmila, beastiset,
guhte lei dahkan stuorra daguid Egyptas,
22 imašlaš oavdudaguid Hama eatnamis,
balddihahtti daguid Ruksesmeara gáttis.
23 Son livččii duššadan sin
jos Moses, gean son lei válljen,
ii livčče loaiddastan su ovdii
ja hehtten su moari duššadeames sin.
24 Sii hilgo hávskás eatnama,
sii eai oskon maid Hearrá sártnui,
25 muhto nimmoredje gođiineaset
eaige gullan Hearrá jiena.
26 Dalle son bajidii gieđa sin vuostá.
Son áiggui časkit sin meahcis,
27 biđget sin mánáid álbmogiid gaskii
ja háddjet sin buot eatnamiidda.
28 Sii serve Baal-Peoriin
ja borre heakkahis ipmiliid oaffariid.
29 Sii moaráhuhtte Hearrá
daguideasetguin,
ja rohttudávda bođii sin gaskii.
30 Dalle loaiddastii Pinehas ovdan
ja doalai duomu,
ja rohttudávda bissánii.
31 Dan dihte son adnojuvvo vanhurskkisin
buolvvas bulvii, agálaččat.
32 Sii moaráhuhtte Ipmila
Meribačázi gáttis,
ja sin geažil Moses šattai gillát.
33 Sii bávččagahtte su miela,
ja son sártnui almmá jurddaškeahttá.
34 Sii eai duššadan eatnama álbmogiid
maid Hearrá lei gohččon sin duššadit,
35 muhto seahkánedje vieris álbmogiidda
ja ohppe sin vieruid.
36 Sii bálvaledje vieris ipmiliid,
ja dat šadde sidjiide giellan.
37 Sii oaffarušše bártniideaset
ja nieiddaideaset bahás vuoiŋŋaide.
38 Sii golggahedje vigihis vara,
bártniid ja nieiddaid vara
maid sii oaffarušše
Kanaana eahpeipmiliidda,
ja varra dagai eatnama eahpebassin.
39 Sin dagut dahke sin buhtismeahttumin,
sii ledje oskkáldasmeahttumat
das maid dahke.
40 Dalle Hearrá moarri buollái
álbmoga vuostá,
son fasttášii daid geat gulle sutnje.
41 Son attii sin vierroálbmogiid gihtii,
sin vašuheaddjit ráđđejedje sin.
42 Sin vašálaččat áŧestedje sin,
ja sii šadde vierrásiid váldái.
43 Son gájui sin eatnat gerddiid,
muhto sii nággárušše su vuostá,
dahke nugo dáhtto
ja vudjo suddui ain čiekŋalebbui.
44 Muhto Hearrá oinnii sin heađi
ja gulai sin čuorvasa.
45 Son muitái lihtus singuin
ja árpmihii sin
stuorra árbmugasvuođastis.
46 Son jorgalii sidjiide váibmoláđisin
daid olbmuid
geat ledje dolvon sin fáŋgavuhtii.
47 Beastte min, Hearrá, min Ipmil,
viečča min álbmogiid gaskkas!
Dalle mii beassat máidnut du bassi nama
ja giitit ja rámidit du.
48 Máidnojuvvon lehkos Hearrá,
Israela Ipmil,
agálašvuođas agálašvuhtii!
Celkos oppa álbmot: Amen.
Halleluja!