Sálbma 114
1 Go Israel vulggii Egyptas,
go Jakoba nálli guđii vieris eatnama,
2 de dalle Juda šattai Hearrá
bassi opmodahkan,
Israel su riikan.
3 Mearra oinnii dan ja báhtarii,
Jordaneatnu jorggihii ruoktot.
4 Várit njuikkodedje dego vierccat,
dievát nugo lábbát.
5 Mearra, mii dutnje šattai,
go don báhtarat?
Jordan, manne don jorggihat ruoktot?
6 Várit, manne dii njuikkodehpet
dego vierccat,
dii dievát nugo lábbát?
7 Eanan, doarggis Hearrá muođuid ovddas,
Jakoba Ipmila ovddas!
8 Son nuppástuhttá bávtti jávrin,
garra geađggi čáhceájan.